ଇସଲାମାବାଦ୍, ୫।୪ : ପାକିସ୍ତାନରେ ରାଜନୈତିକ ସଙ୍କଟ କ୍ରମାଗତ ଭାବେ ବଢ଼ିବାରେ ଲାଗିଛି। ପାକିସ୍ତାନ ବିଶେଷଜ୍ଞମାନେ ମଧ୍ୟ ଏନେଇ ବହୁ ଚିନ୍ତିତ। ଆଗାମୀ କିଛି ଦିନ ମଧ୍ୟରେ ପାକିସ୍ତାନରେ କଣ ଘଟିବ ତାହା କେହି ଜାଣି ନାହାଁନ୍ତି। ଇମ୍ରାନ ଖାନ କ୍ଷମତାରେ ରହିବେ ନା ଶାହବାଜ ସରିଫ କିମ୍ବା ଅନ୍ୟ କେହି ନୂଆ ପ୍ରଧାନମନ୍ତ୍ରୀ ହେବେ? ପୁଣି ନିର୍ବାଚନ ହେବ ନା ସେନା ଦାୟିତ୍ୱ ଗ୍ରହଣ କରିବ? ଏଥିମଧ୍ୟରୁ କୌଣସିଟି ବି ହୋଇପାରେ କିନ୍ତୁ କ’ଣ ଘଟିବ ତାହା ଏବେ ସ୍ପଷ୍ଟ ନୁହେଁ।
୨୨ କୋଟି ଜନସଂଖ୍ୟା ବିଶିଷ୍ଟ ଆଣବିକ ସମୃଦ୍ଧ ଦେଶ ପାକିସ୍ଥାନ ହେଉଛି ଭାରତର ଏପରି ପଡୋଶୀ ଦେଶ, ଯାହାକୁ ଚାହିଁଲେ ମଧ୍ୟ ଭାରତ ଅବହେଳା କରିପାରିବ ନାହିଁ। ନିକଟ ଅତୀତରେ ଇମ୍ରାନ ଖାନ ଅଭିଯୋଗ କରି କହିଛନ୍ତି ଯେ ଆମେରିକାର ରାଷ୍ଟ୍ରପତି ଜୋ ବାଇଡେନ୍ ସରକାର ତାଙ୍କୁ କ୍ଷମତାରୁ ହଟାଇବାକୁ ଚାହୁଁଛନ୍ତି।
ଏନେଇ ରୁଷିଆ ପକ୍ଷରୁ ଅଭିଯୋଗ କରାଯାଇଛି। ରୁଷିଆ ବିଦେଶ ମନ୍ତ୍ରଣାଳୟ ପ୍ରତିନିଧି ମାରିଆ ଜଖାରୋଓ୍ବା ଏସମ୍ପର୍କରେ ମଙ୍ଗଳବାର କହିଛନ୍ତି। ଜାଣିଶୁଣି ଆମେରିକା ଇମ୍ରାନ୍ଙ୍କୁ ଦଣ୍ଡଦେବାକୁ ଚାହୁଁଛି ବୋଲି ସେ ପ୍ରକାଶ କରିଛନ୍ତି।
ଅପରପକ୍ଷରେ, ଇମ୍ରାନ ଚାଇନା ଏବଂ ରୁଷିଆ ସହିତ ସମ୍ପର୍କକୁ ମଜବୁତ କରିବାକୁ ଚେଷ୍ଟା କରିଛନ୍ତି। ଏହା ସହିତ ୟୁକ୍ରେନ୍ ଆକ୍ରମଣ ସମୟରେ ଇମ୍ରାନ୍ ରୁଷିଆ ଗସ୍ତରେ ମଧ୍ୟ ଯାଇଛନ୍ତି। ଫଳରେ ଆମେରିକା କ୍ରୋଧାନ୍ବିତ ହୋଇ ଇମ୍ରାନ୍ଙ୍କ ଉପରେ ପ୍ରତିଶୋଧ ନେଉଥିବା ଚର୍ଚ୍ଚା ହେଉଛି।
ନିଜ କାର୍ଯ୍ୟକାଳ ମଧ୍ୟରେ ଇମ୍ରାନ ଚାଇନା ଏବଂ ପାକିସ୍ତାନ ମଧ୍ୟରେ ସମ୍ପର୍କ ବୃଦ୍ଧି ଉପରେ କ୍ରମାଗତ ଭାବରେ ଗୁରୁତ୍ୱାରୋପ କରିଛନ୍ତି। ଚାଇନା-ପାକିସ୍ତାନ ଅର୍ଥନୈତିକ କରିଡୋର ଦୁଇ ଦେଶକୁ ନିକଟତର କରିଛି। ଦୁଇ ଦେଶ ମଧ୍ୟରେ ସମ୍ପର୍କ ମଧ୍ୟ ସାମରିକ ସ୍ତରରେ ମଧ୍ୟ ଅନ୍ତରଙ୍ଗ ହୋଇଛି।
ପାକିସ୍ତାନର ସାମ୍ପ୍ରତିକ ସଙ୍କଟ ବିଷୟରେ ଚାଇନା କହିଛି ଯେ ଅନ୍ୟ ଦେଶର ଆଭ୍ୟନ୍ତରୀଣ କାର୍ଯ୍ୟରେ ହସ୍ତକ୍ଷେପ ନକରିବା ନୀତିକୁ ସର୍ବଦା ଚାଇନା ପାଳନ କରିଥାଏ। ପାକିସ୍ତାନର ସର୍ବକାଳୀନ ରଣନୈତିକ ସହଯୋଗ ତଥା ପଡୋଶୀ ଭାବରେ ଚାଇନା ଆନ୍ତରିକତାର ସହ ଆଶା କରୁଛି ଯେ ପାକିସ୍ତାନର ସମସ୍ତ ପକ୍ଷ ଏକତା ବଜାୟ ରଖିପାରିବେ ଏବଂ ମିଳିତ ଭାବରେ ଦେଶର ସ୍ଥିରତା ବଜାୟ ରହିବ।
