ବେଙ୍ଗାଲୁରୁ,୧୭।୪ : କର୍ନାଟକ ବିଧାନସଭା ର୍ନିବାଚନ ପୂର୍ବରୁ ହୁବଲି-ଧରୱାଡ ସେଣ୍ଟ୍ରାଲର ବିଧାୟକ ତଥା ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ଶେଟାର ରବିବାର ତାଙ୍କ ପଦରୁ ଇସ୍ତଫା ଦେଇଥିଲେ। ଏନେଇ ତାଙ୍କ ନିଷ୍ପତ୍ତି ପରେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ତାଙ୍କୁ ଦଳ ସହ ଜଡିତ ରଖିବା ପାଇଁ ଏକ ବଡ ପଦବୀ ପ୍ରତିଶୃତି ଦେଇଥିଲେ। ମାତ୍ର ସୋମବାର ସେ କଂଗ୍ରେସରେ ଯୋଗଦେଇଥିଲେ।
ଏନେଇ କର୍ନାଟକ ମୁଖ୍ୟମନ୍ତ୍ରୀ ବାସଭରାଜ ବୋମ୍ମାଇ କହିଛନ୍ତି ଜଗଦୀଶ ଶେଟାର ଏହି ଅଞ୍ଚଳର ଜଣେ ବରିଷ୍ଠ ତଥା ଗୁରୁତ୍ୱପୂର୍ଣ୍ଣ ନେତା। ସେ ସଳ ସହିତ ରହିଥିଲେ ଭଲ ହୋଇଥାନ୍ତା।
ଏହାପୂର୍ବରୁ ଶେଟାର ଅଭିଯୋଗ କରିଥିଲେ, କର୍ନାଟକରେ କିଛି ଭାଜପା ନେତା ଦଳକୁ ଭୁଲ ମାର୍ଗରେ ପରିଚାଳନା କରୁଛନ୍ତି। କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ମୁଖ୍ୟମନ୍ତ୍ରୀ ବୋମ୍ମାଇ ଶେଟାରଙ୍କୁ ତାଙ୍କ ହୁବଲି ସ୍ଥିତ ବାସଭବନରେ ଭେଟିବାକୁ ଯାଇଥିଲେ। ତାଙ୍କ ପରିବାର ସଦସ୍ୟଙ୍କୁ ଟିକେଟ ଦେବା ବ୍ୟତୀତ ଶେଟାରକୁ ଏକ ଗୁରୁତ୍ୱପୂର୍ଣ୍ଣ ପଦବୀ ପ୍ରଦାନ କରିବା ସମ୍ପର୍କରେ କହିଥିଲେ। କିନ୍ତୁ ଶେଟାର ରାଜି ହୋଇ ନ ଥିଲେ। ଭାଜପା ସୂତ୍ର ଅନୁଯାୟୀ, ଧର୍ମେନ୍ଦ୍ର ପ୍ରଧାନ ଏବଂ ମୁଖ୍ୟମନ୍ତ୍ରୀଙ୍କ ପରେ ଦଳର ବରିଷ୍ଠ ନେତାମାନେ ମଧ୍ୟ ଶେଟାରଙ୍କୁ ଭେଟି ତାଙ୍କୁ ରାଜ୍ୟପାଳ କିମ୍ବା କେନ୍ଦ୍ର ମନ୍ତ୍ରୀ ପଦ ପ୍ରଦାନ କରିବା ବିଷୟରେ କହିଥିଲେ କିନ୍ତୁ ଶେଟାର ଏହାକୁ ପ୍ରତ୍ୟାଖ୍ୟାନ କରିଥିଲେ।
ଶେଟାର କହିଥିଲେ ମୁଁ କେବଳ ମୋ ନିର୍ବାଚନମଣ୍ଡଳୀରେ ଜଣେ ବିଧାୟକ ଭାବରେ କାମ କରିବାକୁ ଚାହୁଁଛି। ଏହା ବ୍ୟତୀତ ମୁଁ କୌଣସି ବଡ ପଦବୀ ପାଇଁ ଇଚ୍ଛା କରେ ନାହିଁ। ମୁଁ ବର୍ତ୍ତମାନ ଦଳରୁ ଇସ୍ତଫା ଦେବାକୁ ନିଷ୍ପତ୍ତି ନେଇଛି। ସେମାନେ ମୋତେ ଟିକେଟ ମଧ୍ୟ ଦେଲେ ବି ମୁଁ ମୋର ନିଷ୍ପତ୍ତି ପରିବର୍ତ୍ତନ କରିବି ନାହିଁ।
