ଝାରବନ୍ଧ, ୧।୯ (ଦେବେନ୍ଦ୍ର ସାହୁ): ଶିକ୍ଷା କ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନ ଓ ଅଭିନବ ଶିକ୍ଷଣ ପଦ୍ଧତି ପାଇଁ ବରଗଡ଼ ଜିଲା ଝାରବନ୍ଧ ବ୍ଲକ ଅନ୍ତର୍ଗତ ସଂକ୍ରି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ରାଜ୍ୟସ୍ତରୀୟ ‘ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର’ ପାଇଁ ମନୋନୀତ ହୋଇଛି। ୨୦୨୪ ଶିକ୍ଷାବର୍ଷ ପାଇଁ ପ୍ରଦାନ କରାଯାଉଥିବା ଏହି ପୁରସ୍କାର ତାଲିକାରେ ରାଜ୍ୟର ୫୦ଟି ମନୋନୀତ ବିଦ୍ୟାଳୟ ମଧ୍ୟରେ ସ୍ଥାନ ପାଇଥିବା ବରଗଡ଼ ଜିଲାର ମାତ୍ର ୫ଟି ବିଦ୍ୟାଳୟ ମଧ୍ୟରୁ ସଂକ୍ରି ବିଦ୍ୟାଳୟ ଅନ୍ୟତମ। ଏହି ସଫଳତା ପରେ ସଂକ୍ରି ବିଦ୍ୟାଳୟ ସମେତ ସମଗ୍ର ଅଞ୍ଚଳରେ ଖୁସିର ଲହରୀ ଖେଳିଯାଇଛି।
ବିଦ୍ୟାଳୟର ପ୍ରଧାନ ଶିକ୍ଷକ ମହେନ୍ଦ୍ର କୁମାର ବାରିକଙ୍କ ନେତୃତ୍ୱ ଏବଂ ବୈତାଲି କ୍ଲଷ୍ଟର ସିଆରସିସି ଦିବସ କୁମାର ସାହୁଙ୍କ ପ୍ରତ୍ୟକ୍ଷ ମାର୍ଗଦର୍ଶନରେ ବିଦ୍ୟାଳୟରେ ଅନେକ ଅଭିନବ ଶିକ୍ଷଣ କାର୍ଯ୍ୟକ୍ରମ ଓ ଶିକ୍ଷାମୂଳକ ପଦକ୍ଷେପ ନିଆଯାଉଛି। ଛାତ୍ରଛାତ୍ରୀଙ୍କ ଶିକ୍ଷଣ ଦକ୍ଷତା ବୃଦ୍ଧି ସହ ସେମାନଙ୍କ ସର୍ବାଙ୍ଗୀଣ ବିକାଶକୁ ଗୁରୁତ୍ୱ ଦେଇ ନିଆଯାଇଥିବା ଏହି ଉଦ୍ୟମଗୁଡ଼ିକ ବିଦ୍ୟାଳୟକୁ ରାଜ୍ୟସ୍ତରରେ ଚର୍ଚ୍ଚାର କେନ୍ଦ୍ରବିନ୍ଦୁରେ ପହଞ୍ଚାଇଛି।
ଗତବର୍ଷ ଅକ୍ଟୋବର ୩୧ ତାରିଖରେ ଏକ ରାଜ୍ୟସ୍ତରୀୟ ଦଳ ବିଦ୍ୟାଳୟ ପରିଦର୍ଶନ କରି ଚାଲିଥିବା ଅଭିନବ ଶିକ୍ଷାଦାନ ପ୍ରଣାଳୀର ତଦାରଖ କରିଥିଲେ। ଏହି କ୍ରମରେ ମଙ୍ଗଳବାର ଓସେପା (OSEPA) ଡେପୁଟି ଡାଇରେକ୍ଟର ଶୈଳଧିରାଜ ତନୟା ଶତପଥୀ ସଂକ୍ରି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ପରିଦର୍ଶନ କରିଥିଲେ। ତାଙ୍କ ସହ ପେଡାଗୋଜି କୋଓର୍ଡିନେଟର ପୁଷ୍ପାଞ୍ଜଳି ଦାସ ଓ ସସ୍ମିତା ସାହୁ ଉପସ୍ଥିତ ଥିଲେ। ପରିଦର୍ଶନ ସମୟରେ ବିଦ୍ୟାଳୟରେ ଚାଲିଥିବା ଅଭିନବ କାର୍ଯ୍ୟକ୍ରମ ଏବଂ ସିଆରସିସିଙ୍କ ମାର୍ଗଦର୍ଶନକୁ ଡେପୁଟି ଡାଇରେକ୍ଟର ଶତପଥୀ ଉଚ୍ଚ ପ୍ରଶଂସା କରିଥିଲେ।
ଆସନ୍ତା ସେପ୍ଟେମ୍ବର ୫ ତାରିଖ (ଗୁରୁ ଦିବସ) ଅବସରରେ ଭୁବନେଶ୍ୱରସ୍ଥିତ ଲୋକସେବା ଭବନରେ ୨୦୨୪ ଶିକ୍ଷାବର୍ଷ ପାଇଁ ମନୋନୀତ ବିଦ୍ୟାଳୟଗୁଡ଼ିକୁ ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ପ୍ରଦାନ କରାଯିବ।
ଏହି ସଫଳତା ପାଇଁ ବିଦ୍ୟାଳୟର ସହକାରୀ ଶିକ୍ଷକ ସବିତ କୁମାର ମହାଲିଙ୍ଗ, ଜୋହନ ବାଗ, ଶର୍ମିଷ୍ଠା ସ୍ୱାଇଁ, ଅମିତା ନାୟକ, ଲଳିତ କୁମାର ମଲ୍ଲିକ, ନିରଞ୍ଜନ ଦେବତା ଓ ସୂର୍ଯ୍ୟ କୁମାର ବରିହା ପ୍ରମୁଖ ଆନନ୍ଦ ପ୍ରକାଶ କରିଛନ୍ତି। ସେହିପରି ଝାରବନ୍ଧ ବ୍ଲକ ଶିକ୍ଷା ଅଧିକାରୀ ଶୁଭମ କୁମାର ପତି, ଏବିଇଓ ଦୟାନିଧି କୈବର୍ତ୍ତ, ଅମଠି ସରପଞ୍ଚ ଲକ୍ଷେ ସିଂ ଥପା, ସମିତି ସଭ୍ୟ ହେମାନନ୍ଦ ଚୌଧୁରୀ ଏବଂ ପଞ୍ଚସଖା ଶିକ୍ଷାସେତୁ ସଭାପତି ଅକ୍ଷୟ ପାଣ୍ଡେ ବିଦ୍ୟାଳୟର ପ୍ରଧାନ ଶିକ୍ଷକ, ଶିକ୍ଷକ-ଶିକ୍ଷୟିତ୍ରୀ ଓ ଛାତ୍ରଛାତ୍ରୀଙ୍କୁ ସାଧୁବାଦ ଜଣାଇଛନ୍ତି।
