କେନ୍ଦୁଝର,୩ା୩ (ସ୍ବ.ପ୍ର.): କେନ୍ଦୁଝର ବନଖଣ୍ଡ ସଦର ରେଞ୍ଜ ଅଧୀନ ପଦ୍ମପୁର ଗ୍ରାମରେ ବନ ବିଭାଗ ପକ୍ଷରୁ ପ୍ରଥମ ଥର ପାଇଁ କରାଯାଇଥିବା ଶାଳ ଜଙ୍ଗଲ ବନୀକରଣ ପ୍ରକଳ୍ପ ଅବହେଳିତ ହୋଇ ରହିଛି। ରକ୍ଷଣାବେକ୍ଷଣ ଅଭାବରୁ ସମଗ୍ର ଅଞ୍ଚଳ ଘାସ ଓ ଅନାବନା ଗଛରେ ପରିପୂର୍ଣ୍ଣ ହୋଇ ପଡିଥିବା ବେଳେ ନିଅଁା ଲାଗିଲେ ସମ୍ପୂର୍ଣ୍ଣ ନଷ୍ଟ ହୋଇଯିବା ଆଶଙ୍କା ରହିଛି। ତେବେ ଗୁରୁବାର ପିସିସିଏଫଙ୍କ କେନ୍ଦୁଝର ଜିଲା ଗସ୍ତରେ ଆସି ଉକ୍ତ ବନୀକରଣ ପରିଦର୍ଶନ କରିବାର କାର୍ଯ୍ୟକ୍ରମ ଥିବାରୁ ତରବରିଆ ଭାବେ ସଫେଇ କାର୍ଯ୍ୟ ଚାଲିଛି। ଏହି କାର୍ଯ୍ୟରେ ହାତୀମାନଙ୍କ ଟ୍ରାକିଂ ପାଇଁ ଥିବା ସ୍କ୍ବାଡ୍ ଏବଂ ଜଙ୍ଗଲ ନିଅଁା ଲିଭା ସ୍କ୍ବାଡ୍ର କର୍ମଚାରୀମାନଙ୍କୁ ନିୟୋଜିତ କରି ସଫେଇ ଓ କୋଡ଼ାଖୋସା ଆଦି କାମ କରାଯାଉଥିବାରୁ ଅସନ୍ତୋଷ ପ୍ରକାଶ ପାଇଛି। ହାତୀ ଓ ଜଙ୍ଗଲର ସୁରକ୍ଷା ପରିବର୍ତ୍ତେ ବିଭାଗୀୟ ଅଧିକାରୀମାନଙ୍କ ଚାକିରି ବଞ୍ଚାଇବା ପାଇଁ ସେମାନଙ୍କୁ ନିୟୋଜିତ କରାଯାଇଥିବାରୁ ପରିବେଶବିତମାନେ ଉଦ୍ବେଗ ପ୍ରକାଶ କରିଛନ୍ତି ା
ଏଠାରେ ସୂଚନାଯୋଗ୍ୟ ଯେ ୨୦୨୧-୨୨ରେ ୬ ହେକ୍ଟର ପରିମିତ ଅଞ୍ଚଳରେ ଏହି ମୂଲ୍ୟବାନ ଶାଳ ବନୀକରଣ କରାଯାଇଥିଲା। ରାଜ୍ୟ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ଏଠାରେ ୯୬୦୦ ଶାଳ ଚାରା ଲଗାଯାଇଥିଲା ା ରକ୍ଷଣା ବେକ୍ଷଣ ଅଭାବରୁ କେତେକ ନଷ୍ଟ ହୋଇଯାଇଥିବାରୁ ପୁନଃ ରୋପଣ କରାଯାଉଥିବା ଜଣାପଡିଛି ା
ପିସିସିଏଫଙ୍କୁ ଖୁସି କରିବା ପାଇଁ ଏଭଳି ତରବରିଆ ଭାବରେ ବନୀକରଣ ଅଞ୍ଚଳ ସଫେଇ ତଥା ନର୍ସରୀର ସଫେଇ ଓ ସାୈନ୍ଦର୍ଯ୍ୟକରଣ କାମରେ ଏହି ସ୍କ୍ବାଡର କର୍ମଚାରୀଙ୍କୁ ମୁତୟନ କରାଯାଇଥିବା ଅଭିଯୋଗ ହେଉଛି। ହାତୀ ଓ ଜଙ୍ଗଲର ସୁରକ୍ଷା ପାଇଁ ନିୟୋଜିତ କର୍ମଚାରୀଙ୍କୁ ଆଣି ଏଭଳି ପଦ୍ମପୁର ଶାଳ ବନୀକରଣ ଓ ମେଗା ନର୍ସରୀ ସାୈନ୍ଦର୍ଯ୍ୟକରଣ କାମରେ ଲଗାଯାଉଥିବାରୁ ଏହା ତଦନ୍ତ ସାପେକ୍ଷ। ବର୍ଷ ବର୍ଷ ଧରି ଏହି ସବୁ ନର୍ସରୀ ଓ ବନୀକରଣର ରକ୍ଷଣାବେକ୍ଷଣ ତଥା ସୌନ୍ଦର୍ଯ୍ୟକରଣ କାମ ପାଇଁ ହେଉଥିବା ଖର୍ଚ୍ଚ ବାଟମାରଣା ହେଉଥିବା ଏଥିରୁ ସ୍ପଷ୍ଟ ଅନୁମାନ ହେଉଛି ା
ସେହିପରି ଏସବୁର ତଦାରଖ ନିୟମିତ ହେଉ ନ ଥିବା ଏଥିରୁ ସ୍ପଷ୍ଟ ହୋଇଥିବାରୁ ଗସ୍ତ ବେଳେ ପିସିସିଏଫ ଏହାର ସମୀକ୍ଷା କରିବା ପାଇଁ ପରିବେଶବିତମାନେ ଦାବି କରୁଛନ୍ତି ା ଏନେଇ ସଦର ରେଞ୍ଜ ଅଧିକାରୀ ବିଦ୍ୟାଧର ସାହୁଙ୍କୁ ପଚାରିବାରୁ ସ୍କ୍ବାଡ୍ କର୍ମଚାରୀଙ୍କ ତାଲିମ କାର୍ଯ୍ୟକ୍ରମ ଉକ୍ତ ଶାଳ ବନୀକରଣ ସ୍ଥାନରେ ଥିବାରୁ ସେମାନଙ୍କୁ ନିୟୋଜିତ କରାଯାଇଥିବା କହିଛନ୍ତି।
