ନୂଆଦିଲ୍ଲୀ,୧୬ା୨: ପୂର୍ବ ଲଦାଖ ଓ ହିମାଚଳ ପ୍ରଦେଶକୁ ଯୋଡ଼ିବାକୁ ଥିବା ବିଶ୍ୱର ସର୍ବବୃହତ୍ ସୁଡ଼ଙ୍ଗ ଶିଙ୍କୁଲା ଟନେଲ (ସମୁଦ୍ର ପତ୍ତନରୁ ୧୬,୭୦୩ ଫୁଟ୍ ଉଚ୍ଚ) ନିର୍ମାଣ ପ୍ରସ୍ତାବକୁ ବୁଧବାର କେନ୍ଦ୍ର କ୍ୟାବିନେଟ୍ର ଅନୁମୋଦନ ମିଳିଛି। ଏଥିସହ ଭାରତ-ଚାଇନା ମଧ୍ୟସ୍ଥ ପ୍ରକୃତ ନିୟନ୍ତ୍ରଣରେଖା (ଏଲ୍ଏସି) ସଂଲଗ୍ନ ଅଞ୍ଚଳର ସୁରକ୍ଷା ଦାୟିତ୍ୱରେ ଥିବା ଇଣ୍ଡୋ-ତିବ୍ବତୀୟ ସୀମା ପୋଲିସ (ଆଇଟିବିପି)ର ୭ଟି ନୂଆ ବାଟାଲିୟନ୍ ପ୍ରତିଷ୍ଠା ପ୍ରସ୍ତାବ ଉପରେ ମଧ୍ୟ ମୋହର ପଡ଼ିଛି।
ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ ସୁରକ୍ଷା ସମ୍ପର୍କିତ କ୍ୟାବିନେଟ୍ (ସିସିଏସ୍) ବୈଠକ ଲଦାଖ ସହ ଦେଶର ଅବଶିଷ୍ଟ ଅଞ୍ଚଳକୁ ସବୁ ଋତୁରେ ଯୋଡ଼ିବା ଲକ୍ଷ୍ୟରେ ୪ କି.ମି. ଲମ୍ବର ଶିଙ୍କୁଲା ଟନେଲ୍ ଓ ଏହାର ଆପ୍ରୋଚ୍ ରୋଡ୍ ନିର୍ମାଣକୁ ମଞ୍ଜୁରୀ ଦେଇଛି। ଏହାକୁ ବର୍ଡର ରୋଡ୍ ଅର୍ଗାନାଇଜେଶନ୍ (ବିଆର୍ଓ) ନିର୍ମାଣ କରିବ।
ପରେ ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ଗଣମାଧ୍ୟମକୁ ଏହି ସୂଚନା ଦେଇଛନ୍ତି। ପ୍ରସ୍ତାବ ଅନୁଯାୟୀ, ୧,୮୦୮ କୋଟି ଟଙ୍କା ବ୍ୟୟରେ ୨୦୨୫-୨୬ ସୁଦ୍ଧା ଏକ ସେକ୍ଟର ହେଡ୍କ୍ୱାର୍ଟର ପ୍ରତିଷ୍ଠା କରାଯିବ। ଏଥିପାଇଁ ୯,୪୦୦ ପଦବୀ ସୃଷ୍ଟି କରାଯିବ। ଯବାନଙ୍କ ରାଶନ ଓ ଖାଦ୍ୟ ବାବଦକୁ ୯୬୩ କୋଟି ଟଙ୍କା ଖର୍ଚ୍ଚ ହେବ। ୪୭ଟି ନୂଆ ଆଉଟ୍ପୋଷ୍ଟ ଓ ୧୨ ଷ୍ଟେଜିଂ କ୍ୟାମ୍ପ୍ ମଧ୍ୟ ପ୍ରତିଷ୍ଠା କରାଯିବ। ଏହାଫଳରେ ସ୍ବାସ୍ଥ୍ୟ, ପର୍ଯ୍ୟଟନ ଓ ଶିକ୍ଷା କ୍ଷେତ୍ରରେ ନିବେଶ ବଢ଼ିବା ସହ ଶୀତଋତୁରେ ଯୋଗାଣ ଶୃଙ୍ଖଳ ମଜଭୁତ ହେବ। ଯବାନମାନଙ୍କ ଯାତାୟାତ ମଧ୍ୟ ସୁଗମ ହେବ ବୋଲି କେନ୍ଦ୍ରମନ୍ତ୍ରୀ ଠାକୁର କହିଛନ୍ତି।
