ବନ୍ତ, ୨୧।୩ (ସ୍ବ.ପ୍ର.)-ବୟସ ମାତ୍ର ୬ ବର୍ଷ। ଏହି ବୟସରୁ ୩୦ରୁ ଊର୍ଦ୍ଧ୍ୱ ଯୋଗାସନରେ ମାହିର। ଆଖି ପିଛୁଳାକେ କରି ଦେଖାଉଛନ୍ତି କଷ୍ଟସାଧ୍ୟ ଯୋଗାସନ। ମଣ୍ଡୁକ ଆସନ, ଚକ୍ରାସନ, ସର୍ପାକୃତି, କଚ୍ଛପ ଆସନ ସମେତ ଯେଉଁ ଆସନ କରିବା ଯୋଗଗୁୁରୁଙ୍କ ପକ୍ଷେ କଷ୍ଟସାଧ୍ୟ, ତାହାକୁ ଅତି ସହଜରେ କରି ଦେଖାଉଛନ୍ତି ବିସ୍ମୟ ବାଳକ ସାଇପ୍ରକାଶ ନାୟକ। ଆସନର ନଁା ଜାଣି ନାହାନ୍ତି କିନ୍ତୁ ସହଜରେ ପ୍ରଦର୍ଶନ କରିପାରୁଛନ୍ତି।
ସାଇପ୍ରକାଶଙ୍କ ଘର ଭଦ୍ରକ ଜିଲା ଆଗରପଡ଼ା ନିକଟସ୍ଥ ସଢ଼ା ପଞ୍ଚାୟତ ନାହା ଗ୍ରାମରେ। କଳ୍ପନା ମହାପାତ୍ର ଓ ପ୍ରଶାନ୍ତ କୁମାର ନାୟକଙ୍କ ଏକମାତ୍ର ପୁଅ ସାଇପ୍ରକାଶ। ବାପା ପ୍ରଶାନ୍ତ ହାଇଦ୍ରାବାଦର ଏକ ଘରୋଇ କମ୍ପାନୀରେ ଇଞ୍ଜିନିୟର ଭାବେ କାର୍ଯ୍ୟରତ। ସେଠାରେ ପରିବାର ସହ ରହୁଥିବା ବେଳେ ମାତ୍ର ୪ ବର୍ଷ ବୟସରୁ ଟେଲିଭିଜନରେ ସୋନି ଆର୍ଯ୍ୟାଙ୍କ ଯୋଗ ଉପରେ ପର୍ଯ୍ୟବସିତ ଏକ ନୃତ୍ୟ ଦେଖିବା ପରେ ସେ ଅନୁକରଣ କରିଥିଲେ। ପରେ ତାଙ୍କର ଆଗ୍ରହ ଦେଖି ମା’ କଳ୍ପନା ମୋବାଇଲରୁ ୟୁଟ୍ୟୁବ୍ରେ ବିଭିନ୍ନ ଯୋଗାସନ ଦେଖାଇ ତାଙ୍କୁ ଶିଖିବାରେ ସହଯୋଗ କରିଥିଲେ ବୋଲି କହନ୍ତି। ମୋବାଇଲ ଦେଖି ସେ ସବୁବେଳେ ଯୋଗାଭ୍ୟାସ କରିଥାନ୍ତି। ଖେଳକୁଦ ବୟସରେ ଯୋଗ ବ୍ୟାୟାମ ପ୍ରତି ତାଙ୍କର ଅହେତୁକ ଆଗ୍ରହ ସମସ୍ତଙ୍କୁ ଚକିତ କରିଛି। କୋଭିଡ୍ ସମୟରୁ ଗଁାରେ ପରିବାର ସହ ରହୁଛନ୍ତି ସାଇପ୍ରକାଶ ଓ ତାଙ୍କ ମା’। ତାଙ୍କ ଜେଜେ କବି, ସାହିତି୍ୟକ କୀର୍ତ୍ତନ ନାୟକ ଓ ଜେଜେମା’ ପ୍ରତିଭା ନାୟକଙ୍କ ଉଦ୍ୟମରେ ନିକଟରେ ସାଇ ଚେତନା ସାହିତ୍ୟ ସଂସଦ ପକ୍ଷରୁ ସଢ଼ାଠାରେ ଏବଂ ଜାମତିରା ସହିତ୍ୟ ଆସର ସମେତ ବିଭିନ୍ନ ମଞ୍ଚରେ ନିଜର ପ୍ରତିଭା ପ୍ରଦର୍ଶନ କରି ସମ୍ବର୍ଦ୍ଧିତ ହୋଇଛନ୍ତି। ଯୋଗ ସହିତ ନୃତ୍ୟଗୁରୁ ଦାଶରଥି ଜେନାଙ୍କଠାରୁ ଏବେ ନୃତ୍ୟ ଶିକ୍ଷା ଗ୍ରହଣ କରୁଛନ୍ତି। ଯୋଗରେ ଆଗକୁ ଯିବା ପାଇଁ ପରିବାରର ଇଚ୍ଛା ଥିଲେ ବି ଯୋଗଶିକ୍ଷା ଦେବାକୁ ଗଁା ତଥା ଏହି ଜିଲାରେ ସୁବିଧା ସୁଯୋଗ ନ ଥିବା କହିଛନ୍ତି ସାଇପ୍ରକାଶଙ୍କ ମା’। ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ନିଆଗଲେ ସାଇପ୍ରକାଶଙ୍କ ପ୍ରତିଭା ବିକଶିତ ହୋଇପାରନ୍ତା ବୋଲି ତାଙ୍କ ଜେଜେ କୀର୍ତ୍ତନ ଆଶାବ୍ୟକ୍ତ କରିଛନ୍ତି।
