ଖୋର୍ଦ୍ଧା ଅଫିସ,୯ା୯: ରାଜୁଆ ଓ ଦୟା ନଦୀରେ ବନ୍ୟା ଯୋଗୁ ଖୋର୍ଦ୍ଧା ଜିଲାର ଭୁବନେଶ୍ୱର, ବାଲିଅନ୍ତା, ବାଲିପାଟଣା, ଜଟଣୀ, ଖୋର୍ଦ୍ଧା ଏବଂ ବେଗୁନିଆ ବ୍ଲକ ଅଞ୍ଚଳରେ ହଜାର ହଜାର ଏକର ଚାଷଜମି ଜଳମଗ୍ନ ହେବା ସହ ୪୦ଗ୍ରାମ ପାଣିଘେରରେ ରହିଥିଲା। ଏହି ଅଞ୍ଚଳଗୁଡ଼ିକ ଧୀରେ ଧୀରେ ସ୍ବାଭାବିକ ସ୍ଥିତିକୁ ଫେରିବାରେ ଲାଗିଛି। ପାଣି ଖସିଯିବା ପରେ ଜମିରେ ଧାନ ପଚି ଶଢୁଥିବା ଦେଖିବାକୁ ମିଳିଛି। ପ୍ରଥମ ପର୍ଯ୍ୟାୟରେ ଏହି ୬ବ୍ଲକରେ ୭୬୯୪ହେକ୍ଟର ଚାଷଜମି କ୍ଷତି ହୋଇଥିବା ଜିଲା ପ୍ରଶାସନ ପକ୍ଷରୁ ସୂଚନା ମିଳିଛି। ବନ୍ୟାଜଳ ଛାଡିବା ପରେ ଚାଷୀମାନେ ଧାନ ବିଲକୁ ଦେଖି ମୁଣ୍ଡରେ ହାତଦେଇ ବସିଛନ୍ତି। କ୍ଷତିଗ୍ରସ୍ତ ଚାଷୀଙ୍କୁ ସରକାର ତୁରନ୍ତ କ୍ଷତିପୂରଣ ଦେବା ଲାଗି ଭାଜପା କୃଷକ ମୋର୍ଚ୍ଚା ରାଜ୍ୟ ଉପସଭାପତି ଶ୍ରୀରଞ୍ଜନ ମଙ୍ଗରାଜ ଜିଲା ପ୍ରଶାସନ ନିକଟରେ ଦାବି କରିଛନ୍ତି।
କୃଷି ଅଧିକାରୀ ଭାସ୍କର ବାରିକଙ୍କ କହିବା ଅନୁଯାୟୀ, ପ୍ରଥମେ ଅଦିନିଆ ବର୍ଷା, ଅଗଷ୍ଟ ମାସରେ ଲଘୁଚାପ ଜନିତ ବର୍ଷା ପରେ ବନ୍ୟା ପରିସ୍ଥିତି ଯୋଗୁ ଜିଲାର ୬ଟି ବ୍ଲକର ଚାଷଜମି କ୍ଷତିଗ୍ରସ୍ତ ହୋଇଛି। ଚଳିତ ଖରିଫ ଚାଷରେ ୧ଲକ୍ଷ ୨୦ହଜାର ୧୫୦ହେକ୍ଟର ଚାଷଜମିରେ ଧାନ ଓ ଅଣଧାନ ଚାଷ ଲକ୍ଷ୍ୟ ରଖାଯାଇଛି। ସେଥିରୁ ୧ଲକ୍ଷ ୬୦ହଜାର ୫୦ହେକ୍ଟର ଚାଷଜମିର ଧାନ ଏବଂ ୧୪ହଜାର ଶହେ ହେକ୍ଟର ଚାଷଜମିରେ ପନିପରିବା ଚାଷ ରହିଛି। ଅଗଷ୍ଟ ୨୦ସୁଦ୍ଧା ୧ଲକ୍ଷ ୨ହଜାର ୩୭୯ ହେକ୍ଟର ଚାଷଜମିରେ ଧାନ ଏବଂ ୧୦ହଜାର ୮୪୬ହେକ୍ଟର ଜମିରେ ପନିପରିବା ମୋଟ ୧ଲକ୍ଷ ୧୩ହଜାର୨୨୫ ହେକ୍ଟର ଜମିରେ ଧାନ ଏବଂ ଅଣଧାନ ଚାଷ କାର୍ଯ୍ୟ ସରିଛି। ୯୫ପ୍ରତିଶତ କାର୍ଯ୍ୟ ସରିଛି। ବନ୍ୟାପାଣି ଦ୍ୱାରା ଧାନ ଫସଲ ପ୍ରଭାବିତ ହୋଇଥିବା ନଜରକୁ ଆସିଛି ବୋଲି ସେ କହିଛନ୍ତି। ଏ ସମ୍ପର୍କରେ ଅତିରିକ୍ତ ଜିଲାପାଳ ମନୋଜ ପାଢୀ କହିଛନ୍ତି, ବନ୍ୟା ଯୋଗୁ ଜିଲାର ୬ବ୍ଲକର ୩୯ଗ୍ରାମ ପ୍ରଭାବିତ ହୋଇଛି। ୭୬୯୪ହେକ୍ଟର ଚାଷଜମିରେ କ୍ଷତି ଘଟିଛି। ସେଥିରୁ ବାଲିପାଟଣା ବ୍ଲକ ୨୬୮୦, ଖୋର୍ଦ୍ଧା ବ୍ଲକ ୨୨୮୦, ବେଗୁନିଆ ୧୩୪୯, ଜଟଣୀ ୮୭୫, ଭୁବନେଶ୍ୱର ବ୍ଲକ ୩୧୦ ଏବଂ ବାଲିଅନ୍ତା ବ୍ଲକର ୨ଶହ ହେକ୍ଟର ଚାଷଜମି ରହିଛି ବୋଲି ସେ କହିଛନ୍ତି।
