ହାଇଦ୍ରାବାଦ୍,୧୮।୧: ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ଦିନିକିଆ ସିରିଜର ପ୍ରଥମ ମ୍ୟାଚ ହାଇଦ୍ରାବାଦରେ ଖେଳାଯାଉଛି। ଏହି ମ୍ୟାଚରେ ଟିମ ଇଣ୍ଡିଆ ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ରୋହିତ ଶର୍ମା ଏବଂ ଶୁଭମାନ ଗିଲ ଦଳ ପାଇଁ ଇନିଂସ ଓପନ କରିଥିଲେ। ରୋହିତ ୩୪ ରନ କରି ଆଉଟ୍ ହୋଇଥିଲେ। କିନ୍ତୁ ସେ ଏହି ମ୍ୟାଚରେ ମହେନ୍ଦ୍ର ସିଂ ଧୋନୀଙ୍କ ଏକ ସ୍ବତନ୍ତ୍ର ରେକର୍ଡ ଭାଙ୍ଗିଛନ୍ତି। ସେ ଭାରତୀୟ ମାଟିରେ ସର୍ବାଧିକ ଛକା ମାରିଥିବା ଖେଳାଳି ହୋଇପାରିଛନ୍ତି।
ରୋହିତ ହାଇଦ୍ରାବାଦ ଦିନିକିଆରେ ୩୮ ବଲ୍ର ସମ୍ମୁଖୀନ ହୋଇ ୩୪ ରନ୍ କରିଥିଲେ। ଏଥିରେ ୪ ଚୌକା ଓ ୨ ଛକା ସାମିଲ ଥିଲା। ଭାରତର ସର୍ବାଧିକ ଛକା ମାରିବାର ରେକର୍ଡ କରିଛନ୍ତି ରୋହିତ। ରୋହିତ ମୋଟ ୧୨୫ଟି ଦିନିକିଆ ଛକା ମାରିଛନ୍ତି। ଏହି ପ୍ରସଙ୍ଗରେ ଧୋନୀ ୧୨୩ଟି ଛକା ସହ ଦ୍ୱିତୀୟ ସ୍ଥାନରେ ଅଛନ୍ତି। ସଚିନ ତେନ୍ଦୁଲକର ୭୧ଟି ଛକା ସହ ତୃତୀୟ ସ୍ଥାନରେ ଅଛନ୍ତି। ବିରାଟ କୋହଲି ଦିନିକିଆରେ ୬୬ ଛକା ସହ ଚତୁର୍ଥ ସ୍ଥାନରେ ଅଛନ୍ତି। ଯୁବରାଜ ସିଂ ୬୫ଟି ଛକା ସହ ପଞ୍ଚମ ସ୍ଥାନରେ ଅଛନ୍ତି।
ସୂଚନାଯୋଗ୍ୟ, ବିଶ୍ୱ କ୍ରିକେଟରେ ସର୍ବାଧିକ ଦିନିକିଆ ଛକା ମାରିବାରେ ପାକିସ୍ତାନର ପୂର୍ବତନ ଖେଳାଳି ଶହିଦ ଆଫ୍ରିଦି ଶୀର୍ଷରେ ଅଛନ୍ତି। ସେ ୩୯୮ଟି ମ୍ୟାଚରେ ୩୫୧ଛକା ମାରିଛନ୍ତି। କ୍ରିସ ଗେଲ ଦ୍ୱିତୀୟ ସ୍ଥାନରେ ଅଛନ୍ତି। ଗେଲ ୩୦୧ଟି ମ୍ୟାଚରେ ୩୩୧ ଛକା ମାରିଛନ୍ତି। ତୃତୀୟ ସ୍ଥାନରେ ଅଛନ୍ତି ସନଥ ଜୟସୁରିଆ। ସେ ୪୪୫ଟି ମ୍ୟାଚରେ ୨୭୦ ଛକା ମାରିଛନ୍ତି। ରୋହିତ ଚତୁର୍ଥ ସ୍ଥାନରେ ଅଛନ୍ତି। ସେ ୨୩୯ଟି ମ୍ୟାଚରେ ୨୬୫ ଛକା ମାରିଛନ୍ତି।
ରୋହିତ ଶର୍ମା – ୧୨୫
ମହେନ୍ଦ୍ର ସିଂ ଧୋନି – ୧୨୩
ସଚିନ ତେନ୍ଦୁଲକର – ୭୧
ବିରାଟ କୋହଲି – ୬୬
ଯୁବରାଜ ସିଂ – ୬୫
