କେନ୍ଦୁଝର,୪।୪(ସ୍ବ.ପ୍ର.)- କେନ୍ଦୁଝର ଜିଲାରେ ଗତ ଏକ ଦଶନ୍ଧି ହେଲା ଦ୍ରୁତ ଜଙ୍ଗଲ କ୍ଷୟ ଯୋଗୁ ବ୍ୟାପକ ଶାଳ ଜଙ୍ଗଲ ନଷ୍ଟ ହୋଇଗଲାଣି। ପ୍ରାକୃତିକ ପରିବେଶରେ ଆପେ ଆପେ ଗଛ ଉଠୁଥିବା ଶାଳ ଜଙ୍ଗଲର ବିକଳ୍ପ ନାହିଁ। ଅର୍ଥାତ ଏହି ଗଛ ପ୍ରସ୍ତୁତ କରି ବନୀକରଣ କରିବା ଅସମ୍ଭବ ବ୍ୟାପାର। ଏକଦା ଜିଲାରେ ବ୍ୟାପକ ଶାଳ ଜଙ୍ଗଲ ଥିଲା। ଖଣିଖନନ, ଶିଳ୍ପ,ରାସ୍ତା ଓ ବନ୍ଧ ନିର୍ମାଣ ନାମରେ ଜଙ୍ଗଲ ଧ୍ୱଂସ, ଜବର ଦଖଲ, ଜଙ୍ଗଲ ପୋଡ଼ି, କାଠ ମାଫିଆଙ୍କ ପ୍ରାଦୂର୍ଭାବ ବୃଦ୍ଧି ଆଦି କାରଣରୁ ଜିଲାରେ ଶାଳ ଜଙ୍ଗଲ ନଷ୍ଟ ହେବାକୁ ବସିଥିବା ବେଳେ ଏହାର ସୁରକ୍ଷା ଜରୁରୀ ହୋଇପଡ଼ିଛି ା
ଜିଲାର ତେଲକୋଇ, ବାଂଶପାଳ, ହରିଚନ୍ଦନପୁର, ଯୋଡ଼ା,ଚମ୍ପୁୁଆ ଆଦି ବ୍ଲକ ଅଞ୍ଚଳରେ ଅଧିକ ଶାଳ ଜଙ୍ଗଲ ରହିଛି। ଜିଲାର ସମୁଦାୟ ଭୌଗଳିକ ଅଞ୍ଚଳର ୩୭.୩୦ ପ୍ରତିଶତ ଜଙ୍ଗଲାଞ୍ଚଳ। ମୋଟ ୩୦୯୭.୧୮ ବର୍ଗ କି.ମି. ଜଙ୍ଗଲ ମଧ୍ୟରୁ ୧୮୩୪.୦୯ ବର୍ଗ କି.ମି. ରିଜର୍ଭ ଜଙ୍ଗଲ,୨୭୩.୬୪ ବର୍ଗ କି.ମି. ଚିହ୍ନିତ ସୁରକ୍ଷିତ ଜଙ୍ଗଲ, ୨୨୦.୭୯ ବର୍ଗ କି.ମି. ଅଚିହ୍ନିତ ଜଙ୍ଗଲ ଓ ଅବଶିଷ୍ଟ ଅନ୍ୟାନ୍ୟ ଜଙ୍ଗଲ ରହିଛି।
ଗତ କିଛି ବର୍ଷ ହେଲା ଜିଲାରେ ଥିବା ଘଞ୍ଚ ଜଙ୍ଗଲ ନଷ୍ଟ ହୋଇସାରିଥିବା ବେଳେ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି ଶାଳ ଜଙ୍ଗଲ। ମୂଲ୍ୟବାନ ଶାଳ କାଠକୁ ଚୋରାରେ ଆଣି ଘର ନିର୍ମାଣ, ସାୈଖୀନ ସାମଗ୍ରୀ ନିର୍ମାଣ କରାଯାଉଥିବା ଦେଖିବାକୁ ମିଳୁଛି। ଦୈନିକ ଜାଳ କାଠ ପାଇଁ ହଜାର ହଜାର ଶାଳ ଗଜା କଟାଯାଉଛି। ଏହା ଲୋକଙ୍କ ଘରଠାରୁ ଆରମ୍ଭ କରି ଢ଼ାବା, ହୋଟେଲ, ସ୍କୁଲ ହଷ୍ଟେଲ ଆଦିରେ ବ୍ୟବହାର ହେଉଛି। ତେବେ ଗୋଟିଏ ଭଲ ଗଛ ପାଇବା ପାଇଁ କାଠ ମାଫିଆମାନେ ବହୁ ସଂଖ୍ୟକ ଗଛ କାଟି ପକାଉଛନ୍ତି। ଶାଳ କାଠ ବ୍ୟତୀତ ଝୁଣା,ଶାଳ ମଞ୍ଜିି, ଶାଳପତ୍ର,ଦାନ୍ତକାଠି ଆଦି ସଂଗ୍ରହ କରି ହଜାର ହଜାର ବନବାସୀ ଜୀବିକା ନିର୍ବାହ କରିଥାନ୍ତି। ଆଜିକାଲି କୃତିମ ଉପାୟରେ ଶାଳ ଜଙ୍ଗଲ ସୃଷ୍ଟି କରାଯାଉଥିଲେ ହେଁ କ୍ଷତିଗ୍ରସ୍ତ ହୋଇଥିବା ପ୍ରାକୃତିକ ଶାଳ ଜଙ୍ଗଲର ଆବଶ୍ୟକତା ପୂରଣ ହୋଇ ପାରୁନି। ପୋଡ଼ୁ ଚାଷ, କୋଇଲା ଆଦି ପାଇଁ ଜଙ୍ଗଲ ପୋଡ଼ି ଯୋଗୁ ଏହି ଶାଳ ଗଛ ଧ୍ୱଂସ ପାଇବାରେ ଲାଗିଛି। ତେଣୁ ଅନ୍ୟ ଗଛ ବନୀକରଣ କରିବା ପରିବର୍ତ୍ତେ ଶାଳ ଜଙ୍ଗଲର ସୁରକ୍ଷା କରାଯିବାକୁ ମତ ପ୍ରକାଶ ପାଉଛି ା ଏ ନେଇ ଡିଏଫ୍ଓ କେନ୍ଦୁଝର ସ୍ବୟମ ମଲ୍ଲିକଙ୍କୁ ପଚାରିବାରୁ ଜଙ୍ଗଲ ନଷ୍ଟ ରୋକିବା ପାଇଁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। ଧରପଗଡ଼ ସହ ବନୀକରଣ କରାଯାଉଛି ବୋଲି କହିଛନ୍ତି।
