କପ୍ତିପଦା,୨୭ା୬(ଡ଼ି.ଏନ୍.ଏ)- ମୟୂରଭଞ୍ଜ ଜିଲା କପ୍ତିପଦା ତହସିଲ ବଡ଼ଖଲାଡ଼ି ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଅଧୀନରେ ଥିବା ବଡ଼ଖଲାଡ଼ି ମୌଜାର ଆମ୍ବପିଛୁଳା ଶୁଣ୍ଢଳ ବାଲିଘାଟରେ ଚୋରା ବାଲି ଚାଲାଣକୁ ରୋକିବା ପାଇଁ କପ୍ତିପଦା ଉପ ଜିଲାପାଳ ଭଗବାନ ବେହେରାଙ୍କ ନିର୍ଦ୍ଦେଶକ୍ରମେ ୧୪୪ ଧାରା ଜାରି କରାଯାଇଛି। ଖାତା ନଂ. ୨୮୭, ପ୍ଲଟ୍ ନଂ.୧୨୮୬ ସୋନ ନଦୀରେ ଥିବା ୬.୪୭୮୭ ହେକ୍ଟର ସ୍ଥାନରୁ ବେଆଇନ୍ ବାଲି ଚାଲାଣ ଚାଲିଥିବା ଅଭିଯୋଗ ହୋଇଥିଲା। ଏହାକୁ ରୋକିବା ପାଇଁ ଗୁରୁବାର ଡାକବାଜି ଯନ୍ତ୍ର ମାଧ୍ୟମରେ ଉକ୍ତ ସ୍ଥାନରୁ ବାଲିଚାଲାଣ ନ କରିବାକୁ ପ୍ରଚାର କରାଯାଇଥିଲା। ବେଆଇନ ଭାବରେ ଉକ୍ତ ସ୍ଥାନରେ ବାଲି ଚାଲାଣ କରାଗଲେ ଆଇନ ଅନୁଯାୟୀ ଦଣ୍ଡିତ ହେବେ ଏବଂ ନିଲାମ ନ ହେବା ପର୍ଯ୍ୟନ୍ତ ଏହି ୧୪୪ ଧାରା ବଳବତ୍ତର ରହିବ ବୋଲି ତହସିଲ ସୂତ୍ରରୁ ପ୍ରକାଶ। ତହସିଲଦାର ରାଧାରଞ୍ଜନ ଦାସ, ଅତିରିକ୍ତ ତହସିଲଦାର ଲକ୍ଷ୍ମୀଧର ନାୟକ, କପ୍ତିପଦା ଥାନା ଏଏସ୍୍ଆଇ ବି.କେ. ସାହାଣୀ, ରେକର୍ଡ଼ କିପର ଅତନୁ ଦେବଦର୍ଶନ ବେହେରା, ବଡ଼ଖଲାଡ଼ି ଆର୍.ଆଇ. ଭରତ ଚନ୍ଦ୍ର ବେହେରା ପ୍ରମୁଖ ଉପସ୍ଥିତ ଥିଲେ ।
