ଚଣ୍ଡିଗଡ଼,୭ ।୬: ପଞ୍ଜାବର ପୂର୍ବତନ କଂଗ୍ରେସ ମନ୍ତ୍ରୀ ସାଧୁ ସିଂ ଧର୍ମସୋତଙ୍କୁ ଗିରଫ କରାଯାଇଛି । ଏକ ଭ୍ରଷ୍ଟାଚାର ମାମଲାରେ ଭିଜିଲାନ୍ସ ପକ୍ଷରୁ ତାଙ୍କୁ ଗିରଫ କରାଯାଇଛି । କ୍ୟାପଟେନ ଅମରିନ୍ଦର ସିଂଙ୍କ ସରକାରରେ ଧର୍ମସୋତ ମନ୍ତ୍ରୀ ଥିଲେ । ସୋମବାର ବିଳମ୍ବିତ ରାତିରେ ତାଙ୍କୁୁ ଗିରଫ କରାଯାଇଛି । ମୋହାଲି ଡିଏଫଓ ଗିରଫ ହେବା ପରେ ଧରାପଡିଥିବା କଣ୍ଟ୍ରାକ୍ଟର ପୂର୍ବତନ ମନ୍ତ୍ରୀ ଧର୍ମସୋତଙ୍କୁ ଲାଞ୍ଚ ଦେବା କଥା କହିଥିଲେ । ଏହି ମାମଲାରେ ଅନ୍ୟ ୨ ଜଣ ଦଲାଲ ବି ଗିରଫ ହୋଇଛନ୍ତି ।
ସୂଚନାଯୋଗ୍ୟ, ପୂର୍ବତନ ମନ୍ତ୍ରୀ ଧର୍ମସୋତଙ୍କ ଉପରେ ଚଣ୍ଡିଗଡ଼ ନିକଟ ମୋହାଲିର ଫରେଷ୍ଟ ଲ୍ୟାଣ୍ଡ ଉପରେ ଅନୁମତିକୁ ନେଇ ଜାଲିଆତି ଓ ଲାଞ୍ଚ ନେଇଥିବା ଅଭିଯୋଗ ହୋଇଛି । ଅଭିଯୁକ୍ତଙ୍କୁ ପଚରାଉଚରା ପରେ ଭିଜିଲାନ୍ସର ଟିମ କହିଛି ଧର୍ମସୋତ ଗୋଟିଏ ଗଛ କାଟିବା ବଦଳରେ ୫୦୦ ଟଙ୍କା ଲାଞ୍ଚ ନେଉଥିଲେ । କେବଳ ଏତିକି ନୁହେଁ ନୂଆ ଚାରା ଲଗାଇବାରେ ବି ସେ ଲାଞ୍ଚ ନେଉଥିଲେ । ଲାଞ୍ଚର ସମସ୍ତ ଭାଗ ସିଧାସଳଖ ଧର୍ମସୋତଙ୍କ ନିକଟକୁ ଯାଉଥିଲା ।
ଗତ କିଛିଦିନ ତଳେ ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ ସାଧୁ ସିଂ ଧର୍ମସୋତଙ୍କ ବିରୋଧରେ କଥିତ ପୋଷ୍ଟ ମ୍ୟାଟ୍ରିକ ଛାତ୍ରବୃତ୍ତି ଯୋଜନା ଜାଲିଆତି ସମ୍ପର୍କିତ ମାମଲାରେ କାର୍ଯ୍ୟାନୁଷ୍ଠାନର ସଙ୍କେତ ଦେଇଥିଲେ ।
