ଭୁବନେଶ୍ୱର,୨ା୯(ବ୍ୟୁରୋ):ଓଡ଼ିଶା ସମେତ ୮ରାଜ୍ୟରେ ଖ୍ରୀଷ୍ଟିଆନ ବିରୋଧୀ ଆକ୍ରମଣ ଘଟଣାରେ କି କି କାର୍ଯ୍ୟାନୁଷ୍ଠାନ ନିଆଯାଇଛି, ସେ ସମ୍ପର୍କରେ ସବିଶେଷ ତଥ୍ୟ ପ୍ରଦାନ କରିବାକୁ ଗୁରୁବାର ସର୍ବୋଚ୍ଚ ଅଦାଲତ ସ୍ବରାଷ୍ଟ୍ର ମନ୍ତ୍ରଣାଳୟକୁ ନିର୍ଦ୍ଦେଶ ଦେଇଛନ୍ତି। ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ହିମା କୋହଲିଙ୍କୁ ନେଇ ଗଠିତ ଖଣ୍ଡପୀଠ ଉକ୍ତ ମାମଲାର ଶୁଣାଣି କରି ସ୍ବରାଷ୍ଟ୍ର ମନ୍ତ୍ରଣାଳୟକୁ ୨ମାସ ସମୟ ଦେଇଛନ୍ତି। ଏହି ସମୟ ମଧ୍ୟରେ ସ୍ବରାଷ୍ଟ୍ର ମନ୍ତ୍ରଣାଳୟ ଓଡ଼ିଶା, ଝାଡ଼ଖଣ୍ଡ, ମଧ୍ୟପ୍ରଦେଶ, ଛତିଶଗଡ଼, ହରିୟାଣା, ଉତ୍ତରପ୍ରଦେଶ, କର୍ନାଟକ ଏବଂ ବିହାରର ମୁଖ୍ୟ ଶାସନ ସଚିବଙ୍କ ଠାରୁ ତଥ୍ୟ ସଂଗ୍ରହ କରି ସର୍ବୋଚ୍ଚ ଅଦାଲତରେ ରିପୋର୍ଟ ଦାଖଲ କରିବେ। ଖ୍ରୀଷ୍ଟିଆନ ବିରୋଧୀ ଘଟଣା ସମ୍ପର୍କିତ କେତେ ଏତଲା ପଞ୍ଜୀକୃତ ହୋଇଛି, ତଦନ୍ତର ଅଗ୍ରଗତି, କେତେ ଗିରଫ ହୋଇଛନ୍ତି ଏବଂ କେତେ ମାମଲାର ଚାର୍ଜଶିଟ ଦାଖଲ ହୋଇଛି ସେନେଇ ମୁଖ୍ୟ ଶାସନ ସଚିବ ବିସ୍ତୃତ ତଥ୍ୟ ସଂଗ୍ରହ କରି ସ୍ବରାଷ୍ଟ୍ର ମନ୍ତ୍ରଣାଳୟକୁ ଅବଗତ କରାଇବାକୁ ଅଦାଲତ ନିର୍ଦ୍ଦେଶ ଦେଇଛନ୍ତି।
ଉପରୋକ୍ତ ୮ଟି ରାଜ୍ୟରେ ଖ୍ରୀଷ୍ଟିଆନଙ୍କ ଉପରେ ପ୍ରାୟ ୭୦୦ରୁ ଊର୍ଦ୍ଧ୍ୱ ଆକ୍ରମଣ ଘଟଣା ସମ୍ପର୍କରେ ଆବେଦନକାରୀ ସର୍ବୋଚ୍ଚ ଅଦାଲତରେ ଜଣାଇଥିଲେ। ସେଥିମଧ୍ୟରେ ଚର୍ଚ୍ଚ ଭଙ୍ଗାଯିବା ଏବଂ ବାଇବେଲ ପୋଡ଼ିବା ଭଳି ଘଟଣା ମଧ୍ୟ ରହିଛି। ୫୩ ଏଫ୍ଆଇଆର୍ ରୁଜୁ ହୋଇଥିବାବେଳେ ମାତ୍ର ୨୩ଜଣ ଗିରଫ ହୋଇ ଜାମିନରେ ଯାଇଛନ୍ତି ବୋଲି ଉଲ୍ଲେଖ ରହିଥିଲା। ଆବେଦନକାରୀଙ୍କ ମାମଲାକୁ ଗ୍ରହଣ କରିବା ସହ ଆକ୍ରମଣ ଘଟଣାର ସବିଶେଷ ତଥ୍ୟ ୪ସପ୍ତାହ ମଧ୍ୟରେ ସଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ ପ୍ରଦାନ କରିବାକୁ ଖଣ୍ଡପୀଠ ପୂର୍ବରୁ ନିର୍ଦ୍ଦେଶ ଦେଇଥିଲେ।
ଉକ୍ତ ରିପୋର୍ଟ ଦାଖଲ କରିବା ପରେ ସେଥିରୁ ଅଧିକାଂଶ ଅଭିଯୋଗ ମିଥ୍ୟା ଉପରେ ଆଧାରିତ ବୋଲି ସଲିସିଟର ଜେନେରାଲ ଯାଞ୍ଚ ସମୟରେ ଜାଣିବାକୁ ପାଇଥିଲେ। ତେଣୁ କେବଳ ଆବେଦନକୁ ଆଧାରକରି କୌଣସି ରାୟ ପ୍ରକାଶ କରିବା ଠିକ୍ ହେବ ନାହିଁ ବୋଲି ମେହେଟ୍ଟା ଖଣ୍ଡପୀଠ ନିକଟରେ ଜଣାଇଥିଲେ। ସିଲିସିଟର ଜେନେରାଲଙ୍କ ଯୁକ୍ତି ଶୁଣିବା ପରେ ସର୍ବୋଚ୍ଚ ଅଦାଲତ ଏସମ୍ପର୍କିତ ବିସ୍ତୃତ ରିପୋର୍ଟ ୮ରାଜ୍ୟର ମୁଖ୍ୟ ଶାସନ ସଚିବଙ୍କଠାରୁ ତଲବ କରିଛନ୍ତି।
