ବଲିଉଡ୍ର ବାଦ୍ଶାହା ଶାହାରୁଖ ଖାଁଙ୍କ ସାନପୁଅ ଅବରାମ ସ୍କୁଲରେ ଟାଏକୋଣ୍ଡୋ ପ୍ରତିଯୋଗିତାରେ ସ୍ବର୍ଣ୍ଣପଦକ ଜିତିଛନ୍ତି। ପୁଅର ଏହି ବିଜୟରେ ଶାହାରୁଖ ମଧ୍ୟ ବହୁ ଖୁସି ଥିଲେ ଏବଂ ସେ ନିଜେ ମଞ୍ଚରେ ଅବରାମଙ୍କୁ ଚୁମ୍ବନ ଦେଇଥିଲେ। ଏହି ପ୍ରତିଯୋଗିତାର ଫଟୋଗୁଡ଼ିକ ଭାଇରାଲ ହେବାରେ ଲାଗିଛି।
ନିକଟରେ ଶାହାରୁଖ ତାଙ୍କ ପରିବାର ସହ ଟାଏକୋଣ୍ଡୋ ଟ୍ରେନିଂ ଏକାଡେମୀରେ ପହଞ୍ଚିଥିଲେ। ବଲିଉଡ୍ ଅଭିନେତ୍ରୀ କରିନା କପୁର ଖାଁ ଏବଂ ସୈଫ ଅଲି ଖାଁଙ୍କ ଭଳି ବଲିଉଡ ତାରକା ମଧ୍ୟ ସେଠାରେ ନଜର ଆସିଥିଲେ। ଅବରାମଙ୍କ ବ୍ୟତୀତ ତୈମୁର ଏବଂ କରିସ୍ମାଙ୍କ ପୁଅ କିଆନ ମଧ୍ୟ ଏହି ପ୍ରତିଯୋଗିତାରେ ଭାଗ ନେଇଥିଲେ। ଏହି ପ୍ରତିଯୋଗିତାରେ ଶାହାରୁଖଙ୍କ ପୁଅ ଭଲ ଖେଳ ପ୍ରଦର୍ଶନ କରି ସ୍ବର୍ଣ୍ଣ ପଦକ ଜିତିଥିଲେ।
ଅବରାମଙ୍କୁ ତାଙ୍କ ପିତା ଶାହାରୁଖଙ୍କ ହାତରେ ସ୍ବର୍ଣ୍ଣ ପଦକ ପ୍ରଦାନ କରାଯାଇଥିଲା। ଅବରାମଙ୍କ ପୂର୍ବରୁ ତାଙ୍କ ଭାଇ ଆର୍ଯ୍ୟନ ଏବଂ ଭଉଣୀ ସୁହାନା ମଧ୍ୟ ଟାଏକୋଣ୍ଡୋରେ ଟ୍ରେନିଂ ନେଇଛନ୍ତି।
ଶାହାରୁଖ ଖୁବ୍ ଶୀଘ୍ର ବଡ଼ ପରଦାରେ ପ୍ରତ୍ୟାବର୍ତ୍ତନ କରିବାକୁ ଯାଉଛନ୍ତି। ତାଙ୍କ ଅଭିନୀତ ଫିଲ୍ମ ‘ପଠାନ’ ଆସନ୍ତା ଜାନୁୟାରୀ ୨୫ରେ ମୁକ୍ତିଲାଭ କରିବ। ସିଦ୍ଧାର୍ଥ ଆନନ୍ଦଙ୍କ ନିର୍ଦ୍ଦେଶିତ ଏହି ଫିଲ୍ମରେ ଦୀପିକା ପାଦୁକୋନ ଏବଂ ଜନ ଆବ୍ରାହମ ମଧ୍ୟ ତାଙ୍କ ସହ ନଜର ଆସିବେ।
