ତୁମୁଡିବନ୍ଧ,୩।୭ (ଦୀପକ କୁମାର ପରାସେଠ): ଲଘୁଚାପଜନିତ ବର୍ଷା ଲାଗି ରହିଛି। ଯାହାକୁ ନେଇ ଜନଜୀବନ ଅସ୍ତବ୍ୟସ୍ତ । କେଉଁଠି ରାସ୍ତାଧୋଇ ହୋଇ ଯାଇଥିବାବେଳେ କେଉଁଠି ବଡ଼ ପଥର ଓ ମାଟି ଅତଡା ଖସି ରାସ୍ତା ଜାମ ହୋଇଛି। କନ୍ଧମାଳ ଜିଲା ତୁମୁଡିବନ୍ଧ ବ୍ଲକର ର୍ସିଲା ପଞ୍ଚାୟତରେ ଏପରି ସ୍ଥିତି ଦେଖିବାକୁ ମିଳିଛି। ଯାହା ଫଳରେ ର୍ସିଲା ପଞ୍ଚାୟତର ୧୩ଗାଁ ଓ କୋଟଗଡ ବ୍ଲକର ପାରିଗଡ ପଞ୍ଚାୟତକୁ ଯାତାୟତ ବନ୍ଦ ହୋଇଥିବା ଜଣାପଡ଼ିଛି। ଫଳରେ ଦୁଇ ପଞ୍ଚାୟତର ଲୋକମାନେ ନାହିଁନଥିବା ହଇରାଣ ହେଉଛନ୍ତି।
ଲଘୁଚାପ ଜନିତ ଲଗାଣ ବର୍ଷାରେ ର୍ସିଲା ମାଲାଙ୍ଗ ପଦର ଠାରୁ ପାରିଗ ସଂଯୋଗ କରୁଥିବା ରାସ୍ତାର ଟେକଲା ମିଲା ଘାଟିରେ ପଥର ସହିତ ମାଟି ଅତଡା ଖସି ରାସ୍ତା ଜାମ ହୋଇ ଯାଇଛି। ଯାହାଫଳରେ ର୍ସିଲା ପଂଚାୟତର ୧୩ ଗୋଟି ଗାଁ ସହିତ କୋଟଗଡ ବ୍ଳକ ପାରିଗଡ଼ ପଞ୍ଚାୟତକୁ ଯାତାୟତ ଠପ ହୋଇଛି। ସେହି ଅଞ୍ଚଳରେ ବସବାସ କରୁଥିବା ଲୋକମାନଙ୍କର ତୁମୁଡିବନ୍ଧ ଓ ବାଲିଗୁଡ ସଂଯୋଗ କରୁଥିବା ମୁଖ୍ୟ ରାସ୍ତା ଅଟେ। ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଠାରୁ ଆରମ୍ଭ କରି ୧୦୮ଆମ୍ବୁଲାନ୍ସ ସେବାରୁ ବଞ୍ଚିତ ଥିବା ଜଣାପଡିଛି। ଏହା ବାବଦରେ ପାରିଗଡ ସମିତି ସଭ୍ୟ ସୁରୁଦା ପ୍ରଧାନ କହିଛନ୍ତି ଯେ ତୁରନ୍ତ ପଡ଼ିଥିବା ପଥର ଓ ମାଟି ହଟା ଯାଉ ଓ ଜାତାୟତର ବ୍ୟବସ୍ଥା କରାଯାଉ। ଏଥିସହ ସେହି ରାସ୍ତାରେ ପିଚୁ ଉଠିଯାଇ ଖାଲ ଖାମ ହୋଇଛି ଯାତାୟତରେ ବହୁ ଅସୁବିଧା ହେଉଛି ତାହାକୁ ମରାମତି କରାଯାଉ ବୋଲି ଦାବି କରିଛନ୍ତି। ର୍ସିଲା ପଂଚାୟତ ଟେକଲା ମିଲା ଗ୍ରାମର ରାଧାକାନ୍ତ ପାଟମାଝି କହିଛନ୍ତି ଯେ ବିଭାଗୀୟ ଅଧିକାରୀଙ୍କୁ ଅନୁରୋଧ ଯେ ଟେକଲା ମିଲା ରାସ୍ତାର ଘାଟିରେ ପଡିଥିବା ବଡ଼ ପଥର ଓ ମାଟି ହଟାଯାଇ ଯାତାୟତର ବ୍ୟବସ୍ଥା ତୁରନ୍ତ କରାଯାଉ। ଏହି ବାବଦରେ ଗ୍ରାମ୍ୟ ଉନ୍ନୟନ ବିଭାଗର ଯନ୍ତ୍ରୀ ଶିବ ନାରାୟଣ ସେଠିଙ୍କୁ ପଚରିବାରୁ ସେ ରାସ୍ତାରେ ପଡ଼ିଥିବା ପଥର ଓ ମାଟି ହଟାଯାଇ ଯାତାୟତ ବ୍ୟବସ୍ଥା କରାଯିବ ବୋଲି କହିଛନ୍ତି।
