ଭବାନୀପାଟଣା,୨୬ା୯ (ଉତ୍ତମ କୁମାର ଦାଶ):ଜଳସେଚନ ଅଭାବରୁ ଦିନେ ଯେଉଁ ଅଞ୍ଚଳରେ ମରୁଡି ଭଳି ସ୍ଥିତି ଉପୁଜୁଥିଲା ଆଜି ସେହି ଅଞ୍ଚଳରେ ଜଳ ସେଚନ ପରେ ଚାଷ ଜମି ଶସ୍ୟଶ୍ୟାମଳା ହୋଇଛି। ଏହାର ଶ୍ରେୟ ନେଉଛି ରେତ ଜଳସେଚନ ପ୍ରକଳ୍ପ। ଏହି ପ୍ରକଳ୍ପ ଏବେ ସ୍ଥାନୀୟ ଚାଷୀଙ୍କ ମୁହଁରେ ହସ ଫୁଟାଇଛି।
କଳାହାଣ୍ଡି ଜିଲା ନର୍ଲା ବ୍ଲକ ବଡ଼ଧାରପୁର ପଞ୍ଚାୟତର କୁଟିଙ୍ଗପଦରଠାରେ ଏହି ପ୍ରକଳ୍ପ ନିର୍ମାଣ ହୋଇଛି। ୨୦୦୪ ଫେବୃଆରୀ ୮ରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ପ୍ରକଳ୍ପର ଶିଳାନ୍ୟାସ କରିଥିଲେ। ୨୦୧୮ରେ ପ୍ରକଳ୍ପ କାମ ଶେଷ ହୋଇଥିବାବେଳେ ୧୬ ଫେବୃଆରୀ ୨୦୧୯ରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଉଦ୍ଘାଟନ କରିଥିଲେ। ପ୍ରକଳ୍ପ ପାଇଁ ୭୬୮.୪୬ କୋଟି ଟଙ୍କା ଖର୍ଚ୍ଚ ହୋଇଥିଲା। ଏହି ପ୍ରକଳ୍ପ ହେବା ପରେ ନର୍ଲା ସମେତ ଭବାନୀପାଟଣା, ଲାଞ୍ଜିଗଡ଼ ଓ କେସିଙ୍ଗା ବ୍ଲକର ମରୁଡି ଅଞ୍ଚଳର ଚାଷ ଜମିକୁ ଉଭୟ ଖରିଫ ଓ ରବିରେ ଜଳସେଚନ ହୋଇପାରୁଛି। ଖରିଫରେ ୮୫୦୦ ହେକ୍ଟର ଓ ରବିରେ ୨୨୫୦ହେକ୍ଟର ଜମିକୁ ଜଳସେଚନ ହେଉଛି। ସେଥିମଧ୍ୟରୁ ନର୍ଲା ବ୍ଲକରେ ୩୪୫୬ ହେକ୍ଟର, କେସିଙ୍ଗା ୧୦୮୭ ହେକ୍ଟର, ଭବାନୀପାଟଣା ୩୮୦୩ ଓ ଲାଞ୍ଜିଗଡ ବ୍ଲ୍ଳକର ୧୪୫ ହେକ୍ଟର ଚାଷ ଜମିକୁ ଜଳ୍ସେଚିତ ହେଉଛି। ଏହି ପ୍ରକଳ୍ପ ଦ୍ବାରା ୪ ବ୍ଲକର ୯୭ ଗ୍ରାମର ୫୧୯୫ ଜଣ ଚାଷୀ ଉପକୃତ ହେଉଛନ୍ତି। ରେତ ଡ୍ୟାମ୍ ଜଳଭଣ୍ଡାରର ଜଳ ଧାରଣ କ୍ଷମତା ୭୨୪୯. ୭୮୭ ହେକ୍ଟୋମିଟର ରହିଥିବାବେଳେ ୨୬୨ କି.ମି. ପର୍ଯ୍ୟନ୍ତ ଏହା ପରିବ୍ୟାପ୍ତ। ପ୍ରକଳ୍ପରୁ ୧୯୬.୮ କି.ମି. ଉଭୟ ବାମ ଓ ଦକ୍ଷିଣ କେନାଲ ମାଧ୍ୟମରେ ଚାଷୀଙ୍କୁ ଜଳ ଯୋଗାଣ କରାଯାଉଛି। ପୂର୍ବରୁ ଇନ୍ଦ୍ରାବତୀ ପ୍ରକଳ୍ପ ଯୋଗୁ କେବଳ ଧର୍ମଗଡ ଉପଖଣ୍ଡ ଅଞ୍ଚଳର ଚାଷୀ ଉଭୟ ଖରିଫ ଓ ରବିରେ ଧାନ ଚାଷ କରି ଉପକୃତ ହେଉଥିଲେ। ଏବେ କିନ୍ତୁ ରେତ ପ୍ରକଳ୍ପ ଯୋଗୁ ଭବାନୀପାଟଣା ଉପଖଣ୍ଡର ଉପରୋକ୍ତ ବ୍ଲକର ଚାଷୀମାନେ ଉଭୟ ଖରିଫ ଓ ରବିରେ ଧାନ ଚାଷକରି ଉପକୃତ ହୋଇପାରୁଛନ୍ତି। ଏ ନେଇ ବିଭାଗୀୟ ଅଧୀକ୍ଷଣ ଯନ୍ତ୍ରୀ ଅନନ୍ତ ରାମ ନାଏକଙ୍କୁ ପଚାରିବାରୁ ଚାଷୀଙ୍କୁ ଠିକ ଭାବରେ ଓ ସୁବିଧାରେ ଜଳସେଚନ ସୁବିଧା ଯୋଗାଇବା ପାଇଁ ପଦକ୍ଷେପ ନେଉଛୁ ବୋଲି ପ୍ରକାଶ କରିଥିଲେ ।
