କିଭ୍/ମସ୍କୋ,୩୦ା୬(ରଏଟର୍ସ/ଏପି):୨୦୨୨ ଫେବୃଆରୀ ୨୪ରେ ରୁଷିଆ ୟୁକ୍ରେନ୍ ଉପରେ ଆକ୍ରମଣ କରିଥିଲା। ସେବେଠୁ ଯୁଦ୍ଧରେ ଉଭୟ ପକ୍ଷଙ୍କ ବହୁ ଧନଜୀବନ ହାନି ହେଲାଣି। ଯୁଦ୍ଧ ଆଗକୁ ନ ବଢ଼ାଇବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ବାରମ୍ବାର ରୁଷୀୟ ପ୍ରତିପକ୍ଷ ଭ୍ଲାଡିମିର ପୁଟିନ୍ ଓ ୟୁକ୍ରେନ୍ ରାଷ୍ଟ୍ରମୁଖ୍ୟ ଭୋଲୋଡିମିର ଜେଲେନ୍ସ୍କିଙ୍କ ଉପରେ ଚାପ ପକାଉଛନ୍ତି।
ଟ୍ରମ୍ପ୍ଙ୍କ ଯୁଦ୍ଧବିରତି ପ୍ରସ୍ତାବରେ ଜେଲେନ୍ସ୍କି ଏକପ୍ରକାର ସହମତି ପ୍ରକାଶ କରିଥିବାବେଳେ ପୁଟିନ୍ କିନ୍ତୁ ସବୁବେଳେ କେଁ ପୂରାଇ ବିଭ୍ରାଟ ସୃଷ୍ଟି କରୁଛନ୍ତି। ଫଳରେ ଶାନ୍ତି ଆଲୋଚନା ଆଗେଇ ପାରୁନାହିଁ। ସମଗ୍ର ୟୁକ୍ରେନ୍ ଦଖଲ ସ୍ବପ୍ନ ଦେଖୁଥିବା ପୁଟିନ୍ଙ୍କ ସେନା ଶନିବାର ରାତିରେ ୫୩୭ ଡ୍ରୋନ୍ ଓ ମିଶାଇଲ୍ ଆକ୍ରମଣ କରିଛି। ଏନେଇ ୟୁକ୍ରେନୀୟ ବାୟୁସେନାର ଯୋଗାଯୋଗ ମୁଖ୍ୟ ୟୁରିୟ ଇହାନତ୍ କହିଛନ୍ତି, ସୀମାଠାରୁ ବହୁ ଦୂରେ ଥିବା ପଶ୍ଚିମ ୟୁକ୍ରେନ୍ ସମେତ ଦେଶର ବିଭିନ୍ନ ଭାଗକୁ ରୁଷିଆ ଟାର୍ଗେଟ କରିଛି। ଖେରସନ୍ ରିଜିୟନ୍ରେ ଡ୍ରୋନ୍ ଆକ୍ରମଣରେ ଜଣେ ବ୍ୟକ୍ତି ପ୍ରାଣ ହରାଇଥିବାବେଳେ ଖାରକିଭ୍ରେ ଏକ କାର୍କୁ ଡ୍ରୋନ୍ ମାଡ଼ କରାଯିବାରୁ ଆଉ ଜଣଙ୍କ ମୃତ୍ୟୁ ଘଟିଛି। ଦେଶର ପଶ୍ଚିମଭାଗରେ ରୁଷିଆର ଆକ୍ରମଣକୁ ପ୍ରତିହତ କରିବା ପାଇଁ ଏଫ୍-୧୬ ପାଇଲଟ୍ ମକ୍ସିମ୍ ଉସ୍ତିମେନ୍କୋ ଉଦ୍ୟମ ଚଳାଇଥିଲେ। ସେ ୭ଟି ଏରିଏଲ୍ ଟାର୍ଗେଟ୍କୁ ଖସାଇବା ପରେ ରୁଷୀୟ ଷ୍ଟ୍ରାଇକ୍ରେ ପ୍ରାଣ ହରାଇଛନ୍ତି। ସେ ଚଳାଉଥିବା ଏଫ୍-୧୬ ଯୁଦ୍ଧବିମାନ ମଧ୍ୟ କ୍ଷତିଗ୍ରସ୍ତ ହୋଇଛି ବୋଲି ୟୁକ୍ରେନ୍ ରାଷ୍ଟ୍ରପତି ଜେଲେନ୍ସ୍କି ଏକ୍ସ’ରେ ସୂଚନା ଦେଇଛନ୍ତି। ରୁଷିଆ ଛାଡ଼ିଥିବା ଅଧିକାଂଶ ଡ୍ରୋନ୍ ଇରାନ୍ ନିର୍ମିତ ଥିଲା।
ଜେଲେନ୍ସ୍କି ଆହୁରି କହିଛନ୍ତି, ଶାନ୍ତି ପାଇଁ ବିଶ୍ୱର ଆହ୍ବାନ ସତ୍ତ୍ୱେ ପୁଟିନ୍ ଯୁଦ୍ଧ ଜାରି ରଖିବାକୁ ନିଷ୍ପତ୍ତି ନେଇଛନ୍ତି। ଆକ୍ରମଣକାରୀ ଉପରେ ଚାପ ପକାଯାଇ ଏହି ଯୁଦ୍ଧକୁ ବନ୍ଦ କରାଯିବା ଜରୁରୀ ହୋଇପଡ଼ିଛି। ୟୁକ୍ରେନ୍ ନିଜ ଏୟାର ଡିଫେନ୍ସକୁ ମଜଭୁତ କରିବାକୁ ଚାହେଁ। ଲକ୍ଷ୍ୟ ହେଉଛି ସାଧାରଣ ଲୋକଙ୍କ ଜୀବନ ବଞ୍ଚାଇବା। ଆମେରିକାଠାରୁ ଆମେ ଉନ୍ନତ ଏୟାର ସିଷ୍ଟମ୍ କିଣିବାକୁ ପ୍ରସ୍ତୁତ। ଆମେରିକା, ୟୁରୋପ ଓ ଆମ ଅନ୍ୟ ସହଯୋଗୀଙ୍କଠାରୁ ସମର୍ଥନ ଆବଶ୍ୟକ କରୁଛୁ। ଗତ ସପ୍ତାହରେ ରୁଷିଆ ୟୁକ୍ରେନ୍ ଉପରେ ୧୧୪ ମିଶାଇଲ, ୧,୨୭୦ ଡ୍ରୋନ୍ ଓ ପ୍ରାୟ ୧,୧୦୦ ଗ୍ଲାଇଡ୍ ବୋମା ଛାଡ଼ିଥିଲା। ଆକ୍ରମଣ କ୍ଷମତା ଥିବା ପର୍ଯ୍ୟନ୍ତ ରୁଷିଆ ୟୁକ୍ରେନ୍ ଉପରେ ମିଶାଇଲ୍ ମାଡ଼ କରିଚାଲିଥିବ ବୋଲି ଜେଲେନ୍ସ୍କି କହିଛନ୍ତି।
ଉଲ୍ଲେଖଯୋଗ୍ୟ, ନର୍ଥ ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେଶନ୍ (ନାଟୋ) ନେତାମାନେ ବୁଧବାର ସାମରିକ ମେଣ୍ଟର ପ୍ରତିରକ୍ଷା ବ୍ୟୟରେ ଏକ ବଡ଼ ବୃଦ୍ଧି ପାଇଁ ନିଷ୍ପତ୍ତି ନେଇଛନ୍ତି। ସହଯୋଗୀଗୁଡ଼ିକ ୨୦୩୫ ମସିହା ସୁଦ୍ଧା ସେମାନଙ୍କ ବାର୍ଷିକ ପ୍ରତିରକ୍ଷା ବ୍ୟୟରେ ମୋଟ ଘରୋଇ ଉତ୍ପାଦ(ଜିଡିପି)ର ୫% ବୃଦ୍ଧି ପାଇଁ ପ୍ରତିଶ୍ରୁତିବଦ୍ଧ ହୋଇଛନ୍ତି। ଏଥିସହ ‘ଗୋଟିଏ ଦେଶ ଉପରେ ଆକ୍ରମଣକୁ ସମସ୍ତଙ୍କ ଉପରେ ଆକ୍ରମଣ’ ରୂପେ ଅଭିହିତ କରି ସାମୂହିକ ପ୍ରତିରକ୍ଷା ପ୍ରତି ରହିଥିବା ନିଜ ପ୍ରତିବଦ୍ଧତାକୁ ଦୋହରାଇଛନ୍ତି। ରୁଷିଆ ଏହାକୁ ନିଜ ପ୍ରତି ଏକ ଆସନ୍ନ ବିପଦ ମନେକରି ୟୁକ୍ରେନ୍ ଉପରେ ଏଭଳି ଆକ୍ରମଣ କରିଥିବା କୁହାଯାଉଛି।
