ମୁମ୍ବାଇ : ଆଜିକାଲି ପରିବାର ସଦସ୍ୟ ଏବଂ କଥିତ ପ୍ରେମିକା ଲୁଲିଆ ବନ୍ତୁରଙ୍କ ସହ ନିଜ ଫାର୍ମହାଉସରେ ସମୟ ଅତିବାହିତ କରୁଛନ୍ତି ଭାଇଜାନ୍। ଏଠାରେ ତିନୋଟି ଗୀତ ମଧ୍ୟ ରିଲିଜ୍ କରିସାରିଲେଣି ସେ। ଏହା ସହିତ ଫାର୍ମହାଉସରେ ଯାହା କିଛି କରୁଛନ୍ତି ତାହାର ଭିଡିଓ ପ୍ରସ୍ତୁତ କରି ପ୍ରଶଂସକମାନଙ୍କ ଉଦ୍ଦେଶ୍ୟରେ ସୋସିଆଲ ମିଡିଆରେ ଶେୟାର ମଧ୍ୟ କରୁଛନ୍ତି। ଏବେ ସଲମାନ ଫାର୍ମହାଉସରେ ଫସଲ ଅମଳ କରୁଥିବା ନଜର ଆସିଛନ୍ତି। ଏହି ଫଟୋ ସଲମାନଙ୍କ ତାଙ୍କ ଇନ୍ଷ୍ଟାଗ୍ରାମରେ ଶେୟାର କରିଛନ୍ତି। ଫଟୋରେ ସେ କ୍ଷେତ ମଝିରେ ଠିଆ ହୋଇଛନ୍ତି। ଫଟୋଟି ଖୁବ୍ ଭାଇରାଲ ହେବାରେ ଲାଗିଛି।
ଫଟୋ ଶେୟାର କରି ସଲମାନ କ୍ୟାପ୍ଶନ ଲେଖିଛନ୍ତି, ‘ ଦାନେ ଦାନେ ପେ ଲିଖା ହେ, ଖାନେ ଓ୍ବାଲେ କା ନାମ୍’। ଜୟ ଯବାନ, ଜୟ କିଷାନ’। ସଲମାନଙ୍କ ଏହି ଫଟୋ ସୋସିଆଲ ମିଡିଆରେ ଛାଇଯାଇଛି। ସେ ଏକ ଗ୍ରେ କଲର ଟି-ଶର୍ଟ ପିନ୍ଧି ଥିବା ବେଳେ ହାଫ୍ ପ୍ୟାଣ୍ଟି ପିନ୍ଧି ଫଟୋରେ ନଜର ଆସିଛନ୍ତି। ମୁଣ୍ଡରେ ମଧ୍ୟ ଟୋପି ପିନ୍ଧିଛନ୍ତି।
ଏ ତ ଗଲା ତାଙ୍କ ବ୍ୟକ୍ତିଗତ ଜୀବନ କଥା। ତାଙ୍କ ଓ୍ବାର୍କଫ୍ରଣ୍ଟ୍ ବିଷୟରେ ଯଦି କହିବା ତେବେ ଫିଲ୍ମ ‘ରାଧେ ୟୋର ମୋଷ୍ଟ ଓ୍ବାଣ୍ଟେଡ୍ ହିରୋ’ରେ ସେ ନଜର ଆସିବେ। ଏହି ଫିଲ୍ମରେ ତାଙ୍କ ସହିତ ଅଭିନେତ୍ରୀ ଦିଶା ପଟାନୀ ଏବଂ ରଣଦୀପ ହୁଡ୍ଡା ଅଭିନୟ କରିଛନ୍ତି। ଫିଲ୍ମଟି ଇଦ୍ ଉପଲକ୍ଷେ ରିଲିଜ ହେବାର ଥିଲା। ମାତ୍ର ଲକ୍ଡାଉନ୍ ଯୋଗୁ ହୋଇପାରିଲା ନାହିଁ। କୁହାଯାଉଛି ଫିଲ୍ମଟି ଦୀପାବଳିରେ ରିଲିଜ ହୋଇପାରେ।
