ବାରିପଦା ଅଫିସ,୨୬ ।୨ ନିରାପଦ ପ୍ରସବ ନିମନ୍ତେ ଅର୍ଥ ସଞ୍ଚୟ ପାଇଁ ଟ୍ରଲି ଟାଣୁଥିବା ଆସନ୍ନ ପ୍ରସବା ଲକ୍ଷ୍ମୀପ୍ରିୟା ଦାସଙ୍କୁ ମିଳିଛି ସାହାରା। ଏ ନେଇ ଧରିତ୍ରୀରେ ‘ଟ୍ରଲି ଟାଣୁଛନ୍ତି ଆସନ୍ନ ପ୍ରସବା’ ଖବର ପ୍ରକାଶ ପାଇବା ପରେ ପ୍ରଶାସନ ପକ୍ଷରୁ ତପତ୍ରତା ପ୍ରକାଶ ପାଇଥିଲା। ଶୁକ୍ରବାର ଆଇନ ସେବା ପ୍ରାଧିକରଣଙ୍କ ନିର୍ଦ୍ଦେଶ କ୍ରମେ ଜିଲା ପ୍ରଶାସନର ସହଯୋଗରେ ଲକ୍ଷ୍ମୀଙ୍କୁ ବାରିପଦା ସ୍ଥିତ ୱାନ୍ ଷ୍ଟପ୍ ସେଣ୍ଟରରେ ରଖାଯାଇଛି। ସ୍ବାସ୍ଥ୍ୟ ସେବାଠାରୁ ଆରମ୍ଭ କରି ପ୍ରସବ ପର୍ଯ୍ୟନ୍ତ ତାଙ୍କର ସମସ୍ତ ଚିକିତ୍ସା ଖର୍ଚ୍ଚ ବହନ କରାଯିବ ବୋଲି ସୂଚନା ମିଳିଛି। ଲକ୍ଷ୍ମୀଙ୍କ ଆଧାର କାର୍ଡ କରାଯାଇ ଖୁବଶୀଘ୍ର ସରକାରୀ ସହାୟତା ଯୋଗାଇ ଦିଆଯିବ ବୋଲି ଜିଲା ଆଇନସେବା ପ୍ରାଧିକରଣର ସଚ୍ଚିବ ସୌମ୍ୟରୂପ ସାହୁ କହିଛନ୍ତି।
ଅନୁଯାୟୀ, ଦୁଇ ଓଳି ଖାଇବା ପାଇଁ ବାରିପଦା ସହରର ଗଳିକନ୍ଦିରେ ଘୁରୁ ବୁଲୁଥିଲେ ଲକ୍ଷ୍ମୀ ା ପେଟରେ ବଢୁଥିବା ଭ୍ରୂଣ ଓ ଏକ ବର୍ଷକର ପୁତ୍ର ସନ୍ତାନ ପାଇଁ ଅଳିଆଗଦାରୁ ଜରି, କାଚବୋତଲ ଓ ପ୍ଲାଷ୍ଟିକ ଗୋଟାଇ ସେ ଅର୍ଥ ରୋଜଗାର କରୁଥିଲେ। ନିରାପଦ ପ୍ରସବ ନିମନ୍ତେ ପେଟକୁ କାଟି ଅର୍ଥ ସଞ୍ଚୟ କରୁଥିଲେ। ଆଧାରକାର୍ଡ ନ ଥିବାରୁ ମମତା ଯୋଜନାରେ ଅଙ୍ଗନୱାଡି କେନ୍ଦ୍ରରୁ କୌଣସି ସହାୟତା ପାଇପାରୁ ନ ଥିଲେ। ଏଭଳି ଦୟନୀୟ ସ୍ଥିତିରେ ସ୍ବାମୀ ବିକାଶ ତାଙ୍କଠାରୁ ଦୂରେଇ ଯିବାରୁ ଭୋକ ଉପାସରେ ଲକ୍ଷ୍ମୀ ଡହଳ ବିକଳ ହେଉଥିଲେ। ଜୀବନ ସଂଗ୍ରାମରେ ସନ୍ତାନର ଭବିଷ୍ୟତ ପାଇଁ ଟ୍ରଲି ଟାଣି ରୋଜଗାର କରୁଥିଲେ। ତାଙ୍କ ଦୟନୀୟ ସ୍ଥିତି ପ୍ରଶାସନର ଦୃଷ୍ଟି ଗୋଚର ହେବା ପରେ ସ୍ବେଚ୍ଛାସେବୀ ରବୀନ୍ଦ୍ର କୁମାର ମହାନ୍ତି ଓ ମହିଳା କର୍ମଚାରୀମାନେ ପହଞ୍ଚି ଲକ୍ଷ୍ମୀଙ୍କ ପ୍ରତି ସହାୟତାର ହାତ ବଢ଼ଇଛନ୍ତି।
