ମୁମ୍ବାଇ,୩୧ା୩: ବଲିଉଡ୍ ଅଭିନେତ୍ରୀ ଶିଳ୍ପା ସେଟ୍ଟୀଙ୍କୁ ବହୁତ ଦିନ ପରେ ସ୍କ୍ରିନ୍ରେ ଦେଖିବାକୁ ମିଳିବ। ତାଙ୍କର ଆଗାମୀ ଫିଲ୍ମ ‘ନିକମ୍ମା’ ଚଳିତବର୍ଷ ରିଲିଜ ହେବ। ଏନେଇ ପ୍ରଶଂସକମାନେ ବହୁତ ଖୁସି ଅଛନ୍ତି। ତେବେ ଫିଲ୍ମଟି ଜୁନ୍ ୧୭ରେ ମୁକ୍ତିଲାଭ କରିବ। ଫିଲ୍ମରେ ଶିଳ୍ପାଙ୍କ ସହ ଅଭିମନ୍ୟୁ ଦାସାନି ଏବଂ ଶିର୍ଲି ସେଟିଆଙ୍କୁ ମଧ୍ୟ ଦେଖିବାକୁ ମିଳିବ। ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି ସବୀର ଖାନ୍।
ଫିଲ୍ମ ସମୀକ୍ଷକ ତରୁଣ ଆଦର୍ଶ ସୋସିଆଲ ମିଡିଆ ଜରିଆରେ ‘ନିକମ୍ମା’ର ରିଲିଜ ତାରିଖ ବିଷୟରେ ସୂଚନା ଦେଇଛନ୍ତି। ଏକ ପୋଷ୍ଟ ଶେୟାର କରି ଶିଳ୍ପାଙ୍କ ଫିଲ୍ମ ଆକ୍ସନ, ରୋମାନ୍ସ ଏବଂ କମେଡିରେ ପରିପୂର୍ଣ୍ଣ ହୋଇ ସିଲ୍ଭର ସ୍କ୍ରିନ୍ରେ ଏକ ସମ୍ପୂର୍ଣ୍ଣ ପ୍ୟାକେଜ ସହିତ ଦର୍ଶକଙ୍କୁ ମନୋରଞ୍ଜନ କରିବାକୁ ପ୍ରସ୍ତୁତ ହୋଇଛି ବୋଲି ଲେଖିଛନ୍ତି। ସୋନି ପିକ୍ଚର୍ସ ଫିଲ୍ମ ଇଣ୍ଡିଆ ଏବଂ ସବୀର ଖାନ ଫିଲ୍ମ ଦ୍ୱାରା ‘ନିକମ୍ମା’ ନିର୍ମିତ।
ଦୀର୍ଘଦିନ ପରେ ଶିଳ୍ପାଙ୍କୁ ସିଲ୍ଭର ସ୍କ୍ରିନ୍ରେ ଦେଖିବାକୁ ମିଳିବ। ଶିଳ୍ପା ମଧ୍ୟ ଫିଲ୍ମକୁ ନେଇ ବହୁତ ଖୁସି ଅଛନ୍ତି ବୋଲି କହିଛନ୍ତି। ନିକଟରେ ଏକ ସାକ୍ଷାତକାରରେ କହିଥିଲେ, ମୁଁ ଖୁସି ଯେ, ମୋ ଫିଲ୍ମ ‘ନିକମ୍ମା’ର ରିଲିଜ ତାରିଖ ସ୍ଥିର ହୋଇଛି। ମୁଁ ଭିନ୍ନ ଏକ ଅବତାରରେ ଦର୍ଶକଙ୍କ ସାମ୍ନାକୁ ଆସୁଛି। ଜଣେ ଅଭିନେତ୍ରୀ ଭାବରେ ୧୫ ବର୍ଷର ବିରତି ପରେ ପ୍ରେକ୍ଷାଳୟକୁ ଫେରିବା ବହୁତ ଭଲ ବୋଲି ସେ କହିଛନ୍ତି।
