ନୂଆଦିଲ୍ଲୀ, ୧୯।୬ (ପି.ଟି.): ଶିକ୍ଷା ମନ୍ତ୍ରଣାଳୟ ପକ୍ଷରୁ ବୁଧବାର ଜାରି ହୋଇଥିବା ୨୦୨୩-୨୪ ପର୍ଫମିଂ ଗ୍ରେଡ୍ ଇଣ୍ଡେକ୍ସ (ପିଜିଆଇ) ଅନୁଯାୟୀ, ଶ୍ରେଷ୍ଠ ପ୍ରଦର୍ଶନକାରୀ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକ ମଧ୍ୟରେ ଚଣ୍ଡିଗଡ଼, ପଞ୍ଜାବ, ଦିଲ୍ଲୀ, ଗୁଜରାଟ ଏବଂ ଓଡ଼ିଶା ରହିଛି। ଏହି ରିପୋର୍ଟରେ ସ୍କୁଲ ଶିକ୍ଷା କ୍ଷେତ୍ରରେ ବିଭନ୍ନ ଜିଲାର ପର୍ଫମିଂ ଗ୍ରେଡ୍ ଇଣ୍ଡେକ୍ସ (ପିଜିଆଇ-ଡି) ପଏଣ୍ଟ ଜରିଆରେ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡ଼ିକର ପ୍ରଦର୍ଶନକୁ ମୂଲ୍ୟାଙ୍କନ କରାଯାଇଛି। ଅନ୍ୟାନ୍ୟ ଶ୍ରେଷ୍ଠ ପ୍ରଦର୍ଶନକାରୀ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡ଼ିକ ମଧ୍ୟରେ କେରଳ, ଡାମନ ଏବଂ ଡିଉ, ହରିୟାଣା, ଗୋଆ, ମହାରାଷ୍ଟ୍ର ଏବଂ ରାଜସ୍ଥାନ ରହିଛି। ସ୍କୁଲ ଶିକ୍ଷା କ୍ଷେତ୍ରରେ ମେଘାଳୟ ହେଉଛି ସବୁଠାରୁ ନିମ୍ନ ପ୍ରଦର୍ଶନକାରୀ ରାଜ୍ୟ। ହାରାହାରି ପ୍ରଦର୍ଶନକାରୀ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡ଼ିକ ମଧ୍ୟରେ ପୁଡୁଚେରୀ, ହିମାଚଳ ପ୍ରଦେଶ, ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜ, ତାମିଲନାଡ଼ୁ, କର୍ନାଟକ, ପଶ୍ଚିମବଙ୍ଗ ରହିଛନ୍ତି। ଫଳାଫଳ, ପ୍ରଭାବଶାଳୀ ଶ୍ରେଣୀଗୃହ ଶିକ୍ଷାଦାନ, ଭିତ୍ତିଭୂମି ସୁବିଧା, ବିଦ୍ୟାଳୟ ଏବଂ ଶିଶୁ ସୁରକ୍ଷା, ଡିଜିଟାଲ ଶିକ୍ଷଣ ଏବଂ ଶାସନ ପ୍ରକ୍ରିୟା ଆଦି ୬ଟି ଶ୍ରେଣୀରେ ୭୪ଟି ବିଭିନ୍ନ ଇଣ୍ଡିକେଟର ସହ ଏହି ରିପୋର୍ଟରେ ପ୍ରତ୍ୟକ ଜିଲାକୁ ସର୍ବାଧିକ ୬୦୦ରୁ ବିଭିନ୍ନ ପଏଣ୍ଟ ଦିଆଯାଇଛି। ସ୍କୁଲ ଶିକ୍ଷା କ୍ଷେତ୍ରରେ ଗତ ୨ ବର୍ଷ ମଧ୍ୟରେ ସର୍ବାଧିକ ପ୍ରଗତି କରିଥିବା ରାଜ୍ୟଗୁଡ଼ିକ ମଧ୍ୟରେ ଓଡ଼ିଶା, ହିମାଚଳ ପ୍ରଦେଶ, ତେଲଙ୍ଗାନା, ଚଣ୍ଡିଗଡ଼ ଏବଂ ଗୋଆ ରହିଛନ୍ତି। ସେହିପରି ଗତ ୨ ବର୍ଷ ମଧ୍ୟରେ ଛତିଶଗଡ଼, ପଞ୍ଜାବ ଏବଂ ପଶ୍ଚିମବଙ୍ଗର ସ୍କୁଲ ଶିକ୍ଷା ପ୍ରଦର୍ଶନରେ ତୀବ୍ର ହ୍ରାସ ଘଟିଥିବା ଏହି ରିପୋର୍ଟ କହିଛି। ସମୟ ସହ ସ୍କୁଲ ଶିକ୍ଷା କ୍ଷେତ୍ରରେ ଦେଶର ଶୀର୍ଷ ଏବଂ ନିମ୍ନ ପ୍ରଦର୍ଶନକାରୀ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକ ମଧ୍ୟରେ ବ୍ୟବାଧାନ ହ୍ରାସ ପାଇଥିବା ନେଇ ଶିକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି।
