ମସ୍କୋ/କ୍ୱିଭ୍,୧୭।୩ : ୟୁକ୍ରେନ ଉପରେ ରୁଷିଆର ଆକ୍ରମଣକୁ ୨୨ ଦିନ ବିତିଛି। ଆମେରିକା ସମେତ ନାଟୋ ଦେଶଗୁଡ଼ିକ ରୁଷିଆ ବିରୁଦ୍ଧରେ ୟୁକ୍ରେନକୁ ଅଧିକ ଅସ୍ତ୍ରଶସ୍ତ୍ର ଯୋଗାଇଦେବାକୁ ପ୍ରତିଶ୍ରୁତି ଦେଇଛନ୍ତି। ଆମେରିକାର ରାଷ୍ଟ୍ରପତି ଜୋ ବାଇଡେନ ଭ୍ଲାଦିମିର ପୁଟିନଙ୍କୁ ଯୁଦ୍ଧ ଅପରାଧୀ ବୋଲି କହିଛନ୍ତି। ପୁଟିନ ଏହା ଉପରେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ଅପରପକ୍ଷରେ, ୟୁକ୍ରେନ ଏକ ମାନବିକ ସଙ୍କଟ ଦେଇ ଗତି କରୁଛି। ରୁଷିଆ ୟୁକ୍ରେନ ମଧ୍ୟରେ ଶାନ୍ତି ଆଲୋଚନା ଏପର୍ଯ୍ୟନ୍ତ ଫଳପ୍ରଦ ହୋଇନାହିଁ ।
ତେବେ ୟୁକ୍ରେନ ଗଣମାଧ୍ୟମ ଅନୁଯାୟୀ ରୁଷିଆ ଏକ ଶାନ୍ତି ଯୋଜନା ପ୍ରସ୍ତୁତ କରିଛି। ୟୁକ୍ରେନରେ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବାକୁ ଅନ୍ତର୍ଜାତୀୟ କୋର୍ଟ ଅଫ ଜଷ୍ଟିସ (ଆଇସିଜେ) ରୁଷିଆକୁ ନିର୍ଦ୍ଦେଶ ଦେଇଛନ୍ତି। ଏବେ ଏହା ଦେଖିବାକୁ ପଡ଼ିବ ଯେ ରୁଷ ଅନ୍ତର୍ଜାତୀୟ କୋର୍ଟର ଏହି ଆଦେଶକୁ ଗ୍ରହଣ କରୁଛି କି ନାହିଁ ।
ୟୁକ୍ରେନର ଦ କ୍ୱିଭ ଇଣ୍ଡିପେଣ୍ଡେଣ୍ଟ ଖବର କାଗଜ ଅନୁଯାୟୀ ଯୁଦ୍ଧକୁ ରୋକିବା ପାଇଁ ଏକ ସମ୍ଭାବ୍ୟ ଶାନ୍ତି ଯୋଜନା ପ୍ରସ୍ତୁତ କରାଯାଇଛି। ଏହି ଚୁକ୍ତିରେ ଅସ୍ତ୍ରବିରତି ଉଲ୍ଲଂଘନ ଏବଂ ରୁଷିଆର ସୈନ୍ୟ ପ୍ରତ୍ୟାହାର ଅନ୍ତର୍ଭୁକ୍ତ । ଯଦି କ୍ୱିଭ୍ ନାଟୋ ସଦସ୍ୟତା ପାଇଁ ନିଜର ଅଭିଳାଷ ତ୍ୟାଗ କରେ ଏବଂ ନିଜର ସୀମାକୁ ସ୍ବୀକାର କରିନିଏ ତେବେ ଶାନ୍ତି ଆଲୋଚନା ଆଗକୁ ବଢ଼ିବ।
ତେବେ ବର୍ତ୍ତମାନ ସୁଦ୍ଧା ଏ ସମ୍ପର୍କରେ କୌଣସି ସରକାରୀ ସୂଚନା ପ୍ରକାଶ କରାଯାଇ ନାହିଁ। ରୁଷିଆର ବୈଦେଶିକ ମନ୍ତ୍ରୀ ସର୍ଗେଇ ଲାଓ୍ବରୋଓ୍ବ କହିଛନ୍ତି ଯେ ୟୁକ୍ରେନ ପାଇଁ ଏକ ନିରପେକ୍ଷ ସାମରିକ ସ୍ଥିତିକୁ ଗୁରୁତର ସହ ଆଲୋଚନା କରାଯାଉଛି। ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଯୁଦ୍ଧକୁ ଶେଷ କରିବା ପାଇଁ ରୁଷିଆର ଦାବିକୁ ଅଧିକ ଯଥାର୍ଥବାଦୀ କହିଛନ୍ତି।
ଜେଲେନସ୍କି କହିଛନ୍ତି ଯେ ରୁଷିଆର ସୈନ୍ୟମାନେ ୟୁକ୍ରେନର ଭିତର ଭାଗରେ ପହଞ୍ଚିବାରେ ଅସମର୍ଥ ହୋଇଥିଲେ ମଧ୍ୟ ଏବେ ବି ମାରିଅପୋଲ ସମେତ ବହୁ ସହରରେ ପ୍ରବଳ ଗୁଳିଗୋଳା ବିନିମୟ ଜାରି ରହିଛି। ଜେଲେନସ୍କି କହିଛନ୍ତି ଯେ ତାଙ୍କ ଦେଶ ନାଟୋରେ ଯୋଗ ଦେଇପାରିବ ନାହିଁ। ତେବେ ପରବର୍ତ୍ତୀ ସମୟ ହିଁ ଯୁଦ୍ଧର ସ୍ଥିତି ନିର୍ଦ୍ଧାରଣ କରିବ ବୋଲି ସେ କହିଛନ୍ତି।
