ରାଉରକେଲା ଅଫିସ,୨୭ା୧୨: ପୁରୁଷ ହକି ବିଶ୍ୱକପ୍ ଷ୍ଟିଲସିଟି ରାଉରକେଲାରେ ଆଉ ମାତ୍ର ୧୭ ଦିନ ପରେ ଆରମ୍ଭ ହେବ। ଏଥିପାଇଁ ବିର୍ସାମୁଣ୍ଡା ଷ୍ଟାଡିୟମ କାର୍ଯ୍ୟ ଶେଷ ହୋଇ ସେଠାରେ ଅଭ୍ୟାସ ମ୍ୟାଚ୍ ଆରମ୍ଭ ହୋଇଯାଇଛି। ରାଉରକେଲାରେ ପ୍ରଥମ ଥର ପାଇଁ ବିଶ୍ୱସ୍ତରୀୟ ହକି ମ୍ୟାଚ୍ ଜାନୁଆରୀ ୧୩ରେ ଭାରତ ଓ ସ୍ପେନ ଏବଂ ୧୫ରେ ଭାରତ ଓ ଇଂଲଣ୍ଡ ମଧ୍ୟରେ ଖେଳାଯିବ। ଏହାକୁ ନେଇ ଜିଲାରେ ହକି କ୍ରୀଡ଼ାପ୍ରେମୀଙ୍କ ମନରେ ଉତ୍ସାହ ଦେଖିବାକୁ ମିଳିଛି। ଏହି ଦୁଇଟି ମ୍ୟାଚ୍ ଦେଖିବା ପାଇଁ କ୍ରୀଡ଼ାପ୍ରେମୀଙ୍କ ଭିତରେ ଆଗ୍ରହ ପରିଲକ୍ଷିତ ହୋଇଛି। ତେବେ ବହୁ କ୍ରୀଡ଼ାପ୍ରେମୀ ଅନ୍ଲାଇନ ଓ ଅଫ୍ଲାଇନ ଟିକେଟ ପାଇବାରୁ ବଞ୍ଚତ୍ତ ହୋଇଥିବାରୁ ସେମାନଙ୍କ ପାଇଁ ପ୍ରଶାସନ ପକ୍ଷରୁ ବିକଳ୍ପ ବ୍ୟବସ୍ଥା କରାଯାଉଛି। କିଭଳି ସହରବାସୀ ସମସ୍ତ ମ୍ୟାଚ୍ ଦେଖିପାରିବେ ସେଥିପାଇଁ ବିଭିନ୍ନ ଛକରେ ଏଲ୍ଇଡି ସ୍କ୍ରିନ୍ ବ୍ୟବସ୍ଥା ହୋଇଛି। ରାଉରକେଲା ସହରର ପ୍ରମୁଖ ଛକ ମାନଙ୍କରେ ୧୦ଟି ଏଲ୍ଇଡି ସ୍କ୍ରିନ୍ ଲଗାଯାଇଛି। ପାନପୋଷ ଛକ, ବାସନ୍ତୀ ବାଜିରାଉତ ଛକ, ଛେଣ୍ଡ୍ ଏୟାରପୋର୍ଟ ଛକ, ରାଉରକେଲା ମହାନଗର ନିଗମ ଛକ, ବିଶ୍ରା ଛକ, ଛେଣ୍ଡ ରିଂରୋଡ ଛକ, ବିର୍ସାମୁଣ୍ଡା ହକି ଷ୍ଟାଡିୟମ ପ୍ରବେଶ ପଥ ଆଦି ସ୍ଥାନରେ ଏହି ବ୍ୟବସ୍ଥା କରାଯାଇଛି। ଏହି ଏଲ୍ଇଡି ସ୍କ୍ରିନରେ ହକି ବିଶ୍ୱକପ୍ ମ୍ୟାଚ୍ର ସିଧାରପ୍ରସାରଣ ସହରବାସୀ ଦେଖିପାରିବେ। ସେହିପରି ମ୍ୟାଚ ପୂର୍ବରୁ ଆହୁରି ୧୫ଟି ସ୍ଥାନରେ କପଡା ସ୍କ୍ରିନ୍ ବ୍ୟବସ୍ଥା କରାଯିବ ବୋଲି ଆରଏମ୍ସି ଉପଆୟୁକ୍ତ ସୁଧାଂଶୁ ଶେଖର ଭୋଇ ସୂଚନା ଦେଇଛନ୍ତି।
