ମୁମ୍ବାଇ, ୧୧।୯ : ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ(ଆର୍ଆଇଏଲ୍) ବଜାର ମୂଲ୍ୟାୟନରେ ନୂଆ ରେକର୍ଡ ସୃଷ୍ଟି କରିଛି। ପ୍ରଥମ ଭାରତୀୟ ସୂଚୀଭୁକ୍ତ କମ୍ପାନୀ ଭାବେ ରିଲାଏନ୍ସ ୨୦୦ ବିଲିୟନ ଡଲାର (ପ୍ରାୟ ୧୫ ଲକ୍ଷ କୋଟି) ବଜାର ପୁଞ୍ଜୀକରଣ ସ୍ତର ଟପିବାକୁ ସକ୍ଷମ ହୋଇଛି। ଗୁରୁବାର ଦିନ ମଧ୍ୟରେ କମ୍ପାନୀର ଶେୟାର କାରବାର ୬.୨% ବଢିବା ଯୋଗୁ ଏହା ନୂଆ ରେକର୍ଡ କରିଛି। ରିଲାଏନ୍ସ ଅଧ୍ୟକ୍ଷ ମୁକେଶ ଅମ୍ବାନୀ ଟେଲିକମ୍ କ୍ଷେତ୍ରରେ ସ୍ଥିତି ଦୃଢ କରିବା ପରେ ବର୍ତ୍ତମାନ ରିଟେଲ କାରବାର ଉପରେ ଧ୍ୟାନ କେନ୍ଦ୍ରିତ କରିଛନ୍ତି। ଭାରତ ଭଳି ଏକ ପ୍ରମୁଖ ଅଭିବୃଦ୍ଧିଶୀଳ ବଜାରରେ ରିଟେଲ କ୍ଷେତ୍ରରେ ଏକ ପ୍ରମୁଖ ଅଂଶୀଦାର ହେବା ନେଇ କମ୍ପାନୀ ଲକ୍ଷ୍ୟ ରଖିଛି। ରିଲାଏନ୍ସ ରିଟେଲର ପ୍ରାୟ ୨୦ ବିଲିୟନ ଡଲାର ଅଂଶଧନ ଆମାଜନ ଡଟ୍ କମ୍କୁ ବିକ୍ରି ନେଇ ଆଲୋଚନା ଜାରି ରହିଥିବା ଏକ ରିପୋର୍ଟ ବ୍ଲୁମବର୍ଗରେ ପ୍ରକାଶ ପାଇଥିଲା। କମ୍ପାନୀ ଏହାର ୪୦% ଅଂଶଧନ ବିକ୍ରି କରିବା ନେଇ ଏହି ରିପୋର୍ଟ ଉଲ୍ଲେଖ କରିଛି। ତେବେ ରିଲାଏନ୍ସ ଇଣ୍ଡଷ୍ଟ୍ରିଜ ପକ୍ଷରୁ ଗୁରୁବାର ଏ ନେଇ ସ୍ପଷ୍ଟୀକରଣ ଦିଆଯାଇ କୁହାଯାଇଛି ଯେ, ନିବେଶକ ମାନେ କୌଣସି ମନଗଢା ରିପୋର୍ଟ ଉପରେ ବିଶ୍ୱାସ ନ କରିବା ଉଚିତ। କମ୍ପାନୀ ପକ୍ଷରୁ ଯାହା କାର୍ଯ୍ୟପନ୍ଥା ଗ୍ରହଣ କରାଯାଉଛି ତାହା ଷ୍ଟକ ବଜାରକୁ ଫାଇଲିଂ ଦ୍ୱାରା ଅବଗତ କରାଯାଉଛି।
