ଲୋଇସିଂହା,୨।୭(ସୁଶାନ୍ତ ବାରିକ)ବଲାଙ୍ଗୀର ଜିଲା ଲୋଇସିଂହା ବ୍ଲକ ବୁର୍ଡା ପଞ୍ଚାୟତ ହାଇସ୍କୁଲରେ ଶିକ୍ଷକ ଅଭାବଜନିତ ସମସ୍ୟା ଦେଖାଦେଇଛି। ଚଳିତବର୍ଷ ବିଦ୍ୟାଳୟର ଦୁଇଜଣ ଶିକ୍ଷକ ଅବସର ଗ୍ରହଣ କରିଛନ୍ତି। ଗତ ୬ ବର୍ଷରେ ୬ ଜଣ ଶିକ୍ଷକ ଅବସର ନେଇଛନ୍ତି। ୨୦୦୪ରେ ଜଣେ ଶିକ୍ଷକଙ୍କ ମୃତ୍ୟୁ ଘଟିଥିଲା। ବିଦ୍ୟାଳୟରେ ୮ ଶିକ୍ଷକ ଆବଶ୍ୟକସ୍ଥଳେ ଏବେ ଜଣେ ମାତ୍ର ଶିକ୍ଷକ ଅବସ୍ଥାପିତ ଅଛନ୍ତି। ମୃତ୍ୟୁ ଓ ଅବସର ଗ୍ରହଣ ପରେ ନୂତନ ନିଯୁକ୍ତି ମିଳୁନି। ବିଦ୍ୟାଳୟରେ ଶିକ୍ଷକ ଅଭାବରୁ ଶିକ୍ଷାଦାନ ବାଧାପ୍ରାପ୍ତ ହୋଇଛି। ଶିକ୍ଷା ବିଭାଗ ତରଫରୁ ବିଦ୍ୟାଳୟରେ ଶିକ୍ଷକ ନିଯୁକ୍ତି ଦୂରେ ଥାଉ ଡେପୁଟେଶନର ବ୍ୟବସ୍ଥା କରାଯାଇନାହିଁ। ଏହି ସ୍ଥିତିରେ ୫ଟିରେ ରୂପାନ୍ତରିତ ହୋଇଥିବା ଏହି ବିଦ୍ୟାଳୟର ନବମ ଓ ଦଶମ ଶ୍ରେଣୀର ୧୦୨ ଛାତ୍ରୀଛାତ୍ରଙ୍କ ଭବିଷ୍ୟତ ଅନ୍ଧକାର ଆଡକୁ ଠେଲି ହୋଇଯାଇଥିବା ଅଭିଭାବକ ମହଲରେ ମତପ୍ରକାଶ ପାଇଛି।
୧୫ ଜୁଲାଇ ୧୯୮୪ରେ ଗ୍ରାମବାସୀଙ୍କ ଉଦ୍ୟମକ୍ରମେ ଉକ୍ତ ବିଦ୍ୟାଳୟ ପ୍ରତିଷ୍ଠା ହୋଇଥିଲା। ୧୯୯୪ରେ ବିଦ୍ୟାଳୟ ଅନୁଦାନ ଯୋଗ୍ୟ ବିବେଚିତ ହୋଇଥିଲା। ୪ ଜଣ ଚତୁର୍ଥ ଶ୍ରେଣୀ କର୍ମଚାରୀଙ୍କ ସହ ବିଦ୍ୟାଳୟରେ ୮ ଜଣ ଶିକ୍ଷକ ଥିଲେ। କାଳକ୍ରମେ ଶିକ୍ଷକଙ୍କ ମୃତ୍ୟୁ ଓ ଅବସର ଗ୍ରହଣ ପରେ ଶିକ୍ଷକଙ୍କ ସଂଖ୍ୟା କମି ଚାଲିଛି। ବିଦ୍ୟାଳୟରେ ଏବେ ଜଣେ ମାତ୍ର ଗଣିତ ଶିକ୍ଷକ ଅଛନ୍ତି। ନବମରେ ୪୯ ଓ ଦଶମରେ ୫୩ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଜୁନ ୩୦ତାରିଖରେ ଭାରପ୍ରାପ୍ତ ପ୍ରଧାନଶିକ୍ଷକ ଅବସରଗ୍ରହଣ କରିଛନ୍ତି। ଏହାର ମାସକ ପୂର୍ବରୁ ମେ ୩୧ତାରିଖରେ ଟିଜିଟି ବିଜ୍ଞାନ(ସିବିଜେଡ) ଶିକ୍ଷକ ଅବସର ନେଇଥିଲେ। ଏହାପୂର୍ବରୁ ୧ ଜୁନ ୨୦୨୨ରେ ହିନ୍ଦୀ ଶିକ୍ଷକ ,୧ ସେପ୍ଟେମ୍ବର ୨୦୨୧ରେ ଟିଜିଟି କଳା ଶିକ୍ଷକ, ୧ ମେ ୨୦୧୯ରେ କ୍ରୀଡା ଶିକ୍ଷକ, ୧ ଏପ୍ରିଲ ୨୦୧୭ରେ ପ୍ରଧାନ ଶିକ୍ଷକ ଅବସର ଗ୍ରହଣ କରିଥିଲେ। ୧୨ ଜୁଲାଇ ୨୦୦୪ରେ ସଂସ୍କୃତ ଶିକ୍ଷକଙ୍କ ଅକାଳ ବିୟୋଗ ଘଟିଥିଲା। ଶିକ୍ଷକଙ୍କ ମୃତ୍ୟୁ ଓ ଅବସର ଗ୍ରହଣ ପରେ ଏହି ସବୁ ପଦବୀ ଖାଲି ପଡିଛି। କେବଳ ଶିକ୍ଷକ ନୁହନ୍ତି କେତେକ ଚତୁର୍ଥ ଶ୍ରେଣୀ କର୍ମଚାରୀ ପଦବୀ ଖାଲି ପଡିଛି। ୨୦୧୩ରେ କାର୍ଯ୍ୟରତ ବିଦ୍ୟାଳୟର ରାତ୍ର ଜଗୁଆଳି ଏକାଦଶିଆ ବାରିକଙ୍କ ହୃଦ୍ଘାତରେ ମୃତ୍ୟୁ ଘଟିଥିଲା। ଥଇଥାନ ସ୍କିମରେ ପରିବାର ପକ୍ଷରୁ ଆବେଦନ କରାଯାଇଛି। ହେଲେ ବିଡମ୍ବନାର ବିଷୟ ଯେ, ୧୦ବର୍ଷ ବିତିଥିଲେ ବି ତାଙ୍କର କୌଣସି ସମ୍ପର୍କୀୟ ଥଇଥାନ ହୋଇପାରିନାହାନ୍ତି।
୨୦୧୯ପରଠାରୁ ବିଦ୍ୟାଳୟରେ ପିଲାଙ୍କ ନାମ ଲେଖା ସଂଖ୍ୟା କମି ଯାଇଛି। ଶିକ୍ଷକ ଅଭାବରୁ ଏଠାରେ ପିଲାଙ୍କ ନାମ ଲେଖାଇବାକୁ ଅଭିବାବକମାନେ ଉଚିତ ମଣୁନାହାନ୍ତି। ଅପରପକ୍ଷେ ଚଳିତ ମାଟ୍ରିକ ପରୀକ୍ଷାରେ ବିଦ୍ୟାଳୟର ଶତପ୍ରତିଶତ ଛାତ୍ରୀଛାତ୍ର ପାସ୍ ହୋଇଛନ୍ତି। ବିଗତ ୫ବର୍ଷ ହେଲା ମାଟ୍ରିକ ପରୀକ୍ଷାରେ ବିଦ୍ୟାଳୟରେ ୯୫ ପ୍ରତିଶତରୁ ଅଧିକ ଛାତ୍ରୀଛାତ୍ର ଉତ୍ତୀର୍ଣ୍ଣ ହୋଇଛନ୍ତି। ଘରୋଇ ଟ୍ୟୁସନ କିମ୍ବା ନିଜସ୍ବ ଉଦ୍ୟମରେ ପିଲାମାନେ ଏହିପରି ସଫଳତା ହାସଲ କରି ଆସୁଛନ୍ତି। ଏହାସତ୍ତ୍ୱେ ଉକ୍ତ ବିଦ୍ୟାଳୟ ପ୍ରତି ଶିକ୍ଷା ବିଭାଗ ଅଣଦେଖା କରୁଛି। ବିଦ୍ୟାଳୟ ଓ ପରିଚାଳନା କମିଟି ତରଫରୁ ଶିକ୍ଷକ ସମସ୍ୟାକୁ ନେଇ ଶିକ୍ଷା ବିଭାଗର ଦୃଷ୍ଟି ଆକର୍ଷଣ କରାଯାଇଛି ା ହେଲେ ଏ ଦିଗରେ ଆବଶ୍ୟକ ପଦକ୍ଷେପ ନିଆଯାଉ ନ ଥିବାରୁ ସାଧାରଣରେ କ୍ଷୋଭ ପ୍ରକାଶ ପାଇଛି। ଶିକ୍ଷକ ନିଯୁକ୍ତ ନକରି ବିଦ୍ୟାଳୟକୁ ୫ଟିରେ ରୂପାନ୍ତରଣ କାହା ସ୍ବାର୍ଥରେ ବୋଲି ସାଧାରଣରେ ମତ ପ୍ରକାଶ ପାଇଛି।
