ନୂଆଦିଲ୍ଲୀ, ୧୭। ୯(ପି.ଟି.)
ୟୁନାଇଟେଡ କିଙ୍ଗ୍ଡମ୍(ୟୁକେ)ରେ ଅଟକ ରହିଥିବା ଭାରତର ମୁଖ୍ୟ କୋଚ୍ ରବି ଶାସ୍ତ୍ରୀ, ଫିଲ୍ଡିଂ କୋଚ୍ ଭରତ ଅରୁଣ ଓ ଆର. ଶ୍ରୀଧର ପ୍ରମୁଖ କୋଭିଡ୍ରୁ ଆରୋଗ୍ୟ ଲାଭ କରିବା ପରେ ‘ଫିଟ୍ ଟୁ ଫ୍ଲାଏ’ ଟେଷ୍ଟ ଦେବାକୁ ପଡ଼ିବ। ଏଥିରେ ଉତ୍ତୀର୍ଣ୍ଣ ହେବା ପରେ ଯାଇ ସେମାନେ ସ୍ବଦେଶ ଫେରିପାରିବେ। ସୂଚନାଯୋଗ୍ୟ, ଏହି ୩ଜଣ କରୋନା ସଂକ୍ରମିତ ଥିବା ଜଣାପଡ଼ିବା ପରେ ଗତ ସପ୍ତାହରେ ମାଞ୍ଚେଷ୍ଟରରେ ଇଂଲଣ୍ଡ ବିପକ୍ଷ ୫ମ ଟେଷ୍ଟ ମ୍ୟାଚକୁ ବାତିଲ କରିବାକୁ ପଡ଼ିଥିଲା। ୟୁକେ ସ୍ବାସ୍ଥ୍ୟ ପ୍ରୋଟୋକଲ ଅନୁସାରେ ସେମାନେ ୧୦ ଦିନ ଆଇସୋଲେଶନ ଶେଷ କରିଛନ୍ତି। ସେମାନଙ୍କ ସ୍ବାସ୍ଥ୍ୟାବସ୍ଥାରେ ଉନ୍ନତି ଘଟିଛି। ହେଲେ ନେଗେଟିଭ ଆରଟି-ପିସିଆର୍ ରିପୋର୍ଟ ବ୍ୟତୀତ ସ୍ବାସ୍ଥ୍ୟ ପ୍ରୋଟୋକଲ ଅନୁସାରେ ସିଟି ସ୍କାନରେ ୩୮ରୁ ଅଧିକ ସ୍କୋର କରିପାରିଲେ ଯାଇ ସେମାନଙ୍କୁ ‘ଫିଟ୍ ଟୁ ଫ୍ଲାଏ ’ସାର୍ଟିଫିକେଟ ମିଳିବ। ସବୁ ଠିକ୍ଠାକ୍ ରହିଲେ ଆସନ୍ତା ଦୁଇ ଦିନ ଭିତରେ ସେମାନେ ସ୍ବଦେଶ ଫେରିପାରନ୍ତ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଜଣେ ଅଫିସିଆଲ ନାମ ଗୋପନ ରଖିବା ସର୍ତ୍ତରେ ସୂଚନା ଦେଇଛନ୍ତି। ସିଟି ସ୍କାନ ଦ୍ୱାରା କରୋନା ଯୋଗୁ ଫୁସ୍ଫୁସ୍ କେତେ ପରିମାଣରେ ପ୍ରଭାବିତ ହୋଇଛି ତାହା ଜଣାପଡ଼ିବ। ଏହି ୩ଜଣ ଭାରତୀୟ କୋଚ୍ଙ୍କ ନିକଟରେ ବର୍ତ୍ତମାନ କରୋନା ରୋଗର କୌଣସି ଲକ୍ଷଣ ନାହିଁ। ସେମାନେ ଫିଟ୍ ଥିବା ମଧ୍ୟ ଜଣାପଡ଼ୁଛିି। ସୂଚନାଯୋଗ୍ୟ, ଓଭାଲଠାରେ ଚତୁର୍ଥ ଟେଷ୍ଟର ତୃତୀୟ ଦିବସରେ ଶାସ୍ତ୍ରୀ କରୋନା ପଜିଟିଭ ଚିହ୍ନଟ ହୋଇଥିଲେ। ଅରୁଣ ଓ ଶ୍ରୀଧର ତାଙ୍କ ସଂସ୍ପର୍ଶରେ ଆସିଥିବାରୁ ସେମାନଙ୍କୁ ପ୍ରଥମେ ଆଇସୋଲେଶନରେ ରଖାଯାଇଥିଲା। କୋଭିଡ୍ ଟେଷ୍ଟରେ ସେମାନଙ୍କ ଫଳାଫଳ ପଜିଟିଭ ଆସିଥିଲା। ସମସ୍ତଙ୍କ ୧୦ ଦିନିଆ ଆଇସୋଲେଶନ ମିଆଦ ବୁଧବାର ଶେଷ ହୋଇଛି। ପରେ ଜୁନିୟର ଫିଜିଓ ଯୋଗେଶ ପାରମର କୋଭିଡ୍ ପଜିଟିଭ ଜଣାପଡ଼ିବା ପରେ ଅଧିନାୟକ ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଖେଳାଳିମାନେ ଓଲ୍ଡ ଟ୍ରାଫୋର୍ଡଠାରେ ୫ମ ଟେଷ୍ଟ ମ୍ୟାଚ ଖେଳିବା ଲାଗି ରାଜି ହୋଇ ନ ଥିଲେ। ଫଳରେ ଏହି ମ୍ୟାଚକୁ ବାତିଲ କରିବାକୁ ପଡ଼ିଥିଲା। କୋଚିଂ ଷ୍ଟାଫ୍ଙ୍କ ସଂସ୍ପର୍ଶରେ ରହିଥିବାରୁ ମୁଖ୍ୟ ଫିଜିଓ ନୀତୀନ ପଟେଲ୍ ଆଇସୋଲେଶନରେ ରହିଥିଲେ। ତା’ପରଠାରୁ ପାରମର ଏକମାତ୍ର ଫିଜିଓ ଭାବେ ଭାରତୀୟ ଖେଳାଳିଙ୍କ ଦେଖାଚାହାଁ କରି ଆସୁଥିଲେ। ଶାସ୍ତ୍ରୀଙ୍କ ପୁସ୍ତକ ଉନ୍ମୋଚନ ଉତ୍ସବ ସଂକ୍ରମଣର ଉତ୍ପତ୍ତି ସ୍ଥଳ ବୋଲି ବିଶ୍ୱାସ କରାଯାଇଛି। କାରଣ ଏଥିରେ ବିନା ମାସ୍କରେ ପ୍ରାୟ ୧୫୦ ଅତିଥି ଉପସ୍ଥିତ ଥିଲେ। ସେମାନେ ପରସ୍ପର ସହ ନିର୍ବିଘ୍ନରେ ମିଳାମିଶା କରିଥିଲେ।