ଦୁବାଇ,୩୦।୯: ଆଇପିଏଲ୍ ୨୦୨୧ର ଦ୍ୱିତୀୟ ପର୍ଯ୍ୟାୟରେ ବୁଧବାର ଖେଳାଯାଇଥିବା ମୁକାବିଲାରେ ରାଜସ୍ଥାନ ରୟାଲ୍ସକୁ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର ପରାସ୍ତ କରିଥିଲା। ଏହି ପରାଜୟ ପରେ ରାଜସ୍ଥାନ ଦଳ ପଏଣ୍ଟ ତାଲିକାରେ ୭ମ ସ୍ଥାନରେ ରହିଥିବା ବେଳେ ନେଟ୍ ରନ୍ ରେଟ୍ ହ୍ରାସ ପାଇ -୦.୪୬୮ରେ ପହଞ୍ଚିଛି।
ତେବେ ମ୍ୟାଚ୍ ହାରିବା ପରେ ରାଜସ୍ଥାନ ଅଧିନାୟକ ସଞ୍ଜୁ ସାମସନ କହିଛନ୍ତି, ଆମେ ଭଲ ଆରମ୍ଭ କରିଥିଲୁ। ଓପନରମାନେ ଭଲ ପ୍ରଦର୍ଶନ କରିଥିଲେ ହେଁ ତାର ଲାଭ ଉଠାଇ ହେଲାନାହିଁ। ମଇଦାନକୁ ଆମେ ଇଚ୍ଛାଶକ୍ତି ସହ ଓହ୍ଲାଇଥିଲୁ। ବ୍ୟାଟ୍ସମ୍ୟାନ୍ମାନେ ଡବଲ୍ ପେସ୍କୁ ଖେଳିବାକୁ ଯାଇ ଉଇକେଟ ହରାଇଥିଲେ। ସତ କହିବାକୁ ଗଲେ ଏହି ସପ୍ତାହ ଆମ ପାଇଁ ବହୁତ କଠିନ ଥିଲା। ଆମେ ୧୫୦ ରନ୍ କରିଥିଲୁ। ତାହା ସେମାନେ ସହଜରେ ହାସଲ କରିନେଇଥିଲେ ବୋଲି ସେ କହିଛନ୍ତି।
ଏହାଛଡ଼ା ବାକି ଥିବା ସମସ୍ତ ମ୍ୟାଚ୍କୁ ଜିତିବାକୁ ନେଇ ସେ ସାମସନ କହିଛନ୍ତି, ବାସ୍ତବରେ ଆମ ପାଖରେ ଆଉ ହାରିବାକୁ କିଛି ନାହିଁ। ଏଭଳି ମନରେ ଚିନ୍ତା କଲେ ଭଲ ଲାଗୁଛି। ଆମେ ମଇଦାନରେ ଆଉ ଭଲ ଭାବେ ଖେଳିପାରିବୁ ବୋଲି ଭାବୁଛୁ। ଏଥର ଆମେ ଆଇପିଏଲ୍ ପଏଣ୍ଟ ଟେବୁଲ୍ରେ କିଛି ଅଲଗା ହେଉଥିବା ଦେଖୁଛୁ। ଆମେ ଶେଷ ମ୍ୟାଚ୍ ଯାଏ ଲଢ଼ିବୁ ଏବଂ ନିଜ ଉପରେ ଶେଷ ଯାଏ ବିଶ୍ୱାସ ରଖିବୁ ବୋଲି ସେ ମଧ୍ୟ କହିଛନ୍ତି।
