ମୁମ୍ବାଇ,୨୧।୪: ଆଇପିଏଲ ୨୦୨୨ ପୂର୍ବରୁ ଦକ୍ଷିଣ ଆଫ୍ରିକାର ପୂର୍ବତନ ଖେଳାଳି ଏବି ଡି ଭିଲିୟର୍ସ କ୍ରିକେଟ ଛାଡିବାକୁ ଘୋଷଣା କରିଥିଲେ। ଏହା ପରେ ତାଙ୍କୁ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳରେ ରଖାଯାଇ ନ ଥିଲା। ଚଳିତବର୍ଷ ଖେଳୁ ନ ଥିଲେ ମଧ୍ୟ ସେ ହୃଦୟରୁ ବେଙ୍ଗାଲୁରୁକୁ ସମର୍ଥନ କରୁଛନ୍ତି। ଏବେ ସେ ପୁଣିଥରେ ଆଇପିଏଲ ଖେଳିବାକୁ ଇଚ୍ଛା ପ୍ରକାଶ କରିଛନ୍ତି। ସେ କହିଛନ୍ତି ଯେ ଚଳିତ ସିଜନରେ ବେଙ୍ଗାଲୁରୁର ଜଣେ ଖେଳାଳିଙ୍କୁ ଦେଖି ସେ ପୁଣି କ୍ରିକେଟ ଖେଳିବାକୁ ଚାହୁଁଛନ୍ତି। ଏହି ଖେଳାଳି ଜଣଙ୍କ ହେଲେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ଉଇକେଟ କିପର ବ୍ୟାଟ୍ସମ୍ୟାନ ଦୀନେଶ କାର୍ତ୍ତିକ। ସେ ୩୭ ବର୍ଷ ବୟସରେ ଚମତ୍କାର ବ୍ୟାଟିଂ କରି ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି। କାର୍ତ୍ତିକ ସେ ୩୭ ବର୍ଷ ବୟସରେପାଇଁ ମ୍ୟାଚ ଫାଇନିସର ଭୂମିକା ଗ୍ରହଣ କରିଛନ୍ତି। ସେ ଏପର୍ଯ୍ୟନ୍ତ ୩୨, ୧୪, ୪୪, ୭, ୩୪, ୬୬ ଏବଂ ୧୩ର ଇନିଂସ ଖେଳିଛନ୍ତି। ଏହି ସମୟରେ କାର୍ତ୍ତିକଙ୍କ ଷ୍ଟ୍ରାଇକ ହାର ୨୦୦ରୁ ଅଧିକ ହୋଇଛି। ସେ ସାତୋଟି ଇନିଂସ ମଧ୍ୟରୁ ୬ଟିରେ ଆଉଟ ହୋଇନାହାଁନ୍ତି। ଏହି ସିଜିନରେ, କାର୍ତ୍ତିକଙ୍କ ହାରାହାରି ୧୯୦ରୁ ଅଧିକ ରହିଛି। ଭାରତୀୟ କ୍ରିକେଟର ସୁନୀଲ ଗାଭାସ୍କର ଦୀନେଶ କାର୍ତ୍ତିକଙ୍କୁ ଚଳିତ ବର୍ଷ ଅକ୍ଟୋବର-ନଭେମ୍ବରରେ ଅଷ୍ଟ୍ରେଲିଆରେ ଆୟୋଜିତ ହେବାକୁ ଥିବା ବିଶ୍ୱକପକୁ ସାମିଲ କରିବାକୁ କହିଥିଲେ।
ଏବେ ଡି ଭିଲିୟର୍ସ କାର୍ତ୍ତିକଙ୍କୁ ପ୍ରଶଂସା କରିଛନ୍ତି। ସେ କହିଛନ୍ତି, ଯେଉଁ ଫର୍ମରେ ସେ ଅଛନ୍ତି, ସେ ଦଳ ପାଇଁ ଦୁଇରୁ ତିନୋଟି ମ୍ୟାଚ ଜିତାଇଛନ୍ତି। ସେ ତାଙ୍କ କ୍ୟାରିୟରର ସର୍ବୋଚ୍ଚ ଫର୍ମରେ ଅଛନ୍ତି। ସେ ଏହି ଆତ୍ମବିଶ୍ୱାସ କେଉଁଠୁ ପାଇଲେ ମୁଁ ଜାଣେ ନାହିଁ, କାରଣ ମଝିରେ ମଝିରେ କାର୍ତ୍ତିକ କ୍ରିକେଟ ଖେଳି ନାହାଁନ୍ତି, କିନ୍ତୁ ତାଙ୍କ ବ୍ୟାଟିଂ ଆଶ୍ଚର୍ଯ୍ୟଜନକ ଏବଂ ସେ ୩୬୦ ଡିଗ୍ରୀ ସଟ୍ ଖେଳିବାରେ ମାଷ୍ଟର ଅଟନ୍ତି। କାର୍ତ୍ତିକ ଖେଳୁଥିବା ଦେଖି ମୋତେ ପୁଣି ବ୍ୟାଟିଂ କରିବାକୁ ଇଚ୍ଛା ହେଉଛି। ସେ ମୋତେ ଉତ୍ସାହିତ କରୁଛନ୍ତି।
