ହାଟଡିହୀ/ଛେନାପଦୀ,୩୦l୮(ଶୁଭକାନ୍ତ ନାୟକ/ନିରାକାର ପରିଡା): ଚାଷୀଙ୍କ ନାମ ପଞ୍ଜୀକରଣର ସମୟ ସୀମା ସରକାର ଆଉ ୭ ଦିନ ବୃଦ୍ଧି କରିଛନ୍ତି। କିନ୍ତୁ ସର୍ଭର ଡାଉନ ଥିବାରୁ ଚାଷୀ ନାମ ପଞ୍ଜୀକରଣ ପାଇଁ କଲବଲ ହେଉଛନ୍ତି। ଦୀର୍ଘ ଘଣ୍ଟା ଧରି ଲମ୍ବା ଧାଡିରେ ଠିଆ ହୋଇ ରହୁଛନ୍ତି। ଏପରିକି ବିଳମ୍ବିତ ରାତି ପର୍ଯ୍ୟନ୍ତ ମଧ୍ୟ ନାମ ପଞ୍ଜୀକରଣ କାର୍ଯ୍ୟ ଚାଲୁଛି। କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ ଅଞ୍ଚଳରେ ଏପରି ପରିସ୍ଥିତି ସୃଷ୍ଟି ହୋଇଛି।
ପ୍ରକାଶ ଯେ, ମରୈଗାଁ ସେବା ସମବାୟ ସମିତିରେ ଗତ ବର୍ଷ ୧୮୫୩ ଜଣ ଚାଷୀ ନାମ ପଞ୍ଜୀକରଣ କରିଥିଲେ। ଚଳିତ ବର୍ଷ ଅଦ୍ୟାବଧି ପ୍ରାୟ ୨୧୦୦ ଜଣ ଚାଷୀ ପଞ୍ଜୀକରଣ ପାଇଁ ଫର୍ମ ଦାଖଲ କରିଛନ୍ତି। ସେଥିରୁ ୧୫୦୩ ଜଣ ଚାଷୀଙ୍କ ନାମ ପଞ୍ଜୀକରଣ ହୋଇପାରିଛି। ସର୍ଭରରେ ବାରମ୍ବାର ଡାଉନ ରହୁଥିବାରୁ ପଞ୍ଜୀକରଣ ପ୍ରକ୍ରିୟା ବିଳମ୍ବ ହେଉଛି।
ଦୈନିକ ପାଖାପାଖି ୫୦ ରୁ ୬୦ ଜଣ ଚାଷୀଙ୍କ ନାମ ପଞ୍ଜିକରଣ ହୋଇପାରୁଛି। ଫଳରେ ଧାର୍ଯ୍ୟ ସମୟ ମଧ୍ୟରେ ସମସ୍ତ ଚାଷୀଙ୍କ ପଞ୍ଜୀକରଣ ହେବା ଚିନ୍ତାର କାରଣ ସାଜିଛି। ସେହିପରି ରମ୍ପାସ ସମିତିରେ ୮୦୦ରୁ ଊର୍ଦ୍ଧ୍ୱ ଚାଷୀ ପଞ୍ଜୀକରଣ କରିବାକୁ ଥିବା ବେଳେ ଆହୁରି ୨ ଶହ ଚାଷୀ ପଞ୍ଜୀକରଣ କରିପାରି ନାହାନ୍ତି। ଚାଷୀଙ୍କ କହିବା ଅନୁଯାୟୀ, ଗତ ୨ରୁ ୩ ଦିନ ହେଲା ସେମାନେ ସମିତିକୁ ଆସି ଦୀର୍ଘ ସମୟ ଧରି ଲମ୍ବା ଧାଡିରେ ଠିଆ ହୋଇ ଅପେକ୍ଷା କରୁଛନ୍ତି। ଅନେକ ଚାଷୀ ରାତି ପର୍ଯ୍ୟନ୍ତ ଅପେକ୍ଷା କରି ମଧ୍ୟ ପଞ୍ଜୀକରଣ ହୋଇ ନ ପାରିବାରୁ ନିରାଶ ହୋଇ ଫେରୁଛନ୍ତି।
ଅପରପକ୍ଷେ ଚାଷୀଙ୍କ ଭିଡ଼କୁ ଦୃଷ୍ଟିରେ ରଖି ବିଭିନ୍ନ ସମିତି ପକ୍ଷରୁ ଅଧିକ କର୍ମଚାରୀଙ୍କୁ ନିୟୋଜିତ କରାଯାଇଛି। ମାତ୍ର ସର୍ଭର ଡାଉନ ଯୋଗୁ ପଞ୍ଜୀକରଣ କାର୍ଯ୍ୟରେ ବାରମ୍ବାର ବାଧା ସୃଷ୍ଟି ହେଉଛି। ମରୈଗାଁ ସେବା ସମବାୟ ସମିତିର ସମ୍ପାଦକ ଶରତ ସେଠୀ କହିଛନ୍ତି, ରାତି ଦିନ ଲାଗି ପଞ୍ଜୀକରଣ କାର୍ଯ୍ୟ କରାଯାଉଛି। ସର୍ଭର ଡାଉନ ପାଇଁ ନାନା ସମସ୍ୟାର ସମ୍ମୁଖୀନ ହେବାକୁ ପଡୁଛି। ନାମ ପଞ୍ଜୀକରଣ ସମୟ ସୀମା ବୃଦ୍ଧି ନେଇ କୌଣସି ସରକାରୀ ନିର୍ଦ୍ଦେଶ ପତ୍ର ତାଙ୍କର ହସ୍ତଗତ ହୋଇନି।
