କୁଜଙ୍ଗ,୨୧ା୯(ଡି.ଏନ୍.ଏ.): କରୋନା ଟେଷ୍ଟିଂ ଠିକ୍ ଭାବେ ହେଉ ନ ଥିବା ନେଇ ଅଭିଯୋଗ ଆଣିଥିବା ସରପଞ୍ଚଙ୍କ ବାପାଙ୍କୁ ଡାକ୍ତରଖାନା ପକ୍ଷରୁ ଜାଣିଶୁଣି ହଇରାଣ କରାଯାଉଥିବା ଅଭିଯୋଗ ଆଣିଛନ୍ତି କୁଜଙ୍ଗ ବ୍ଲକ ଅଧୀନ ଗରେଇ ପଞ୍ଚାୟତ ସରପଞ୍ଚ ସଂଗ୍ରାମ ମନ୍ତ୍ରୀ। ଅଭିଯୋଗ ମୁତାବକ, ସରପଞ୍ଚଙ୍କ ବାପା ବୀରବର ମନ୍ତ୍ରୀ (୬୪)ଙ୍କ ଶରୀରରେ କରୋନା ଲକ୍ଷଣ ଦେଖାଯିବାରୁ ତାଙ୍କୁ ରବିବାର ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରେ ତାଙ୍କର କରୋନା ପରୀକ୍ଷା କରାଇବା ବଦଳରେ ଅତିରିକ୍ତ ଜିଲା ମୁଖ୍ୟ ଚିକିତ୍ସାଧୀକାରୀ ତାଙ୍କୁ କୁଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପରୀକ୍ଷା କରାଇବାକୁ ଲିଖିତ ଆକାରରେ କହିଥିଲେ। ମାତ୍ର କୁଜଙ୍ଗରେ ରବିବାର ପରୀକ୍ଷା କରାଯାଉ ନ ଥିବାରୁ ସୋମବାର ରାହାମାଠାରେ ହେବାକୁ ଥିବା ପରୀକ୍ଷା ଶିବିରରେ ଟେଷ୍ଟ କରାଇବାକୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ମୁଖ୍ୟ ଚିକିତ୍ସାଅଧିକାରୀ ଡା. ପ୍ରଶନ୍ନ ପଣ୍ଡା ପରାମର୍ଶ ଦେଇଥିଲେ। ବୟସାଧିକ ସହ ତାଙ୍କ ଦେହ ଅତି ଅସୁସ୍ଥ ଥିବା ବେଳେ ଡାକ୍ତରଖାନା କର୍ତ୍ତୃପକ୍ଷ ତାଙ୍କ ଚିକିତ୍ସା ନ କରାଇ ଘରକୁ ପଠାଇ ଦେଇଥିବା ଅଭିଯୋଗ ଆଣିଛନ୍ତି ସରପଞ୍ଚ ସଂଗ୍ରାମ ମନ୍ତ୍ରୀ। ତାଙ୍କ କହିବା ମୁତାବକ, ପ୍ରତି ବ୍ଲକରେ ପ୍ରତ୍ୟହ ୨୦୦ କରୋନା ଟେଷ୍ଟ ହେବ ବୋଲି ଜିଲାପାଳ ନିର୍ଦ୍ଦେଶ ଦେଇଥିଲେ। ହେଲେ କୁଜଙ୍ଗ ବ୍ଲକରେ ଦୈନିକ ମାତ୍ର ୬୦-୭୦ଜଣଙ୍କ ପରୀକ୍ଷା କରାଯାଉଛି। ଫଳରେ ବ୍ଲକ ଅଞ୍ଚଳର ବହୁ ଲୋକ ଚିକିତ୍ସା ଅଭାବରୁ ଗୁରୁତର ହୋଇପଡୁଛନ୍ତି। ତେବେ ଜିଲାପାଳଙ୍କ ନିର୍ଦ୍ଦେଶକୁ ଠିକ୍ ଭାବେ ପାଳନ କରିବା ନେଇ ସେ ଦାବି କରିଥିଲେ। ଏ ନେଇ ଗଣମାଧ୍ୟମରେ ଖବର ପ୍ରକାଶିତ ହୋଇଥିଲା। ତେଣୁ ସେହି ରାଗରେ ଡାକ୍ତରଖାନା କର୍ତ୍ତୃପକ୍ଷ ତାଙ୍କ ବାପାଙ୍କ ଚିକିତ୍ସା କରାଉନାହାନ୍ତି ବୋଲି ସରପଞ୍ଚ ମନ୍ତ୍ରୀ କହିଛନ୍ତି। ଏ ସମ୍ପର୍କରେ କୁଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଚିକିତ୍ସା ଅଧିକାରୀ ଡା. ପଣ୍ଡାଙ୍କୁ ପଚାରିବାରେ ରବିବାର ଆମର ପରୀକ୍ଷା କରାଯାଉ ନ ଥିବାରୁ ସୋମବାର ରାହାମାଠାରେ ପରୀକ୍ଷା କରେଇ ନେବା ପାଇଁ ପରାମର୍ଶ ଦିଆଯାଇଛି। କରୋନା ଲକ୍ଷଣଥିବା ରୋଗୀଙ୍କୁ ଜିଲା ମୁଖ୍ୟ ଚିକିତ୍ସାଳୟରୁ କୁଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପଠାଯିବା ସମ୍ପର୍କରେ ସିଡିଏମ୍ଓ ଡା. ବିଜୟା ପଣ୍ଡାଙ୍କୁ ପଚାରିବାରେ, ଏଭଳି ହେବା କଥା ନୁହେଁ। ତେବେ ଏ ସମ୍ପର୍କରେ ବୁଝିବି ବୋଲି କହିଛନ୍ତି।
