କେନ୍ଦୁଝର,୨୮ା୫(ସ୍ବ.ପ୍ର.): ଟାଉନ ଥାନା ଅନ୍ତର୍ଗତ ବଡ଼ହଳ ଅଞ୍ଚଳରେ ୧୦ ଡେସିମିଲି ଜମିକୁ ଦୁଇଥର ବିକ୍ରି କରାଯାଇଥିବା ନେଇ ଥାନାରେ ଅଭିଯୋଗ ହୋଇଛି। ଖାତା ନମ୍ବର ୪୫ର ପ୍ଲଟ୍ ନମ୍ବର ୨୬୩ରେ ଏହି ବେଆଇନ ବିକ୍ରି ହୋଇଥିବା ଅଭିଯୋଗ ହୋଇଛି। ଜାଲ୍ କାଗଜପତ୍ର କରି ଏହି ଜମି ବିକ୍ରି ହୋଇଥିବା ମାଧପୁର ଅଞ୍ଚଳର କୁମୁଦିନୀ ବାରିକ ଥାନାରେ ଲିଖିତ ଅଭିଯୋଗ କରିଛନ୍ତି। ତେବେ ପୋଲିସ ତଦନ୍ତ ପରେ ସତ୍ୟାସତ୍ୟ ଜଣାପଡ଼ିବ।
ମିଳିଥିବା ସୂଚନାନୁଯାୟୀ ଉକ୍ତ ପ୍ଲଟ୍ରୁ ୨୫ ଡେସିମିଲି ଜମିର ପତ୍ତା ମିଳିଲା ନାହିଁ। ପରେ ଏନେଇ ଜମିର ଇସି ଜିଲା ସବ୍ ରେଜିଷ୍ଟ୍ରାରରୁ ବାହାର କରିବା ପରେ ଏଭଳି ବେଆଇନ କାମ ହୋଇଥିବା ଜଣାପଡ଼ିଥିଲା। ସହରରେ ଜମି କାରବାର କରୁଥିବା ଜଣେ ପ୍ରଭାବଶାଳୀ ଲୋକ ଏଥିରେ ସାମିଲ ଥିବାରୁ ଏହି ବେଆଇନ କାମ ସମ୍ଭବ ହୋଇଛି। ଏହି ଦୁଇଟି କବଲାରେ ବିକିବା ଓ କିଣିବା ଲୋକ ସମାନ ରହିଛି। ଏଣୁ ଏହାର ତଦନ୍ତ ହେବା ଜରୁରୀ। ନଚେତ୍ ବାଧ୍ୟ ହୋଇ କୋର୍ଟର ଆଶ୍ରୟ ନେବେ ବୋଲି ତାଙ୍କ ଓକିଲ ଗୁଲାମ ସରଓନ ରାଇନ କହିଛନ୍ତି। ଏପରିକି ଗୋଟିଏ କବଲାର ଜମିର କିସମ ବଦଳାଯାଇ ଘରବାଡ଼ି କରାଯାଇଥିବା ଗୁଲାମ ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ ଉକ୍ତ ପ୍ଲଟର ୧୦ ଡେସିମିଲ ଜମିରୁ ୫ ଡେସିମିଲି ଜମି ପୂର୍ବରୁ ବିକ୍ରି ହୋଇଥିଲା। ପରବର୍ତ୍ତୀ ସମୟରେ ବେଆଇନ ଭାବରେ ଉକ୍ତ ଜମିକୁ ଦୁଇଥର ଭିନ୍ନ ଭିନ୍ନ ତାରିଖରେ ୧୦ ଡେସିମିଲି କବଲା କରାଯାଇଥିବା ଅଭିଯୋଗ ହୋଇଛି। ଉକ୍ତ ଜମିର ଗୋଟିଏ କବଲା (ଆରଏସ୍ଡି ନମ୍ବର ୧୧୦୦୨୦୦୧୧୫୦ ତା ୨୦-୧୦-୨୦୨୦)ରେ ୧୧ ଲକ୍ଷ ଟଙ୍କା ଓ ସମାନ ଜମିର ଅନ୍ୟ ଏକ କବଲା (ଆର୍ଏସ୍ଡି ନମ୍ବର ୧୧୦୦୨୦୦୪୦୫ ତା ୨୨-୨-୨୦୨୨) ଅର୍ଥାତ୍ ପ୍ରାୟ ଦେଢ଼ ବର୍ଷ ପରେ ୨୭ ଲକ୍ଷ ୫୦ ହଜାର ଟଙ୍କାରେ କିଣାବିକା ହୋଇ ପ୍ରସ୍ତୁତ ହୋଇଥିବା ଜଣାପଡ଼ିଛି। ଅର୍ଥାତ୍ ସମାନ ଜମିକୁ ଦୁଇଟି କବଲାରେ ୨୦ ଡେସିମିଲି ଜମି ଭାବରେ କିଣାବିକା ହୋଇଥିବା ଅଭିଯୋଗ ହୋଇଛି। ତେବେ ଏନେଇ କିପରି ତହସିଲ କର୍ତ୍ତୃପକ୍ଷ କିମ୍ବା ସବ୍ରେଜିଷ୍ଟ୍ରାର ଜାଣିପାରିଲେ ନାହିଁ ସେନେଇ ସନ୍ଦେହ ସୃଷ୍ଟି ହୋଇଥିବା ବେଳେ ଏହା ପଛରେ ବଡ଼ ର଼୍ୟାକେଟ କାମ କରୁଥିବାରୁ ଏହାର ତଦନ୍ତ କ୍ରାଇମ୍ ବ୍ରାଞ୍ଚ ଦ୍ୱାରା କରିବାକୁ ଗୁଲାମ ଦାବି କରିଛନ୍ତି।
