କେନ୍ଦୁଝର, ୧୦।୮ (ସ୍ବ.ପ୍ର.): ବିଶ୍ୱ ଆଦିବାସୀ ଦିବସ ଅବସରରେ କେନ୍ଦୁଝର ଜିଲା ମୁଖ୍ୟାଳୟରେ ମିଳିତ କଲ୍ୟାଣ ମଞ୍ଚ ପକ୍ଷରୁ ଏକ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି ା ଏହି ଶୋଭାଯାତ୍ରାରେ ବିଭିନ୍ନ ସମ୍ପ୍ରଦାୟର ଓ ସଂଗଠନର ମହିଳା, ପୁରୁଷ ଆଦି ସାମିଲ ହୋଇଥିଲେ। ଏହି ଅବସରରେ ଆଦିବାସୀଙ୍କ ବିଭିନ୍ନ ସମସ୍ୟାକୁ ନେଇ ଏକ ଦାବୀ ପତ୍ର ଜିଲାପାଳ ଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରିଛନ୍ତି ା
ବିଭିନ୍ନ ଦାବି ମଧ୍ୟରେ ବିଶ୍ୱ ସ୍ତରରେ ପାଳନ ହୋଇ ଆସୁଥିବା ଏହି ଦିବସ ପାଇଁ ଅଗଷ୍ଟ ୯କୁ ସରକାରୀ ଛୁଟି ଘୋଷଣା, ଆଦିବାସୀଙ୍କ ଆବାଦରେ ଥିବା ଜଙ୍ଗଲ ଜମିର ପଟ୍ଟା ପ୍ରଦାନ, ଆଦିବାସୀଙ୍କ ଭାଷା, ସାହିତ୍ୟ ଓ ସଂସ୍କୃତି , ପରମ୍ପରାର ସୁରକ୍ଷା ପାଇଁ ସ୍ବତନ୍ତ୍ର ପଦକ୍ଷେପ ଗ୍ରହଣ କରିବାକୁ ଦାବି କରିଛନ୍ତି। ସେହିପରି ଖଣିଖାଦାନ, କଳକାରଖାନା ଓ ସରକାରୀ ଉଦ୍ୟୋଗ ପାଇଁ ଉଚ୍ଛେଦ କରାଯାଉଥିବା ଆଦିବାସୀଙ୍କ ଜମି ବାବଦକୁ କ୍ଷତିପୂରଣ ପ୍ରଦାନ କିମ୍ବା ଜମି ବଦଳରେ ଜମି ପ୍ରଦାନ କରିବାକୁ ଦାବି କରିଛନ୍ତି। ଆଦିବାସୀ ଝିଅମାନଙ୍କୁ ପ୍ରଲୋଭିତ କରି ଅଣଆଦିବାସୀ ମାନେ ସେମାନଙ୍କ ମାଧ୍ୟମରେ ରାଜନୀତିର ସୁଯୋଗ ନେବା ସହ ଅନ୍ୟାନ୍ୟ ଆଦିବାସୀଙ୍କ ପାଇଁ ଥିବା ସୁବିଧା ସୁଯୋଗକୁ ଉପଭୋଗ କରୁଛନ୍ତି। ଏଣୁ ଏଭଳି କ୍ଷେତ୍ରରେ ବିବାହ ପରେ ଆଦିବାସୀଙ୍କ ପାଇଁ ଥିବା ସୁବିଧାରୁ ବଞ୍ଚିତ କରିବାକୁ ସେମାନଙ୍କୁ ଦାବି କରିଛନ୍ତି। ବିଭିନ୍ନ ଘରୋଇ ନିଯୁକ୍ତି ଓ ଖଣିଖାଦାନ, କଳକାରଖାନାରେ ସରକାରୀ କୋଟା ଭଳି ସ୍ବତନ୍ତ୍ର ନିଯୁକ୍ତି କୋଟା ଦେବାକୁ ଦାବି କରିଛନ୍ତି। ଏହି ଶୋଭାଯାତ୍ରାରେ ଗୋଁଣ୍ଡ ସମାଜ ସଭାପତି ଜନାର୍ଦ୍ଦନନାୟକ, ସାନ୍ତାଳ ସମାଜ ସଭାପତି ସମରା ଟୁଡୁ, ଜିଲା ସଂଯୋଜକ ବାଥୁଡି ସମାଜ ମକରଧ୍ୱଜ ନାଏକ, ଓରାମ ସମାଜର ନେତ୍ରା ଓରାମ, ଭୂୟାଁ ସାଂସ୍କୃତିକ ସଂଗଠନ ଶ୍ୟାମ ସୁନ୍ଦର ନାୟକ ପ୍ରମୁଖ ସାମିଲ ହୋଇଥିଲେ।
