କ୍ୱିଭ,୧୬ ।୧: ଦକ୍ଷିଣ ପୂର୍ବ ୟୁକ୍ରେନ ସହର ନିପ୍ରୋରେ ରବିବାର ରୁଷିଆ ପକ୍ଷରୁ ହୋଇଥିବା ମିଶାଇଲ ଆକ୍ରମଣରେ ୨୫ରୁ ଅଧିକ ଲୋକଙ୍କ ମୃତ୍ୟୁ ହୋଇଛି । ୟୁକ୍ରେନ୍ ରାଷ୍ଟ୍ରପତି ଭୋଲୋଡେମିର ଜେଲେନସ୍କି କହିଛନ୍ତି ରୁଷିଆ ଏକ ଘରୋଇ କୋଠାକୁ ଟାର୍ଗେଟ କରି ଏହି ମିଶାଇଲ ମାଡ କରିଛି । ରବିବାର ବିଳମ୍ବିତ ସନ୍ଧ୍ୟା ସୁଦ୍ଧା ୨୫ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା । ଜେଲେନସ୍କି କହିଛନ୍ତି ଏହି ଆକ୍ରମଣରେ ୭୩ ଲୋକ ଆହତ ହୋଇଛନ୍ତି । ୩୯ଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ଏହାସହ ୪୩ ଜଣ ନିଖୋଜ ଅଛନ୍ତି ।
ୟୁକ୍ରେନର ସେନା ମୁଖ୍ୟ ଜେନରାଲ ୱାଲେରି ଜେଲୁଝନି କହିଛନ୍ତି, ରୁଷିଆ ଶନିବାର ରାତିଠାରୁ ସାରା ଦେଶରେ ମିଶାଇଲ ଆକ୍ରମଣ କରି ଚାଲିଛି । ଶନିବାର ରାତି ରବିବାର ଦ୍ୱିପ୍ରହର ପର୍ଯ୍ୟନ୍ତ ରୁଷିଆ ପ୍ରାୟ ୧୦୦ରୁ ଅଧିକ ମିଶାଇଲ ମାଡ କରିଛି । ଏଥିମଧ୍ୟରୁ ୩୩ରୁ ଅଧିକ ମିଶାଇଲ ରାଜଧାନୀ କ୍ୱିଭରେ ପଡିଛି । ଏହାରି ଭିତରୁ ୨୧ଟିକୁ ଏୟାର ଡିଫେନ୍ସ ସିଷ୍ଟମ ଆକାଶରେ ହିଁ ନଷ୍ଟ କରି ଦେଇଛି । ୟୁକ୍ରେନ୍ ବାୟୁସେନା କହିଛି ନିପ୍ରୋରେ କେଏଚ-୨୨ ମିଶାଇଲ ଦ୍ୱାରା ଆକ୍ରମଣ କରାଯାଇଛି । ୟୁକ୍ରେନ୍ ଏୟାର ଡିଫେନ୍ସ ସିଷ୍ଟମ ଏହାକୁ ଇଣ୍ଟରସେପ୍ଟ କରିପାରି ନାହିଁ ।
