ମସ୍କୋ,୧୪।୧୧: ରୁଷିଆ ଏବଂ ୟୁକ୍ରେନ୍ ସୀମାରେ ଉତ୍ତେଜନା ବଢ଼ିବାରେ ଲାଗିଛି। ଏହି ମୁହାଁମୁହିଁ ପରିସ୍ଥିତି ଯୋଗୁ ଯୁଦ୍ଧ ଆଶଙ୍କା ସୃଷ୍ଟି ହୋଇଛି। ଇତିମଧ୍ୟରେ ଦୁଇ ଦେଶ ପକ୍ଷରୁ ସୀମାରେ ତୋପ ଏବଂ ଟ୍ୟାଙ୍କ ସହିତ ଅନ୍ୟାନ୍ୟ ଯୁଦ୍ଧ ସରଞ୍ଜାମ ଠୁଳ କରିବାରେ ଲାଗିଛନ୍ତି। ଦୁଇଦେଶ ସୀମାରେ ଜାରି ରହିଥିବା ସମରସଜ୍ଜାକୁ ନେଇ ଅନ୍ତର୍ଜାତୀୟସ୍ତରରେ ଚିନ୍ତା ବଢ଼ିବାରେ ଲାଗିଛି।
ରୁଷିଆ ୟୁକ୍ରେନ ସୀମାରେ ବହୁ ସଂଖ୍ୟକ ଟ୍ୟାଙ୍କ, ଆର୍ଟିଲିରି, ଯୁଦ୍ଧ ଯାନ ଏବଂ ସୈନିକଙ୍କୁ ମୁତୟନ କରିଛି। ରୁଷିଆର ଏହି ପଦକ୍ଷେପ ଆଶଙ୍କା ସୃଷ୍ଟି କରିଛି ଯେ ରାଷ୍ଟ୍ରପତି ବ୍ଲାଡିମୀର ପୁଟିନ ୟୁକ୍ରେନ ଉପରେ ଆକ୍ରମଣ କରିବାକୁ ପ୍ରସ୍ତୁତ ହେଉଛନ୍ତି। ଏହାପୂର୍ବରୁ ଆମେରିକା ଏହାର ୟୁରୋପୀୟ ସହଯୋଗୀମାନଙ୍କୁ ମଧ୍ୟ ଚେତାବନୀ ଦେଇଥିଲା ଯେ ରୁଷିଆ ୟୁକ୍ରେନ ଉପରେ ଆକ୍ରମଣ ଯୋଜନା କରୁଛି।
ସୋସିଆଲ ମିଡିଆରେ ଭାଇରାଲ ହୋଇଥିବା ଭିଡିଓରେ ଏହା ସ୍ପଷ୍ଟ ଜଣାପଡୁଛି ଯେ ରୁଷିଆ ଓ୍ବୋରୋନେଝ ସହର ନିକଟରେ ନିଜର ସୈନ୍ୟବାହିନୀଙ୍କୁ ଠୁଳ କରୁଛି। ଓ୍ବୋରୋନେଝ ୟୁକ୍ରେନ ସୀମାଠାରୁ ୩୨୦ କିଲୋମିଟର ଦୂରରେ ରହିଛି। ଗୁପ୍ତଚର ମନିଟରିଂ ସଂସ୍ଥା ଜେନ୍ସଙ୍କ ଅନୁଯାୟୀ ରୁଷିଆର ଏହି ସହରରେ ବହୁ ସଂଖ୍ୟକ ଟ୍ୟାଙ୍କ, ଆର୍ଟିଲିରି ଏବଂ ସଶସ୍ତ୍ର ଯାନ ଜମା ହେବାରେ ଲାଗିଛି। ଏହି ଯୁଦ୍ଧ ଯାନଗୁଡିକ ମସ୍କୋରୁ ଆସିଛି। ଏଥିରେ ଏବଂ ଟି-୮୦-ୟୁ ମୁଖ୍ୟ ଯୁଦ୍ଧ ଟ୍ୟାଙ୍କ ମଧ୍ୟ ରହିଛି। କୃଷ୍ଣ ସାଗରରେ ଯୁଦ୍ଧାଭ୍ୟାସ କରି ନାଟୋ ରୁଷିଆକୁ ଚ୍ୟାଲେଞ୍ଜ କରୁଛି।
ପୁଟିନ ଏଠାରେ ନାଟୋ ଦେଶଗୁଡିକର କାର୍ଯ୍ୟକଳାପକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ସେ କହିଛନ୍ତି ଯେ କୃଷ୍ଣ ସାଗରରେ ଯୁଦ୍ଧାଭ୍ୟାସ କରି ନାଟୋ ରୁଷିଆକୁ ଚ୍ୟାଲେଞ୍ଜ କରୁଛି। ଏହି ଯୁଦ୍ଧାଭ୍ୟାସ ସମୟରେ ସେ ଷ୍ଟ୍ରାଟେଜିକ ବାୟୁସେନାର ବ୍ୟବହାର ବିଷୟରେ ମଧ୍ୟ ପ୍ରଶ୍ନ ଉଠାଇଥିଲେ। ୟୁରୋପରେ ରୁଷିଆ-ୟୁକ୍ରେନ ଏବଂ ବେଲାରୁଷ-ପୋଲାଣ୍ଡ ମଧ୍ୟରେ ତିକ୍ତତା ଶୀର୍ଷରେ ରହିଛି।
ଏସବୁ ମଧ୍ୟରେ ରୁଷ ରାଷ୍ଟ୍ରପତିଙ୍କ ଚେତାବନୀ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ପୁଟିନ ଟିଭି ଚ୍ୟାନେଲ ରୁଷିଆ-୨୪ କୁ କହିଛନ୍ତି ଯେ, ଦେଶର ସୀମା ନିକଟରେ ନାଟୋ ଅଭ୍ୟାସ ଏକ ବିପଜ୍ଜନକ ଆହ୍ବାନ ସୃଷ୍ଟି କରିଛି। ଆମେରିକା ଏବଂ ଏହାର ସହଯୋଗୀମାନେ କୃଷ୍ଣ ସାଗରରେ ଯୋଜନାବଦ୍ଧ ଭାବେ ଯୁଦ୍ଧଭ୍ୟାସ କରୁଥିବା ସେ କହିଛନ୍ତି।