କିଭ୍, ୭ା୩ : ୟୁକ୍ରେନ୍ର ପୂର୍ବଭାଗରେ ଥିବା ବାଖମୁଟ୍ ସହରକୁ ରୁଷିଆ ଚାରିପଟୁ ଘେରିଲାଣି। ସହରକୁ କାବୁ କରିବା ଲାଗି ରୁଷିଆ ସୈନ୍ୟ ଜୋର୍ଦାର ଉଦ୍ୟମ ଚଳାଇଥିବାବେଳେ ଏହାକୁ ହାତଛଡ଼ା ନ କରିବାକୁ କିଭ୍ ସୈନ୍ୟ ପ୍ରତିବଦ୍ଧ। ସେମାନେ ମୁକାବିଲା ପାଇଁ ପୂର୍ଣ୍ଣ ପ୍ରସ୍ତୁତିରେ ରହିଛନ୍ତି। ବାଖମୁଟ୍କୁ ଦଖଲକୁ ନେବା ଲାଗି ରୁଷିଆ ୬ ମାସ ହେଲା ଉଦ୍ୟମ ଚଳାଇଛି। ରୁଷିଆ ସୈନ୍ୟଙ୍କ ଘନ ଘନ ଆକ୍ରମଣରେ ହଜାର ହଜାର ଜୀବନ ଗଲାଣି। ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ଉଚ୍ଚ ସାମରିକ ଅଧିକାରୀମାନଙ୍କ ସହ ବୈଠକ କରିଛନ୍ତି। ୟୁକ୍ରେନ୍ ସ୍ଥିତି ମଜଭୁତ କରିବା ଲାଗି ବୈଠକରେ ସେନା ଅଧିକାରୀମାନେ ମତ ଦେଇଥିଲେ। ଅନ୍ୟ ପକ୍ଷରେ ରୁଷିଆ ସୈନ୍ୟ ଡୋନେସ୍କ ସହରାଞ୍ଚଳ ଓ ଆଖପାଖ ଗ୍ରାମ ଉପରେ ଜୋର୍ଦାର ସେଲ୍ ମାଡ଼ କରିଚାଲିଛି। ବାଖମୁଟ୍ ବାସିନ୍ଦାଙ୍କୁ ଶେଷ କରିଦେବା ଲାଗି ମସ୍କୋ ଅଧିକ ସୈନ୍ୟ ସମ୍ବଳ ନିୟୋଜିତ କରିଛି। ସେଲ୍ ମାଡ଼ରୁ ରକ୍ଷା ପାଇବା ପାଇଁ ନାଗରିକମାନେ ସହର ଛାଡ଼ି ପଳାଇଯାଉଛନ୍ତି।
ୟୁକ୍ରେନ୍ ଉପରେ ରୁଷିଆ ଆକ୍ରମଣକୁ ବର୍ଷେ ବିତିଥିବାବେଳେ ମସ୍କୋକୁ କ୍ରମାଗତ ସମସ୍ୟାର ସମ୍ମୁଖୀନ ହେବାକୁ ପଡ଼ିଛି। ବିଶେଷଜ୍ଞମାନଙ୍କ କହିବା ଅନୁଯାୟୀ ବାଖମୁଟ୍ର କୌଣସି ବଡ଼ ରଣନୀତିକ ମୂଲ୍ୟ ନାହିଁ। ତେବେ ଏହାକୁ ହାତେଇବା ଦ୍ୱାରା ଯୁଦ୍ଧ ଏକ ନୂଆ ମୋଡ଼ ନେବ ବୋଲି କୁହାଯାଉଛି। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଯୁଦ୍ଧକ୍ଷେତ୍ରରୁ କିଛି ଭଲ ଖବର ପାଇବା ପାଇଁ ବ୍ୟସ୍ତ ହୋଇପଡ଼ିଲେଣି। ଅନ୍ୟପକ୍ଷରେ ବର୍ଷେ ହେଲା ପାଶ୍ଚାତ୍ୟ ସହଯୋଗୀଙ୍କ ସହାୟତାରେ ୟୁକ୍ରେନ୍ ଲଢ଼େଇ ଜାରି ରଖିବା ସହ ନିଜ ଅଞ୍ଚଳକୁ ହାତଛଡ଼ା ନ କରିବା ଜିଦ୍ରେ ଅଟଳ ରହିଛି। ନିକଟରେ ଆମେରିକା ପ୍ରତିରକ୍ଷା ସଚିବ ଲିଓଡ ଅଷ୍ଟିନ୍ ଜୋର୍ଡାନ ଗସ୍ତରେ ଥିବାବେଳେ ବାଖ୍ମୁଟର ରଣନୀତିକ ଏବଂ ପରିଚାଳନା ମୂଲ୍ୟଠାରୁ ପ୍ରତୀକାତ୍ମକ ମୂଲ୍ୟ ଅଧିକ ବୋଲି କହିଥିଲେ।
