ବେଜିଂ, ୧୭।୫ : ଚାଇନାର ଗୁପ୍ତଚର ଏଜେନ୍ସି ନେପାଳର ସେନାର ପୂର୍ବତନ ଅଧିକାରୀମାନଙ୍କୁ ଏହାର ଟାର୍ଗେଟରେ ରଖିଛି। ନେପାଳର ବହୁ ଅବସରପ୍ରାପ୍ତ ବରିଷ୍ଠ ସେନା ଅଧିକାରୀ ଚାଇନା ଦୂତାବାସ ସହିତ ସିଧାସଳଖ ଯୋଗାଯୋଗରେ ଅଛନ୍ତି। ଗୁପ୍ତଚର ରିପୋର୍ଟରୁ ଏହି ସୂଚନା ମିଳିଛି। ସୂତ୍ରରୁ ଜଣାପଡିଛି ଯେ ନେପାଳ ସେନାର କିଛି ଅବସରପ୍ରାପ୍ତ ଅଧିକାରୀଙ୍କୁ ବିଭିନ୍ନ ପ୍ରକାରର ଦାୟିତ୍ୱ ଦିଆଯାଇଛି।
ଏଥିରେ ନେପାଳର ସେନାର ସାମରିକ ଗୁପ୍ତଚର ଅଧିକାରୀ ଏବଂ ଚାଇନାର ଗୁପ୍ତଚର ଏଜେନ୍ସିର ଏଜେଣ୍ଟମାନଙ୍କ ମଧ୍ୟରେ ମିଳିତ ତାଲିମ ଆୟୋଜନ କରାଯାଉଛି। ଗୁପ୍ତଚର ରିପୋର୍ଟ ଅନୁଯାୟୀ, ନେପାଳ ସେନାର ଦୁଇ ପୂର୍ବତନ ମେଜର ଜେନେରାଲ ର଼୍ୟାଙ୍କର ଅଧିକାରୀ ଏପ୍ରିଲରେ ଚାଇନା ଗସ୍ତ କରିଥିଲେ। ନେପାଳରେ ଚାଇନାର ଗୁପ୍ତଚର ଏଜେନ୍ସି ମିନିଷ୍ଟ୍ରି ଅଫ୍ ଷ୍ଟେଟ୍ ସିକ୍ୟୁରିଟି(ଏମଏସଏସ) ସକ୍ରିୟ ଅଛି।
ନେପାଳ ଆଶଙ୍କା କରୁଛି ଯେ କାଠମାଣ୍ଡୁର ଠାମେଲ, ପୋଖରା, ଲୁମ୍ବାନୀ, ଡାବ୍ରା, ସ୍ବୟମ୍ବୁ, ଫାର୍ପିଙ୍ଗ, ରାମକୋଟ, କପନ ଅଞ୍ଚଳରେ ଏମଏସଏସର କାର୍ଯ୍ୟକଳାପ ବୃଦ୍ଧି ପାଇଛି। ଚାଇନାର ସମସ୍ତ ସନ୍ଦିଗ୍ଧ ବ୍ୟକ୍ତିଙ୍କୁ ଦେଶର ସୀମାରୁ ବାହାର କରାଯିବ ବୋଲି ନେପାଳ କହିଛି। ଗୁପ୍ତଚର ରିପୋର୍ଟକୁ ଅଧାର କରି ନେପାଳ ଏକ ବଡ ପଦକ୍ଷେପ ନେବାକୁ ଯାଉଛି ବୋଲି ଖବର ପ୍ରକାଶ ପାଇଛି। ଏଭଳି ପରିସ୍ଥିତିରେ ଚାଇନାର ଗୁପ୍ତଚର ସଂସ୍ଥାଗୁଡ଼ିକର ତଦନ୍ତ ଆରମ୍ଭ ହେବାକୁ ଯାଉଛି।
ଚାଇନା ଏଜେନ୍ସିଗୁଡିକର ବେଆଇନ କାର୍ଯ୍ୟକଳାପ ଉପରେ ନେପାଳ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି କହିଛନ୍ତି। ସର୍ବପ୍ରଥମେ, ପୂର୍ବତନ ଅଧିକାରୀମାନେ ଚାଇନାକୁ କେଉଁ ସୂଚନା ଦେଇଛନ୍ତି ଏବଂ ସେମାନଙ୍କୁ କେଉଁ କାଯର୍ର୍ୟ ପାଇଁ ବ୍ୟବହାର କରାଯାଇପାରିବ ତାହା ଅନୁସନ୍ଧାନ କରାଯାଉଛି। ଯେଉଁ ଅଧିକାରୀଙ୍କ ସହ ଗୁପ୍ତଚର ସଂସ୍ଥା ଯୋଗାଯୋଗରେ ଥିଲେ ସେମାନଙ୍କ ସୂଚନା ସଂଗ୍ରହ କରାଯାଉଛି।
