କେସିଙ୍ଗା,୧୯ା୧୧(ତୁମେଶ୍ୱର ସାହୁ): କଳାହାଣ୍ଡି ଜିଲା କସୃପଡ଼ା ପଞ୍ଚାୟତ ଅଧିନସ୍ଥ ସିଂହଝରଣ ଗ୍ରାମକୁ ସଂଯୋଗ ହୋଇଥିବା ରାସ୍ତା ଦୀର୍ଘବର୍ଷଠାରୁ ଶୋଚନୀୟ ଅବସ୍ଥାରେ ପଡ଼ିରହିଛି। ବହୁବାର ସ୍ଥାନୀୟ ସରପଞ୍ଚଠାରୁ ବ୍ଲକର ବିଡିଓଙ୍କୁ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ। ଜାତୀୟ ରାଜପଥ ୨୬ ଶ୍ରୀଅରବିନ୍ଦ ଛକଠାରୁ ସିଂହଝରଣ ଗ୍ରାମକୁ ସଂଯୋଗ ହୋଇଥିବା ପ୍ରାୟ ୫ କିମି ରାସ୍ତାକୁ ଦୀର୍ଘ ୨୫ ବର୍ଷ ତଳେ ଆରଡି ବିଭାଗ ପକ୍ଷରୁ ନିର୍ମାଣ କରାଯାଇଥିଲା। ବଜ୍ରଗଡ଼ ଜଙ୍ଗଲ ଭିତର ଦେଇ ସିଂହଝରଣ ଗ୍ରାମକୁ ଏହି ରାସ୍ତା ଯାଇଥିବାରୁ ବିଭାଗୀୟ ପକ୍ଷରୁ ପୁନର୍ବାର ମରାମତି କରିବାକୁ ଚାହୁଁନାହାନ୍ତି। କାରଣ ଜଙ୍ଗଲ ରାସ୍ତା ଥିବାରୁ ପ୍ରଶାସନ ଗୁରୁତ୍ୱ ଦେଉନାହିଁ।
ଏହି ରାସ୍ତା ନିର୍ମାଣ କରିବା ପାଇଁ ଗ୍ରାମବାସୀ ସ୍ଥାନୀୟ ସରପଞ୍ଚ, ବିଡିଓ ଏବଂ ଜିଲାପାଳଙ୍କ ଜନଶୁଣାଣି ଶିବିରରେ ବହୁବାର ଲିଖିତ ଅଭିଯୋଗ କରିଛନ୍ତି। ଜାତୀୟ ରାଜପଥ ୨୬ଠାରୁ ଗାଁକୁ ଯିବା ପାଇଁ ରହିଛି ଏକ ମାତ୍ର ରାସ୍ତା । ଯାହାର ଅବସ୍ଥା ନ କହିଲେ ଭଲ ପୂର୍ବରୁ ପିଚୁ ରାସ୍ତା ଥିଲା ବେଳେ ଟ୍ରାକ୍ଟର ଚାଲି ରାସ୍ତାକୁ ଖରାପ କରିଦେଇଛି ।ଜାଗା ଜାଗାରେ ବଡ଼ବଡ଼ ଖାଲ ହୋଇ, ପିଚୁ ଉଠି ଯାଇ ଚିପ୍ସ କେବଳ ଦେଖାଯାଉଛି। ଲୋକମାନେ ଚାଲି ଯିବାକୁ ପାଇଁ ମଧ୍ୟ ଅସୁବିଧା ଭୋଗୁଛନ୍ତି। ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଅନ୍ୟପକ୍ଷରେ ଅଞ୍ଚଳରେ କିଛି ସରକାରୀ ଜମି ରହିଥିବା ବେଳେ କେତେକ ଲୋକ ସେହି ସରକାରୀ ଜମିକୁ ଜବରଦଖଲ କରି ରଖିଛନ୍ତି। ସେହି ସରକାରୀ ଜାଗାଗୁଡ଼ିକୁ ମାପ କରି କରିବା ପାଇଁ ଗ୍ରାମବାସୀ ସ୍ଥାନୀୟ ପ୍ରଶାସନକୁ ଜଣାଇଥିଲେ ମଧ୍ୟ ପ୍ରଶାସନ କର୍ଣ୍ଣପାତ କରୁ ନ ଥିବା ଅଭିଯୋଗ କରିଛନ୍ତି ଗ୍ରାମବାସୀ। ଯଥାଶୀଘ୍ର ଏହି ରାସ୍ତା ନିର୍ମାଣ କରିବା ସହ ସରକାରୀ ଜାଗାକୁ ଉଚ୍ଛେଦ କରିବାକୁ ଗ୍ରାମବାସୀ ଦୃଢ଼ ଦାବି କରିଛନ୍ତି। ଏହି ସିଂହଝରଣ ଗ୍ରାମରେ ଥିବା ପ୍ରାଥମିକ ବିଦ୍ୟାଳୟକୁ ଶିକ୍ଷୟିତ୍ରୀମାନେ ଉକ୍ତ ରାସ୍ତା ଦେଇ ସ୍କୁଟିରେ ଯିବାବେଳେ ବହୁବାର ପଡ଼ିି ଯାଉଛନ୍ତି। ଗ୍ରାମବାସୀ କସୃପଡ଼ା ପଞ୍ଚାୟତକୁ ଚାଉଳ, ମାଣ୍ଡିଆ, ପିଡିଏସ୍ ସାମଗ୍ରୀ ଆଣିବାକୁ ଗଲେ ବର୍ଷାଋତୁରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି।
ଏନେଇ ବ୍ଲକ ଅଧ୍ୟକ୍ଷ ଚନ୍ଦନ ସେନାପତିଙ୍କୁ ପଚାରିବାରୁ ମୁଁ ସମିତି ମିଟିଂରେ ପ୍ରସ୍ତାବ ଦେଇଛି ବୋଲି କହିଛନ୍ତି। ଏ ସଂକ୍ରାନ୍ତରେ ଆର୍ଡି ବିଭାଗର କନିଷ୍ଠଯନ୍ତ୍ରୀ ତପନ କୁମାର ବଡ଼ନାୟକଙ୍କୁ ପଚାରିବାରୁ ବାରମ୍ବାର ଏସିଙ୍କୁ ବଦଳି ହେବା ଯୋଗୁ କେସିଙ୍ଗା ଅଞ୍ଚଳ ବିଭିନ୍ନ ରାସ୍ତାର ସର୍ଭେ ଓ ରାଜ୍ୟ ସରକାରଙ୍କୁ ରିପୋର୍ଟ ଦେବାରେ ବ୍ୟାହତ ହେଉଛି ବୋଲି ପ୍ରକାଶ କରିଥିଲେ।
