ନାଉଗାଁ,୪ା୧୦(ସ୍ବ.ପ୍ର): ନାଉଗାଁ ବ୍ଲକ କାର୍ଯ୍ୟାଳୟରୁ ଗାରୋଇକୁ ସଂଯୋଗ କରୁଥିବା ପୂର୍ତ୍ତ ବିଭାଗ ରାସ୍ତା ଶୋଚନୀୟ ହୋଇଯାଇଛି। କିଛି ସ୍ଥାନରେ ଏହା ଦବିଯିବା ସହ ରାସ୍ତା ପାର୍ଶ୍ୱରୁ ଅତଡା ଖସିଯାଇଛି। ଏହାକୁ ମରାମତି କରାଯାଉ ନ ଥିବା ବେଳେ ଅତଡା ଖସିଥିବା ସ୍ଥାନକୁ ବିଭାଗ ପକ୍ଷରୁ ଆବଦ୍ଧ କରାଯାଇ ନାହିଁ। ଫଳରେ ଦୁର୍ଘଟଣା ଘଟିବାର ଆଶଙ୍କା ରହିଛି। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏହି ରାସ୍ତା ବ୍ଲକର କୋକିଢିହ, ବାଂଶ, ନରଣପୁର, ତେଣ୍ଟୋଇ, ଗଙ୍ଗଦା ହାଟ, କୋରୁଅ, ଧୂଆଁପଦା ଆଦି ଦେଇ ଗାରୋଇ ଓ ଦେବୀ ନଦୀ ବନ୍ଧ ବାଟେ ମାଛଗାଁକୁ ସଂଯୋଗ କରୁଛି। ଏହା ଉପରୋକ୍ତୋ ଗ୍ରାମଗୁଡ଼ିକର ମୁଖ୍ୟ ରାସ୍ତା । ଏହି ବାଟଦେଇ ବିଭିନ୍ନ ଯାତ୍ରୀବାହି ଗାଡି ଓ ମାଲ ବାହି ଗାଡି ଓ ସାଧରାଣ ଲୋକେ ବିଭିନ୍ନ କାର୍ଯ୍ୟରେ ବ୍ଳକ,ତହସିଲ,ସ୍ବାସ୍ଥ୍ୟକେନ୍ଦ୍ର ଆଦିକୁ ଯାତାୟାତ କରିଥାନ୍ତି।
ପୂର୍ତ୍ତ ବିଭାଗ ପକ୍ଷରୁ ପ୍ରତିବର୍ଷ ଏହି ରାସ୍ତା ମରାମତି କରାଯାଉଛି। ମାତ୍ର ଠିକାଦାର ନିମ୍ନମାନର ଏଠାରେ ନିମ୍ନମାନର କାମ କରୁଥିବା ନେଇ ସାଧାରଣରେ ଅଭିଯୋଗ ହୋଇଛି। ଶ୍ରୀ ମଉଳା ଭଣଜା ମହାବିଦ୍ୟାଳୟ ସମ୍ମୁଖ ଓ କୋରୁଅ ଆଦି ସ୍ଥାନରେ ରାସ୍ତାରୁ କଂକ୍ରିଟ ଉଠି ଖାଲଖମାରେ ପୁରିଯାଇଛି। ଦେବୀ ନଦୀ ପାର୍ଶ୍ୱରେ ଏହି ରାସ୍ତା ଅବସ୍ଥା ଅତ୍ୟନ୍ତ ଖରାପ ହୋଇଯାଇଛି। ୨୦୨୦-୨୧ ଆର୍ଥତ୍କ ବର୍ଷରେ ଜଳ ନିକାଶ ବିଭାଜନ ଜଗତ୍ସିଂହପୁର ତରଫରୁ ଟେଣ୍ଡର କରାଯାଇ ଗୋବରୀ ନଦୀର ପୁନରୁଦ୍ଧାର କାର୍ଯ୍ୟ କରାଯାଉଛି। ଗୋବରୀ ନଦୀ ଉପରେ ଏହି ରାସ୍ତା ଯାଇଥିବାରୁ ନଦୀ ଖୋଳିବା ବେଳେ ଏଠାରୁ ମାଟି ଖସିଯାଇଛି। ଏହାଛଡା ବର୍ଷା ସମୟରେ ଗୋବରୀ ନାଳରେ ପାଣି ଆସିବା ଯୋଗୁ ବାଂଶ ଓ କୁରିକି ଠାରେ ରାସ୍ତା ଦବି ଅତଡା ଖାଇଯାଇଛି। ଫଳରେ ଭାରିଯାନ ଚଳାଚଳ ଅବା ଯାତ୍ରୀ ବାହୀ ଗାଡି ଏହି ରାସ୍ତାରେ ଯିବାକୁ ସୁରକ୍ଷିତ ମନେ କରୁନାହାନ୍ତି। ତୁରନ୍ତ ଏହାକୁ ମରାମତି କରିବା ଲାଗି ସ୍ଥାନୀୟ ଲୋକେ ଦାବି କରିଛନ୍ତି। ଏବିଷୟରେ ବିଭାଗୀୟ ଯନ୍ତ୍ରୀ ବଳରାମ ସ୍ବାଇଁ କହିଛନ୍ତି, ଉକ୍ତ ରାସ୍ତା ଯେତିକି ଚଉଡା ରହିଛି ତାଠାରୁ ଅଧିକ ଚଉଡା କରାଯିବ। ଏଥିପାଇଁ ଟେଣ୍ଡର କରାଯିବ। ଏହା ପରେ କାମ ଆରମ୍ଭ ହେବ।
