ଯେତେବେଳେ ବି ଫୁଟବଲ ଖେଳାଳିଙ୍କ କଥା ଆସେ ସର୍ବପ୍ରଥମେ ୩ଟି ନାମ ସାମ୍ନାକୁ ଆସିଥାଏ। ତାହା ହେଲା କ୍ରିଷ୍ଟିଆନୋ ରୋନାଲ୍ଡୋ, ମେସି ଏବଂ ନେମାର ଜୁନିୟର। ଫୁଟବଲକୁ ଦୁନିଆର ଏକ ଭିନ୍ନ ସ୍ଥାନକୁ ନେଇପାରିଥିବା କ୍ରିଷ୍ଟିଆନୋ ରୋନାଲଡୋ ଏବଂ ନେମାର ଜୁନିୟରଙ୍କ ଜନ୍ମଦିନ ଗୋଟିଏ ଦିନରେ ପଡ଼ିଥାଏ। ୫ ଫେବୃୟାରୀରେ ଉଭୟ ନିଜର ଜନ୍ମଦିନ ପାଳନ କରିଥାନ୍ତି। ଏହି ୨ ଫୁଟବଲ ଖେଳାଳିଙ୍କ ନାମ ଏବେ ସବୁଠାରୁ ଧନୀ ଖେଳାଳି ତାଲିକାରେ ରହିଛି। କିନ୍ତୁ ଖୁବ୍ କମ୍ ଲୋକ ଜାଣିଥିବେ ଯେ, ଉଭୟଙ୍କ ପିଲାଦିନ ଦାରିଦ୍ର ମଧ୍ୟରେ କଟିଥିଲା।
ଦୁନିଆର ସବୁଠୁ ପ୍ରସିଦ୍ଧ ଫୁଟବଲ ଖେଳାଳି କ୍ରିଷ୍ଟିଆନୋ ରୋନାଲଡୋ ତାଙ୍କ ଖେଳ ସହିତ ବିଳାସପୂର୍ଣ୍ଣ ଜୀବନଶୈଳୀ ପାଇଁ ବେଶ୍ ପରିଚିତ। କିନ୍ତୁ ଏକ ସମୟ ଥିଲା ସ୍କୁଲରେ ଆଡ୍ମିଶନ ପାଇଁ ତାଙ୍କ ପାଖରେ ଅର୍ଥ ନ ଥିଲା। ତାଙ୍କ ବାପା ଜଣେ ମାଳି ଏବଂ ମା’ ଅନ୍ୟ ଘରେ ରେଷେଇ କାମ କରୁଥିଲେ। ୪ ଭଉଣୀ-ଭାଇଙ୍କ ମଧ୍ୟରେ ରୋନାଲ୍ଡୋ ସବୁଠାରୁ ସାନ। ତାଙ୍କ ପରିବାର ଟିଣ ଛାତ ଥିବା ଘରେ ରହୁଥିଲେ। ମାତ୍ର ୮ ବର୍ଷ ବୟସରେ ଲୋକାଲ ଟିମ୍ ପାଇଁ ଫୁଟବଲ ଖେଳିବା ଆରମ୍ଭ କରିଥିଲେ। ୩୫ ବର୍ଷୀୟ ଏହି ଖେଳାଳି ସମସ୍ତଙ୍କୁ ପଛରେ ପକାଇ ଦୁନିଆର ସବୁଠାରୁ ଧନୀ ଫୁଟବଲ ଖେଳାଳି ହୋଇପାରିଛନ୍ତି। ରୋନାଲ୍ଡୋଙ୍କ ପ୍ରଶଂସକଙ୍କ ତାଲିକା ମଧ୍ୟ ବହୁତ ଅଧିକ। ତାଙ୍କର କାର ପ୍ରେମ କାହାକୁ ଅଛପା ନାହିଁ। ସବୁବେଳେ ସେ ଟପ୍ କ୍ଲାସ ଗାଡି ଚଲାଇଥାନ୍ତି। ତାଙ୍କ ପାଖରେ ୭୫ କୋଟି ଟଙ୍କାର ବୁଗାଟି କମ୍ପାନୀର ‘ଲ ଭାଉଚର ନୋଏର’ କାର ଅଛି।
୧୯୯୨ରେ ବ୍ରାଜିଲରେ ଜନ୍ମଗ୍ରହଣ କରିଥିବା ନେମାର ଖୁବ୍ କମ୍ ସମୟ ମଧ୍ୟରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଖାଲି ସେତିକି ନୁହେଁ, ଫୋର୍ବସ ତାଲିକାରେ ନେମାର ୭୨୨ କୋଟି ଟଙ୍କା ରୋଜଗାର କରି ଧନୀ ତାଲିକାର ୪ର୍ଥ ସ୍ଥାନରେ ରହିଛନ୍ତି। ନେମାରଙ୍କ ଘରର ଆର୍ଥିକ ଅବସ୍ଥା ଖରାପ ଥିବାରୁ ଅନେକ ଥର ତାଙ୍କ ବାପା ବିଦ୍ୟୁତ୍ ବିଲ୍ ଦେଇପାରୁ ନ ଥିଲେ। ତେଣୁ ସେମାନଙ୍କୁ ଅଧିକ ଦିନ ଅନ୍ଧାରରେ ରହିବାକୁ ପଡ଼ୁଥିଲା। ନେମାରଙ୍କ ବାପା ମଧ୍ୟ ଜଣେ ଭଲ ଫୁଟବଲ ଖେଳାଳି ଥିଲେ। ତେଣୁ ସେ ପୁଅକୁ ସମର୍ଥନ କରିଥିଲେ। ଏବଂ ନେମାର ଫୁଟବଲର ହୋଇଥିଲେ।
