ଓ୍ବାଶିଂଟନ,୧୨।୧ : ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଉଭୟ ଦେଶ ବହୁ ଅସୁବିଧାର ସମ୍ମୁଖୀନ ହୋଇଛନ୍ତି। ୟୁକ୍ରେନ ଏଥିରେ ଅଧିକ ସମସ୍ୟାର ସମ୍ମୁଖୀନ ହୋଇଛି। କିନ୍ତୁ ବିଶେଷଜ୍ଞମାନେ ମପୋଷଣ କରିଛନ୍ତି ଯେ ଏହି ଯୁଦ୍ଧର ପ୍ରଭାବ ଦୀର୍ଘ ଦିନ ପର୍ଯ୍ୟନ୍ତ ରୁଷିଆ ଉପରେ ରହିବ ଏବଂ ଦେଶ ଯୁଦ୍ଧ ପରବର୍ତ୍ତୀ ଭାର ବହନ କରିପାରିବ ନାହିଁ। ଗ୍ଲୋବାଲ ଷ୍ଟ୍ରାଟେଜିଷ୍ଟ ଏବଂ ଆନାଲିଷ୍ଟର ଏକ ସର୍ଭେରେ କୁହାଯାଇଛି ଯେ ଆସନ୍ତା ୧୦ ବର୍ଷ ମଧ୍ୟରେ ରୁଷିଆ ଅସ୍ତିତ୍ୱ ରହିବ ନାହିଁ। ଏହାର ମୁଖ୍ୟ କାରଣ ହେଉଛି ୟୁକ୍ରେନ ଯୁଦ୍ଧ।
ସ୍କଟକ୍ରଫ୍ଟ ସେଣ୍ଟର ଫର ଷ୍ଟ୍ରାଟେଜୀ ଏବଂ ଆଟଲାଣ୍ଟିକ କାଉନସିଲର ସୁରକ୍ଷା ପକ୍ଷରୁ ସର୍ଭେରେ ୧୬୭ ବିଶ୍ୱସ୍ତରୀୟ ରଣନୀତିଜ୍ଞଙ୍କ ମତକୁ ଅନ୍ତର୍ଭୁକ୍ତ କରିଛି। ଯାହା ଅନୁଯାୟୀ ଆସନ୍ତା ଦଶନ୍ଧି ମଧ୍ୟରେ ରୁଷିଆର ପତନ ହେବାର ଆଶଙ୍କା ଅଛି।
ଏହି ସର୍ଭେରେ ଘରୋଇ କ୍ଷେତ୍ର, ଏକାଡେମୀ, ଏନଜିଓ ତଥା ସ୍ବାଧୀନ ପରାମର୍ଶଦାତା ମଧ୍ୟ ସାମିଲ ହୋଇଥିଲେ। ୟୁକ୍ରେନ ସହିତ ରୁଷିଆର ଯୁଦ୍ଧ ପୃଥିବୀର ବୃହତ୍ତମ ଆଣବିକ ଅସ୍ତ୍ରଶସ୍ତ୍ର ସହିତ ଏକ ବୃହତ ଶକ୍ତିସ୍ତରର ଅଶାନ୍ତିକୁ ତ୍ୱରାନ୍ବିତ କରିପାରେ ବୋଲି ଆମେରିକାର ଏକ ଥିଙ୍କଟକ ଏକ ସର୍ଭେରେ କହିଛି।
ସର୍ବେକ୍ଷଣ କରାଯାଇଥିବା ୪୬ ପ୍ରତିଶତ ଲୋକ ଭୟ ପ୍ରକାଶ କରିଥିଲେ ଯେ ୨୦୩୩ ସୁଦ୍ଧା ରୁଷିଆର ପତନ ଘଟିବ। ପ୍ରାୟ ୪୦ ପ୍ରତିଶତ ଉତ୍ତରଦାତା କହିଛନ୍ତି ଆଭ୍ୟନ୍ତରୀଣ ବିପ୍ଳବ, ଗୃହଯୁଦ୍ଧ କିମ୍ବା ରାଜନୈତିକ ଅସ୍ଥିରତା ସୃଷ୍ଟି ହେବାର ଆଶଙ୍କା ରହିଛି। ୪ ପ୍ରତିଶତ ଲୋକ ପରମାଣୁ ଯୁଦ୍ଧର ବିପଦର ମଧ୍ୟ ଆଶଙ୍କା କରିଛନ୍ତି।
