କେସିଙ୍ଗା,୪।୧(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଅଧୀନ ଉତ୍କେଲା ଗ୍ରାମପଞ୍ଚାୟତ ପକ୍ଷରୁ ଆସନ୍ତା ଶୁକ୍ରବାର କଳାହାଣ୍ଡି ଉତ୍ସବ ପାଳନ ନିମନ୍ତେ ପଞ୍ଚାୟତରେ ଗୁରୁବାର ସଫେଇ କାର୍ଯ୍ୟ ଚାଲିଥିଲା। ସେତିକିବେଳେ ୨୬ ନମ୍ବର ଜାତୀୟ ରାଜପଥ ନିକଟରେ ବ୍ୟବସାୟୀ କରୁଥିବା କୂଳଦୀପ ଜୈନଙ୍କୁ ରାସ୍ତା ପାର୍ଶ୍ୱ ଡ୍ରେନ ସଫା କରିବାକୁ ଉତ୍କେଲା ସରପଞ୍ଚ ନରେନ୍ଦ୍ର ମାଝି କହିଥିଲେ।
ଇତି ମଧ୍ୟରେ ସରପଞ୍ଚ ଏବଂ ବ୍ୟବସାୟୀଙ୍କ ମଧ୍ୟରେ ଡ୍ରେନ ସଫାକୁ ନେଇ ଯୁକ୍ତିତର୍କ ହୋଇଥିଲା। ଏଥିରେ ବ୍ୟବସାୟୀ କୂଳଦୀପ ଉତ୍ତ୍ୟକ୍ତ ହୋଇ ଜନସାଧାରଣଙ୍କ ଉପସ୍ଥିତରେ ସରପଞ୍ଚଙ୍କୁ ମାଡ଼ ମାରିଥିଲେ। ଫଳରେ ସରପଞ୍ଚ ରକ୍ତାକ୍ତ ହୋଇଥିବା ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି। ଏ ନେଇ ସରପଞ୍ଚ ଉତ୍କେଲା ଫାଣ୍ଡିରେ ଲିଖିତ ଅଭିଯୋଗ କରିଛନ୍ତି। ବ୍ୟବସାୟୀ କୂଳଦୀପ ଜୈନ ମଧ୍ୟ ଉକ୍ତ ଫାଣ୍ଡିରେ ପାଲଟା ଏକ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଉତ୍କେଲା ଫାଣ୍ଡି ଅଧିକାରୀ ପ୍ରେମ ରାଜ କହରଙ୍କୁ ପଚାରିବାରୁ ଉଭୟଙ୍କ ପକ୍ଷରୁ ଅଭିଯୋଗ ହୋଇଛି, ତଦନ୍ତ ଜାରି ରହିଛି ବୋଲି ପ୍ରକାଶ କରିଥିଲେ।
