ନୂଆଦିଲ୍ଲୀ,୧୩ା୬: ଭାରତର ଖୁଚୁରା ମୁଦ୍ରାସ୍ଫୀତି ମେ ୨୦୨୫ରେ ହ୍ରାସ ପାଇ ୨.୮୨%ରେ ପହଞ୍ଚିଛି, ଯାହା ଫେବୃଆରୀ ୨୦୧୯ ପରେ ସର୍ବନିମ୍ନ ବାର୍ଷିକ ମୁଦ୍ରାସ୍ଫୀତି ହାର ଅଟେ। ଗୁରୁବାର ଜାରି ହୋଇଥିବା ସରକାରୀ ତଥ୍ୟ ଅନୁସାରେ, ଗ୍ରାହକ ମୂଲ୍ୟ ସୂଚକାଙ୍କ (ସିପିଆଇ) ଆଧାରରେ ଖୁଚୁରା ମୁଦ୍ରାସ୍ଫୀତି ଏପ୍ରିଲ ୨୦୨୫ରେ ୩.୧୬% ଥିବା ବେଳେ ମଇରେ ୩୪ ବେସିସ୍ ପଏଣ୍ଟ୍ ହ୍ରାସ ପାଇଛି।
ମୁଖ୍ୟତଃ ଖାଦ୍ୟ ମୁଦ୍ରାସ୍ଫୀତିରେ ନାଟକୀୟ ହ୍ରାସ ଏହି ନିମ୍ନ ମୁଦ୍ରାସ୍ଫୀତି ହାରର ପ୍ରମୁଖ କାରଣ। ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନଏସଓ) ତଥ୍ୟ ଅନୁସାରେ, ମେ ୨୦୨୫ରେ ଖାଦ୍ୟ ମୁଦ୍ରାସ୍ଫୀତି ୦.୯୯%କୁ ହ୍ରାସ ପାଇଛି, ଯାହା ଗତ ବର୍ଷର ମଇ ମାସରେ ୮.୬୯% ଥିଲା। ଏପ୍ରିଲ ୨୦୨୫ ତୁଳନାରେ ମେ’ରେ ଖାଦ୍ୟ ମୁଦ୍ରାସ୍ଫୀତିରେ ୭୯ ବେସିସ୍ ପଏଣ୍ଟ୍ର ତୀବ୍ର ହ୍ରାସ ଦେଖାଯାଇଛି, ଯାହା ଅକ୍ଟୋବର ୨୦୨୧ ପରେ ସର୍ବନିମ୍ନ ସ୍ତରରେ ରହିଛି।
ଏନଏସଓ ଅନୁସାରେ, ଡାଲି ଓ ଡାଲି ଜାତୀୟ ଉତ୍ପାଦ, ପନିପରିବା, ଫଳ, ଶସ୍ୟ ଓ ଶସ୍ୟ ଜାତୀୟ ଉତ୍ପାଦ, ଗୃହସ୍ଥାଳୀ ସାମଗ୍ରୀ ଓ ସେବା, ଚିନି ଓ ମିଠାଜାତୀୟ ଖାଦ୍ୟ ଏବଂ ଅଣ୍ଡାର ମୂଲ୍ୟ ହ୍ରାସ ସହ ଅନୁକୂଳ ଆଧାର ପ୍ରଭାବ ମୁଖ୍ୟତଃ ଏହି ହ୍ରାସର କାରଣ।
ଗ୍ରାମାଞ୍ଚଳରେ ମୁଖ୍ୟ ମୁଦ୍ରାସ୍ଫୀତି ଏପ୍ରିଲ ୨୦୨୫ରେ ୨.୯୨% ଥିବା ବେଳେ ମଇରେ ୨.୫୯%କୁ ହ୍ରାସ ପାଇଛି। ସେହିପରି, ସହରାଞ୍ଚଳରେ ମୁଦ୍ରାସ୍ଫୀତି ୩.୩୬%ରୁ ୩.୦୭%କୁ ଖସିଛି। ଗୃହ ମୁଦ୍ରାସ୍ଫୀତି ମେ’ରେ ୩.୧୬% ଥିବା ବେଳେ ଏପ୍ରିଲରେ ଏହା ୩.୦୬% ଥିଲା। ତେବେ, ପରିବହନ ଓ ଯୋଗାଯୋଗ କ୍ଷେତ୍ରର ମୁଦ୍ରାସ୍ଫୀତି ଏପ୍ରିଲରେ ୩.୬୭% ଥିବା ବେଳେ ମଇରେ ୩.୮୫%କୁ ବୃଦ୍ଧି ପାଇଛି।
ଏହି ନିମ୍ନ ମୁଦ୍ରାସ୍ଫୀତି ହାର ଅର୍ଥନୀତିରେ ସ୍ଥିରତା ଆଣିବା ସହ ଗ୍ରାହକଙ୍କ କ୍ରୟ ଶକ୍ତିକୁ ସମର୍ଥନ କରିପାରେ, ଯଦିଓ ଅର୍ଥନୀତିବିଦ୍ମାନେ ଭବିଷ୍ୟତରେ ପନିପରିବା ଓ ଫଳ ମୂଲ୍ୟରେ ବୃଦ୍ଧି ହେବାର ସମ୍ଭାବନା ଉପରେ ନଜର ରଖିଛନ୍ତି।
