ନୂଆଦିଲ୍ଲୀ,୮।୪(ପି.ଟି.): ଭୋପାଳସ୍ଥିତ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ସେଣ୍ଟରରେ ୩୬ ଜଣ କୋଭିଡ୍ ପଜିଟିଭ ବୋଲି ଟେଷ୍ଟରୁ ଜଣାପଡିଛି। ଏମାନଙ୍କ ମଧ୍ୟରେ ୨୪ଜଣ କ୍ରୀଡ଼ାବିତ୍ ଓ ୧୨ଜଣ ସପୋର୍ଟ ଷ୍ଟାଫ୍ ସାମିଲ ରହିଛନ୍ତି। ତେବେ ଏହି ଆଥ୍ଲେଟମାନେ ଆଗାମୀ ଟୋକିଓ ଅଲିମ୍ପିକ୍ସରେ ଅଂଶଗ୍ରହଣ କରିବେ ନାହିଁ।
ଏପ୍ରିଲ ୩ ଓ ୬ରେ କରାଯାଇଥିବା ପ୍ରାଥମିକ ଟେଷ୍ଟର ଦୁଇ ରାଉଣ୍ଡ ପରେ ଖେଳାଳିମାନେ ପଜିଟିଭ ଥିବା ଜଣାପଡିଥିଲା। ଅବଶ୍ୟ ଅଲିମ୍ପିକ୍ରେ ଅଂଶଗ୍ରହଣ କରିବାକୁ ଯାଉଥିବା ଖେଳାଳିଙ୍କ ପାଇଁ ଭୋପାଳସ୍ଥିତ ସାଇରେ କୌଣସି ଆବାସ ନାହିଁ। ଦୁଇ ରାଉଣ୍ଡର ଟେଷ୍ଟିଂ ପରେ ୨୪ ଆଥ୍ଲେଟ ଓ ୧୨ ସପୋର୍ଟ ଷ୍ଟାଫ୍ କୋଭିଡ୍ ପଜିଟିଭ ବୋଲି ଜଣାପଡିବା କଥା ସାଇର ଜଣେ ଅଧିକାରୀ ସୂଚନା ଦେଇଛନ୍ତି। ୧୨ଜଣ ସପୋର୍ଟ ଷ୍ଟାଫ୍ ନ୍ୟାଶନାଲ ସେଣ୍ଟର ଅଫ୍ ଏକ୍ସିଲେନ୍ସ (ଏନ୍ସିଓଇ)ର ସଦସ୍ୟ ରହିଛନ୍ତି। ସଂକ୍ରମିତ ଆଥ୍ଲେଟଙ୍କ ମଧ୍ୟରୁ କେତେଜଣ ଉଷୁ ଓ ଜୁଡୋ ପ୍ରତିଯୋଗିତା ଖେଳି ପ୍ରତ୍ୟାବର୍ତ୍ତନ କରିଛନ୍ତି। ସଂକ୍ରମିତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଅବଶ୍ୟ କୌଣସି ଖେଳାଳି ସଙ୍କଟଜନକ ସ୍ଥିତିରେ ନାହାନ୍ତି।
ସବୁପ୍ରକାର ନିୟମ ଓ କଟକଣା ମାନିବାକୁ ସାଇ ତରଫରୁ ସମସ୍ତଙ୍କୁ କଡ଼ା ନିର୍ଦ୍ଦେଶ ଦିଆଯାଇଛି। ନିୟମିତ ଭାବେ ପରୀକ୍ଷା କରାଇବାକୁ ମଧ୍ୟ କୁହାଯାଇଛି। ପୂର୍ବରୁ ପଟିଆଲା ଓ ବେଙ୍ଗାଲୁରୁସ୍ଥିତ ଏନ୍ସିଓଇରେ ମାର୍ଚ୍ଚ ୩୧ ରେ ୭୪୧ ଜଣଙ୍କର ଟେଷ୍ଟ କରାଯାଇଥିଲା। ଏଥିରେ ୩୦ଜଣ ପଜିଟିଭ ବୋଲି ଜଣାପଡିଥିଲା। ତେବେ ଏମାନଙ୍କ ମଧ୍ୟରେ କୌଣସି ଖେଳାଳି ଅଲିମ୍ପିକ୍ସ ଖେଳିବେ ନାହିଁ ବୋଲି ସ୍ପଷ୍ଟ କରାଯାଇଥିଲା।
