ନୟାଗଡ଼ ଅଫିସ,୬ା୩:ନୟାଗଡ଼ ଜିଲା ଦେଇ ଯାଇଥିବା ୨୧ ନଂ. ରାଜ୍ୟ ରାଜପଥର ନୟାଗଡ଼ ଲେମ୍ବୁ ବିକ୍ରି ଛକଠାରୁ ଲେଙ୍କୁଡ଼ିପଡ଼ା ଛକ ପର୍ଯ୍ୟନ୍ତ ରାସ୍ତାରେ ଖଲଖମା ଯୋଗୁ ଦୁର୍ଘଟଣା ବଢୁଛି। ତେବେ ରାସ୍ତାର ପୁନରୁଧାର ନଁାରେ ଫଳକ ରାସ୍ତାକଡ଼ରେ ଝୁଲି ଅଯଥା ରାଜନୀତି କରାଯାଉଛି ବୋଲି କଂଗ୍ରେସ ଅଭିଯୋଗ ଆଣିଛି। ଏଣୁ ଫଳକରେ ରାସ୍ତା କାର୍ଯ୍ୟକୁ ସୀମିତ ନ ରଖି କାମ ତୁରନ୍ତ କରିବାକୁ କଂଗ୍ରେସ ପରାମର୍ଶ ଦେଇଛି। ନଚେତ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି। ଏ ନେଇ ଜିଲା କଂଗ୍ରେସ ସଭାପତି ରଣଜିତ ଦାଶ କୁହନ୍ତି, ମରଣଯନ୍ତା ପାଲଟିଥିବା ନୟାଗଡ଼ ସହରରୁ ଆରମ୍ଭ ଜନଗହଳି ରାସ୍ତାର ମରାମତି ନଁାରେ ପୂର୍ତ୍ତ ବିଭାଗୀୟ ଯନ୍ତ୍ରୀ ମାଲେମାଲ ହୋଇ ଚାଲିଛନ୍ତି। ୨ କୋଟି ୮୦ ଲକ୍ଷ ଟଙ୍କା ବ୍ୟୟ ଅଟକଳରେ ଏହି ରାସ୍ତା ନିର୍ମାଣ ପାଇଁ ନୟାଗଡ଼ ବିଧାୟକ କିଛିଦିନ ପୂର୍ବେ ସ୍ଥାନୀୟ ତ୍ରିନାଥ ଛକରେ ଭିତ୍ତିପ୍ରସ୍ତର ସ୍ଥାପନା କରି ଫଳକ ମାରିଛନ୍ତି। ମାତ୍ର ଠିକାଦାର ଏଯାବତ କାର୍ଯ୍ୟ ଆରମ୍ଭ କରୁନାହାନ୍ତି। ସମ୍ପୃକ୍ତ ଠିକାଦାରଙ୍କ ବିରୋଧରେ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ କାରଣ ଦର୍ଶାଅ ନୋଟିସ ଜାରି ମଧ୍ୟ କରୁନାହାନ୍ତି। ଏହି ପରିପ୍ରେକ୍ଷୀରେ ଏହି ଅଢେଇ କିଲୋମିଟର ଜନଗହଳି ପୂର୍ଣ୍ଣ ରାସ୍ତାରେ ଦିନତମାମ ମାତ୍ରାଧିକ ଧୂଳି ଉଡ଼ି ଜନଜୀବନ ଅସ୍ତବ୍ୟସ୍ତ ହୋଇପଡୁଛି। ଯଦି ରାସ୍ତା କାର୍ଯ୍ୟ ସପ୍ତାହ ମଧ୍ୟରେ ଆରମ୍ଭ କରା ନ ଯାଏ ତେବେ ଭୁବନେଶ୍ୱରସ୍ଥିତ ପୂର୍ତ୍ତ ବିଭାଗୀୟ ମୁଖ୍ୟଯନ୍ତ୍ରୀଙ୍କ କାର୍ଯ୍ୟାଳୟ ସାମ୍ନାରେ ବିକ୍ଷୋଭ କରାଯିବ ବୋଲି ଦଳ ପକ୍ଷରୁ କୁହାଯାଇଛି।
