ବେଙ୍ଗାଲୁରୁ,୨୧।୪: କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ତଥା ବରିଷ୍ଠ ଭାରତୀୟ ଜନତା ପାର୍ଟି (ଭାଜପା) ନେତା ଅମିତ ଶାହା ଶୁକ୍ରବାର ଦୁଇ ଦିନିଆ କର୍ନାଟକ ଗସ୍ତରେ ଯିବେ। ଏହି ଗସ୍ତ ସମୟରେ ଶାହା ବେଙ୍ଗାଲୁରୁ ଉପକଣ୍ଠରେ ଥିବା ଦେବନହଲ୍ଲୀରେ ଏକ ରୋଡ ଶୋ’ ମଧ୍ୟ କରିବାର କାର୍ଯ୍ୟକ୍ରମ ରହିଛି। ତେବେ ଆସନ୍ତା ମେ’୧୦ରେ ହେବାକୁ ଥିବା କର୍ନାଟକ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ଶାହା ରାଜ୍ୟରେ ଦଳର ପ୍ରସ୍ତୁତି ଉପରେ ମଧ୍ୟ ନଜର ରଖିବେ ବୋଲି ଜଣାପଡିଛି। ନିର୍ବାଚନ ସୂଚୀ ଘୋଷଣା ପରେ ଏହା ତାଙ୍କର ପ୍ରଥମ ରାଜ୍ୟ ଗସ୍ତ।
ସୂଚନାନୁଯାୟୀ, ନିର୍ବାଚନ ପ୍ରସ୍ତୁତି ସମ୍ପର୍କରେ ଶାହା ସାରେ ଦଳର ବରିଷ୍ଠ କାର୍ଯ୍ୟକର୍ତ୍ତାଙ୍କ ସହ ବେଙ୍ଗାଲୁରୁରେ ଏକ ବୈଠକ କରିବେ। ତେବେ ଦିଲ୍ଲୀ ଫେରିବା ପୂର୍ବରୁ ସେ ଏକ ଘରୋଇ ନ୍ୟୁଜ ଚ୍ୟାନେଲ ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ମଧ୍ୟ ଯୋଗ ଦେବାର କାର୍ଯ୍ୟକ୍ରମ ରହିଛି। ଦେବନହଲ୍ଲୀରେ ଶାହା ଭାଜପାର ପି ମୁନିଶାମ୍ପାଙ୍କ ପାଇଁ ପ୍ରଚାର କରିବେ। ମେ’ ୧୦ ରେ ରାଜ୍ୟରେ ମତଦାନ ଅନୁଷ୍ଠିତ ହେବ ଏବଂ ମେ’ ୧୩ରେ ଭୋଟ ଗଣନା ହେବ।
