ପୁରୀ ଅଫିସ,୧୦।୪: ଚୈତ୍ରମାସ ଶୁକ୍ଳପକ୍ଷ ନବମୀ ତିଥିରେ ଶ୍ରୀମନ୍ଦିରର ପରମ୍ପରା ଅନୁଯାୟୀ ଶ୍ରୀମନ୍ଦିର ଏବଂ ଶ୍ରୀକ୍ଷେତ୍ରର ସାତ ସାହିରେ ପାରମ୍ପରିକ ସମରକଳା ସାହିଯାତ ଅନୁଷ୍ଠିତ ହେବ। ଚଳିତବର୍ଷ କରୋନା ପ୍ରଭାବ କମିଥିବାରୁ ସାହିଯାତରେ ପୁରୀବାସୀ ସାମିଲ ହେବେ। ସାହିର ଜାଗା ଆଖଡାରୁ ପୌରାଣିକ ରାମାୟଣର ଚରିତ୍ର ରାମ ଲକ୍ଷ୍ମଣ, ସୀତା, ରାବଣ, ନାକ, କାନ, ପର୍ଶୁରାମ, ହନୁମାନ, ସପ୍ତଶିରା ଓ ନାଗା ମେଢ ଆଦି ବାହାରି ସାହି ପରିକ୍ରମା କରିଥାନ୍ତି। ଏଥିରେ ସାତ ସାହିର ମୁରବି ଏବଂ ବାସିନ୍ଦାମାନେ ପଟୁଆରରେ ଯୋଗଦାନ କରିଥାନ୍ତି। ସାହି ପରିକ୍ରମା ପରେ ବେଶଧାରୀମାନେ ଶ୍ରୀମନ୍ଦିର ନିକଟକୁ ଯାଇ ବିଭିନ୍ନ କଳା କୌଶଳ ପ୍ରଦର୍ଶନ କରିଥାନ୍ତି। ଏହାପରେ ଶ୍ରୀମନ୍ଦିରରୁ ଠାକୁର ମଠକୁ ବିଜେ କରିଥାନ୍ତି। ପରେ ମଠ ପରିସରରେ ବିଭିନ୍ନ ନୀତିକାନ୍ତି ହୋଇଥାଏ।
ସାହିଯାତ ରାମନବମୀଠାରୁ ଆରମ୍ଭ ହୋଇ ରାମଅଭିଷେକ ପର୍ଯ୍ୟନ୍ତ ହୋଇଥାଏ। ତେବେ ଚଳିତବର୍ଷ ବିନା କଟକଣାରେ ପୂର୍ବଭଳି ପାଳନ ହେବ ପରମ୍ପରା। ସାହି ସାହିରେ ପାରମ୍ପରିକ ନୃତ୍ୟ ସହ ସମରକଳା ପ୍ରଦର୍ଶନ ହେବ। ସାହି ଆଖଡ଼ାରେ ସଭା ହେଉଥିଲା ବେଳେ ଜାଗା ପରିସରରେ ଯବୁକମାନଙ୍କର ଚାଲିଛି ଅଭ୍ୟାସ। ଚଳିତବର୍ଷ ଯେପରି ସାହିଯାତକୁ ଶୃଙ୍ଖଳିତ ଭାବେ କରାଯିବ ସେଥିପ୍ରତି ପ୍ରଶାସନ ସଜାଗ ରହିଛି। ସାହି ମୁରବିଙ୍କ ସହ ପ୍ରଶାସନ ବିଭିନ୍ନ ବିଷୟକୁ ନେଇ ଆଲୋଚନା କରିଛି। ୧୦ ଠାରୁ ୨୪ତାରିଖ ପର୍ଯ୍ୟନ୍ତ ହେବାକୁ ଥିବା ସାହିଯାତ ପାଇଁ ପ୍ରତ୍ୟେକ ସାହିକୁ ଯାତ ନିମନ୍ତେ ପ୍ରଶାସନ ପକ୍ଷରୁ ପ୍ରୋତ୍ସାହନ ମୂଳକ ରାଶି ପ୍ରଦାନ କରାଯିବାକୁ ଜିଲାପାଳ ସୂଚନା ଦେଇଛନ୍ତି। ସମ୍ପୃକ୍ତ ରାସ୍ତା ମରାମତି ଓ ଆଲୋକୀକରଣ ନିମନ୍ତେ ପୌରସଂସ୍ଥା ପକ୍ଷରୁ କାର୍ଯ୍ୟ ହୋଇଛି। ଆଇନଶୃଙ୍ଖଳା ନିମନ୍ତେ ଆବଶ୍ୟକ ପୋଲିସ ମୁତୟନ ରହିବେ। ପାରସ୍ପରିକ ସହଯୋଗ ନିମନ୍ତେ ସାହି ଆଖଡ଼ାର ମୁରବିଙ୍କୁ ନେଇ କମିଟି ଗଠନ କରାଯାଇଛି। ସାହି ମୁରବିମାନେ ପ୍ରଶାସନକୁ ରୁଟ ଚାର୍ଟ ପ୍ରଦାନ କରିଛନ୍ତି। ସେହିପରି ମେଢ ବାହାର କରିବା ନିମନ୍ତେ ସମୟ ନିର୍ଘଣ୍ଟ କରାଯାଇଛି।
