ବେଜିଂ,୧୧।୪: ପାକିସ୍ତାନ ତେହରିକ୍-ଏ-ଇନଶାଫ୍(ପିଟିଆଇ) ଅଧ୍ୟକ୍ଷ ଇମ୍ରାନ ଖାନ୍ ପ୍ରଧାନମନ୍ତ୍ରୀ ଥିବାବେଳେ ଚାଇନା ସହିତ ଅଧିକ ଘନିଷ୍ଠତା ବଢାଇଥିଲେ, ଆଜି ସେହି ଚାଇନା ଇମ୍ରାନଙ୍କ କ୍ଷମତାରୁ ବିଦାୟ ନେଇ ଖୁସି ବ୍ୟକ୍ତ କରୁଛି। ଇମ୍ରାନଙ୍କୁ କ୍ଷମତାରୁ ହଟାଯିବା ପରେ ଶେହଓ୍ବାଜ୍ ଶରିଫଙ୍କ ନୂତନ ପ୍ରଧାନମନ୍ତ୍ରୀ ହେବାର ଆଶା ରହିଛି। ଚାଇନା ଗଣମାଧ୍ୟମ ଖୁସି ବ୍ୟକ୍ତ କରି କହିଛି ଯେ, ଖାନଙ୍କ ଅପେକ୍ଷା ଶେହଓ୍ବାଜ୍ଙ୍କ ଶାସନ କାଳରେ ଚାଇନା ଏବଂ ପାକିସ୍ତାନ ମଧ୍ୟରେ ସମ୍ପର୍କ ଅଧିକ ଭଲ ହୋଇପାରିବ।
ଚାଇନା ସରକାରଙ୍କ ଦ୍ୱାରା ପରିଚାଳିତ ‘ଗ୍ଲୋବାଲ ଟାଇମ୍ସ’ର ଏକ ସ୍ତମ୍ବରେ କୁହାଯାଇଛି, ସୋମବାର ସଂସଦ ବୈଠକକ ପରେ ତିନିଥର ପାକିସ୍ତାନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ସାନଭାଇ ଶେହଓ୍ବାଜ୍ ସରକାର ଗଠନ ପ୍ରକ୍ରିୟା ଆରମ୍ଭ କରିବେ। ଚାଇନା ଏବଂ ପାକିସ୍ତାନୀ ବିଶ୍ଳେଷକମାନେ ବିଶ୍ୱାସ କରନ୍ତି ଯେ, ପାକିସ୍ତାନର ଆଭ୍ୟନ୍ତରୀଣ ରାଜନୈତିକ ପରିବର୍ତ୍ତନ ଦ୍ୱାରା ଚାଇନା ଏବଂ ପାକିସ୍ଥାନ ମଧ୍ୟରେ ଥିବା ଦୃଢ ସମ୍ପର୍କ ପ୍ରଭାବିତ ହେବ ନାହିଁ। ଇମ୍ରାନ ଖାନଙ୍କ ସମ୍ଭାବ୍ୟ ଉତ୍ତରାଧିକାରୀ ଶରିଫ ପରିବାରରୁ ଆସିଛନ୍ତି, ଯାହା ଦୀର୍ଘ ଦିନ ଧରି ଚାଇନା-ପାକିସ୍ତାନ ସମ୍ପର୍କକୁ ପ୍ରୋତ୍ସାହିତ କରିଆସୁଛି। ଏଭଳି ପରିସ୍ଥିତିରେ ବର୍ତ୍ତମାନ ଇମ୍ରାନ ଖାନଙ୍କ ତୁଳନାରେ ଦୁଇ ଦେଶ ମଧ୍ୟରେ ସହଯୋଗ ଆହୁରି ଭଲ ହୋଇପାରିବ।
ନୱାଜ ସରିଫଙ୍କ ନେତୃତ୍ୱାଧୀନ ସରକାର ସମୟରେ ଦୁଇ ଦେଶ ମଧ୍ୟରେ ୬୦ ବିଲିୟନ ଡଲାରର ଚାଇନା-ପାକିସ୍ତାନ ଅର୍ଥନୈତିକ କରିଡର (ସିପିଇସି) କିପରି ଭଲ ଅଗ୍ରଗତି କରିଥିଲା ତାହା ଏହି ରିପୋର୍ଟରେ ବର୍ଣ୍ଣନା କରାଯାଇଛି।
