କାନବେରା,୨୮।୧୨: ଅଷ୍ଟ୍ରେଲିଆନ ପେସର ଆଣ୍ଡ୍ର୍ୟୁ ଟାଏ ଚଳିତ ବିଗ୍ ବାଶ ଲିଗ୍ (ବିବିଏଲ)ରେ କ୍ୟାରିୟରର ଅନଲକି ଓଭର ପକାଇଛନ୍ତି। ପର୍ଥ ସ୍କଚର୍ସ ପାଇଁ ଖେଳୁଥିବା ଟାଏ ମଙ୍ଗଳବାର ସିଡ୍ନୀ ଥଣ୍ଡର ବିପକ୍ଷରେ ଖେଳାଯାଇଥିବା ମ୍ୟାଚ୍ରେ ୧୫ତମ ଓଭରରେ ବୋଲିଂ କରିବାକୁ ଆସିଥିଲେ। ଏହି ଓଭରରେ ଥରେ କି ଦୁଇ ଥର ନୁହେଁ ବାରମ୍ବାର ଦୁର୍ଭାଗ୍ୟଜନକ ଘଟଣା ଘଟିଥିଲା।
ପ୍ରଥମ ବଲକୁ ବ୍ୟାଟର ସାମ ବିଲିଙ୍ଗ୍ସ କଭର ଅଞ୍ଚଳକୁ ଉଠାଇ ମାରିବାକୁ ଉଦ୍ୟମ କରିଥିଲେ। କିନ୍ତୁ ବଲ ଏଜ ନେଇ ତୃତୀୟ ସ୍ଲିପରେ ଛିଡ଼ା ହୋଇଥିବା ଫିଲ୍ଡରଙ୍କ ଉପରେ ଚାଲି ଯାଇଥିଲା। ଦ୍ୱିତୀୟ ବଲରେ ପୁଣି ବ୍ୟାଟର ଏଜ ନେଇ ଚୌକା ହୋଇଯାଇଥିଲା। ଅବଶ୍ୟ ତୃତୀୟ ବଲରେ ମିଳିଥିଲା ଉଇକେଟ। ଚତୁର୍ଥ ବଲକୁ ହାଇଟ୍ ନୋ ବଲ ଦେଇଥିଲେ ଫିଲ୍ଡ ଅମ୍ପାୟର। ପରବର୍ତ୍ତୀ ବଲ ଓ୍ବାଇଡ୍ ଥିଲା। ତା’ ପରେ ପୁଣି ଥରେ ବ୍ୟାଟରଙ୍କ ଅଣ୍ଟା ଉପରକୁ ବଲ ଫୋପାଡ଼ି ଥିଲେ। ଏହାକୁ ମଧ୍ୟ ନୋ ବଲ ଦିଆଯାଇଥିଲା। ଫଳରେ ନିୟମ ଅନୁଯାୟୀ, ବିପଦଜନକ ବୋଲିଂ କାରଣରୁ ତାଙ୍କୁ ଆଉ ବୋଲିଂ କରିବାକୁ ଅମ୍ପାୟର ଅନୁମତି ଦେଇ ନ ଥିଲେ। କିନ୍ତୁ ବ୍ୟାଟିଂରେ କମାଲ କରିଥିଲେ ୩୫ ବର୍ଷୀୟ ଟାଏ। ସେ ମାତ୍ର ୨୫ ବଲରେ ୪୪ ରନ୍ର ବିସ୍ଫୋରକ ଇନିଂସ ଖେଳିଥିଲେ। ତାଙ୍କ ପାଳିରେ ଥିଲା ୩ ଲେଖାଏ ଚୌକା ଓ ଛକା। ଏହାସତ୍ତ୍ୱେ ତାଙ୍କ ଦଳ ପର୍ଥ ସ୍କଚର୍ସ ପରାଜୟରୁ ବର୍ତ୍ତି ପାରି ନ ଥିଲା।
