ଢେଙ୍କାନାଳ ଅଫିସ, ୧୪।୮ ରାଜ୍ୟର ପ୍ରସିଦ୍ଧ ଶୈବକ୍ଷେତ୍ର କପିଳାସ ପୀଠ ପାଇଁ ଶୁକ୍ରବାର ଥିଲା ଐତିହାସିକ ଦିନ। କାରଣ ଦୀର୍ଘ ୭୦ବର୍ଷ ପରେ ଅନୁଷ୍ଠିତ ହୋଇଥିଲା ମହାପ୍ରଭୁ ଶ୍ରୀଚନ୍ଦ୍ରଶେଖରଙ୍କ ସୁବର୍ଣ୍ଣ ନାଗାଭରଣ ବେଶ। ସୁନାର ପଞ୍ଚବକ୍ର ମୁକୁଟ ପରିଧାନ କରି ଶ୍ରୀଜୀଉ ଝଲସି ଉଠିଥିବାବେଳେ ପରମ୍ପରା ଅନୁଯାୟୀ ସ୍ବତନ୍ତ୍ର ନୀତିକାନ୍ତି ଅନୁଷ୍ଠିତ ହୋଇଥିଲା। ରାଜ ପରିବାର ପକ୍ଷରୁ ପରମ୍ପରା ଅନୁଯାୟୀ ଯୁବରାଜ ଅମରଜ୍ୟୋତି ସିଂଦେଓ ପ୍ରଥମେ ଏବଂ ଏହାପରେ ଜିଲାପାଳ ଭୂମେଶ ଚନ୍ଦ୍ର ବେହେରା ପୂଜାର୍ଚ୍ଚନା କରିଥିଲେ।
ମହାପ୍ରଭୁ ଚନ୍ଦ୍ରଶେଖର ଅମାପ ସମ୍ପତ୍ତିର ଅଧିକାରୀ। ପୂର୍ବରୁ ଶ୍ରୀଜୀଉଙ୍କ ସୁବର୍ଣ୍ଣ ଅଳଙ୍କାର ବେଶ ଅନୁଷ୍ଠିତ ହେଉଥିବା ଇତିହାସ କୁହେ। ତେବେ ୭୦ ବର୍ଷ ତଳେ ଠାକୁରଙ୍କ ସୁବର୍ଣ୍ଣ ପଞ୍ଚବକ୍ର ମୁକୁଟ ଚୋରି ହୋଇଯାଇଥିଲା। ସେହିଦିନଠାରୁ ସ୍ବତନ୍ତ୍ର ଦିବସରେ ଅନୁଷ୍ଠିତ ନାଗାଭରଣ ବେଶରେ ମହାପ୍ରଭୁ ରୁପା ମୁକୁଟ ପରିଧାନ କରୁଥିଲେ। ନବନିର୍ମିତ ସୁବର୍ଣ୍ଣ ମୁକୁଟ ୧କେଜି ୯୧୦ ଗ୍ରାମ ସୁନାରେ ନିର୍ମିତ ହୋଇଛି, ଯାହାର ମୂଲ୍ୟ ପ୍ରାୟ ୧କୋଟି ୩୦ଲକ୍ଷ ଟଙ୍କା। ଏଥିଲାଗି ପ୍ରଶାସନ ପକ୍ଷରୁ ଦାନ ସଂଗ୍ରହ ଅଭିଯାନ ଆରମ୍ଭ ହୋଇଥିଲା। ଶ୍ରଦ୍ଧାଳୁମାନେ ମୁକ୍ତ ହସ୍ତରେ ସୁନା, ଅର୍ଥ ଦାନ କରିଥିଲେ। ଜିଲାପାଳ ବେହେରାଙ୍କ ତତ୍ତ୍ୱାବଧାନ ଏବଂ ଜିଲା ଦେବୋତ୍ତର ବିଭାଗ ଉଦ୍ୟମରେ ପଞ୍ଚବକ୍ର ସୁନା ମୁକୁଟ ତିଆରି ହୋଇଛି। ପୁଷ୍ପାଭିଷେକ, ଜାଗର ଯାତ୍ରା ଏବଂ ମକର ସଂକ୍ରାନ୍ତି ଅବସରରେ ଠାକୁରଙ୍କ ନାଗାଭରଣ ବେଶ ଅନୁଷ୍ଠିତ ହୋଇଥାଏ। ଏଣିକି ସମ୍ପୃକ୍ତ ସ୍ବତନ୍ତ୍ର ଦିବସରେ ମହାଦେବ ସୁନାମୁକୁଟରେ ଶ୍ରଦ୍ଧାଳୁଙ୍କୁ ଦର୍ଶନ ଦେବେ। ଶୁକ୍ରବାର କୋଭିଡ୍ କଟକଣା ମଧ୍ୟରେ ଶ୍ରୀଜୀଉଙ୍କ ନୀତିକାନ୍ତି ଅନୁଷ୍ଠିତ ହୋଇଥିଲା। ଏହାପରେ ନାଗାଭରଣ ବେଶରେ ମହାପ୍ରଭୁ ଦର୍ଶନ ଦେଇଥିଲେ।
ଆୟୋଜିତ କାର୍ଯ୍ୟକ୍ରମରେ ଖଣିମନ୍ତ୍ରୀ ପ୍ରଫୁଲ୍ଲ କୁୁମାର ମଲ୍ଲିକ, ଏସ୍ପି କେ. ଶିବା ସୁବ୍ରମଣୀ, ଅତିରିକ୍ତ ଜିଲାପାଳ ଶଶାଙ୍କ ଶେଖର ଦାସ, ଜିଲା ବନଖଣ୍ଡ ଅଧିକାରୀ ଡ. ପ୍ରକାଶଚାନ୍ଦ ଗୋଗିନେନିଙ୍କ ସମେତ ବିଭାଗୀୟ ଅଧିକାରୀ ଉପସ୍ଥିତ ଥିଲେ। ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ତଥା ଜିଲା ଦେବୋତ୍ତର ଅଧିକାରୀ ସାଫଲ୍ୟ ମଣ୍ଡିତ ପ୍ରଧାନ ସମସ୍ତ କାର୍ଯ୍ୟ ତଦାରଖ କରିଥିଲେ। ଏହି ଅବସରରେ ପ୍ରସାଦ ସେବନ ଅନୁଷ୍ଠିତ ହୋଇଥିଲା। ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା।
୩ମାସ ତଳେ ହୋଇଥିଲା ନିଷ୍ପତ୍ତି
ଦୀର୍ଘବର୍ଷ ପରେ ଶ୍ରୀ ଚନ୍ଦ୍ରଶେଖରଙ୍କ ନାଗାଭରଣ ବେଶ ଅନୁଷ୍ଠିତ ହୋଇଛି। ଏଥିଲାଗି ୩ ମାସ ତଳେ ଜିଲା ପ୍ରଶାସନ ଏବଂ ଦେବୋତ୍ତର ବିଭାଗ ପକ୍ଷରୁ ନିଷ୍ପତ୍ତି ନିଆଯାଇଥିଲା। ଜିଲା ଓ ରାଜ୍ୟର ବହୁ ଶ୍ରଦ୍ଧାଳୁ ଏଥିରେ ସହାୟତା କରିଛନ୍ତି। ସୁବର୍ଣ୍ଣ ପଞ୍ଚବକ୍ର ମୁକୁଟ ମହାପ୍ରଭୁଙ୍କୁ ସମର୍ପଣ କରାଯାଇଛି।
-ଅମରଜ୍ୟୋତି ସିଂଦେଓ, ଢେଙ୍କାନାଳ ଯୁବରାଜ
ସମସ୍ତଙ୍କ ସହଯୋଗରୁ ସମ୍ଭବ ହୋଇଛି
ସୁନାମୁକୁଟ ଚୋରି ହୋଇଯିବା ପରେ ୧୯୫୦ ପରଠାରୁ ଠାକୁରଙ୍କ ସୁବର୍ଣ୍ଣ ନାଗାଭରଣ ବେଶ ବନ୍ଦ ରହିଥିଲା। ଏହା ଜଣାପଡ଼ିବା ପରେ ପୁନର୍ବାର ସୁନା ଅଳଙ୍କାର ଲାଗି ନାଗାଭରଣ ବେଶ କରିବା ପାଇଁ ଚିନ୍ତା କରାଯାଇଥିଲା। ସମସ୍ତଙ୍କ ସହଯୋଗରେ ଏହା ସମ୍ଭବପର ହୋଇପାରିଛି।
-ଭୂମେଶ ଚନ୍ଦ୍ର ବେହେରା, ଜିଲାପାଳ
ବିଦେଶରୁ ମଧ୍ୟ ସହାୟତା ମିଳିଛି
ଜିଲା ଦେବୋତ୍ତର ବିଭାଗ ପାଇଁ ଏହା ହେଉଛି ଐତିହାସିକ ଦିନ। ଗତ ଜାଗର ଯାତ୍ରା ପରେ ଠାକୁରଙ୍କ ସୁବର୍ଣ୍ଣ ନାଗାଭରଣ ବେଶ କରିବା ଲାଗି ନିଷ୍ପତ୍ତି ନିଆଯାଇଥିଲା। ଠାକୁରଙ୍କ ମୁକୁଟ ଲାଗି ଜିଲା, ରାଜ୍ୟ ସମେତ ଦେଶବିଦେଶରୁ ସହାୟତା ମିଳିଛି। ଦାତାଙ୍କ ୫୦ ପ୍ରତିଶତ ଏବଂ ଦେବୋତ୍ତର ବିଭାଗର ୫୦ ପ୍ରତିଶତ ଅର୍ଥରେ ଏହାକୁ ନିର୍ମାଣ କରାଯାଇଛି।
-ସାଫଲ୍ୟ ମଣ୍ଡିତ ପ୍ରଧାନ, ଜିଲା ଦେବୋତ୍ତର ଅଧିକାରୀ
