ଦିଗପହଣ୍ଡି,୭ା୧୨(ଅଶେଷ ନାଥ ମିଶ୍ର): ଦିଗପହଣ୍ଡି ବ୍ଲକ ଜକର ପଞ୍ଚାୟତ ଅଧୀନ ତେଣ୍ଟୁଆପଡା ଗ୍ରାମରେ ୨୦୨୩ରେ ଘଟିଥିବା ଏକ ଡକାୟତି ଓ ହତ୍ୟା ଉଦ୍ୟମ ମାମଲାର ଅଭିଯୁକ୍ତଙ୍କୁ କେ. ନୂଆଗାଁ ଥାନା ପୋଲିସ ୨ ବର୍ଷ ପରେ ରବିବାର ଗିରଫ କରିଛି। ସେ ହେଲେ ଦିଗପହଣ୍ଡି ବ୍ଲକ ବୋମକେଇ ପଞ୍ଚାୟତ କୁମରଡ଼ା ଗ୍ରାମର ବିଦ୍ୟାଧର ପ୍ରଧାନ ଓରଫ ବିଜୟ । ତାଙ୍କୁ ଦିଗପହଣ୍ଡି କୋର୍ଟ ଚାଲାଣ କରାଯାଇଥିଲା। କେ.ନୂଆଗାଁ ଥାନା ମାମଲା ନଂ.୪୩୬/୨୩ ଅନୁଯାୟୀ ବିଦ୍ୟାଧରଙ୍କ ଜାମିନ ଖାରଜ ହୋଇ ଯିବାରୁ ତାଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି।
୨୦୨୩ ଅକ୍ଟୋବର ୨୩ ତାରିଖ ରାତିରେ ତେଣ୍ଟୁଆପଡା ଗ୍ରାମର ପୀତାମ୍ବର ନାଇକ ଓ ପରିବାରର ଅନ୍ୟ ସଦସ୍ୟମାନେ ଖାଉଥିବା ବେଳେ ବିଦ୍ୟାଧର ଓ ତାଙ୍କର ୧୦ରୁ ଊଦ୍ଧର୍ବ ସହଯୋଗୀ ପିସ୍ତଲ, ଖଣ୍ଡା ଆଦି ଧରି ଘରେ ପଶିଥିଲେ। ସେମାନେ ପୀତାମ୍ବରଙ୍କୁ ଘରୁ ଘୋଷାଡି ଆଣି ମରଣାନ୍ତକ ଆକ୍ରମଣ କରି ୧୦ ହଜାର ଟଙ୍କା ଓ ସୁନା ଚେନ ଲୁଟି ନେଇଥିଲେ। ସେହିଦିନ ବିଳମ୍ବିତ ରାତିରେ କେ.ନୂଆଗାଁ ଥାନା ଚାନ୍ଦପୁର ଗ୍ରାମର ନାନା ପଣ୍ଡାଙ୍କୁ ଅପହରଣ କରିବା ସହ ତାଙ୍କୁ ମାଡ ମାରି ୨୩ ହଜାର ଟଙ୍କା ଲୁଟି ନେଇ ଫେରାର ହୋଇଯାଇଥିଲେ।
ବିଦ୍ୟାଧର ଗଞ୍ଜେଇ ଚାଲାଣ ମାମଲାରେ ମୁମ୍ବାଇ ପୋଲିସ ଦ୍ବାରା ଗିରଫ ହୋଇ ସେଠାକାର ଜେଲରେ ଥିଲେ। ପରେ ଜାମିନରେ ମୁକୁଳି ଗାଁକୁ ଫେରିଥିଲେ। ଏହି ମାମଲାର ଅନ୍ୟତମ ଅଭିଯୁକ୍ତ ଲକ୍ଷ୍ମୀଧର ପ୍ରଧାନ ଶନିବାର ଜେଲରୁ ଜାମିନରେ ମୁକୁଳିଥିବା ବେଳେ ତାଙ୍କୁ ବିଦ୍ୟାଧର ଦେଖା କରିବାକୁ ଦିଗପହଣ୍ଡି ଯାଇଥିଲେ। କେ.ନୂଆଗାଁ ଥାନା ଆଇଆଇସି କିଶୋର କୁମାର ସାମଲଙ୍କଠାରୁ ଖବରପାଇ ତଦନ୍ତକାରୀ ଅଧିକାରୀ ଏସ.ଆଇ ଜୟନାଥ ପ୍ରଧାନ ସଦଳବଳେ ବିଦ୍ୟାଧରଙ୍କୁ ଗିରଫ ପାଇଁ ତାଙ୍କୁ ଦିଗପହଣ୍ଡିରୁ ପିଛା କରିଥିଲେ। ପରେ ଦେଓଖାଳି ଗ୍ରାମ ଛକରେ ବିଦ୍ୟାଧରଙ୍କୁ ଧରିଥିଲେ। ବିଦ୍ୟାଧର ଦିଗପହଣ୍ଡି ଓ କେ.ନୂଆଗାଁ ଥାନା ର ଏକାଧିକ ମାମଲାରେ ସମ୍ପୃକ୍ତ ଥିବା ଆଇଆଇସି କହିଛନ୍ତି।
