ଗୋରଖପୁର/ଲକ୍ଷ୍ନୌ,୮।୧୨: ଉତ୍ତର ପ୍ରଦେଶ ବିଧାନସଭା ନିର୍ବାଚନ ଯେତିକି ପାଖେଇ ଆସୁଛି ଶାସକ ବିରୋଧୀଙ୍କ ବାକ୍ଯୁଦ୍ଧ ସେତିକି ତୀବ୍ର ହେବାରେ ଲାଗିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଗୋରଖପୁରରେ ଭାଜପାର ଏକ ନିର୍ବାଚନୀ ସଭାକୁ ସମ୍ବୋଧିତ କରି ସମାଜବାଦୀ ପାର୍ଟି (ଏସ୍ପି)କୁ ଟାର୍ଗେଟ କରିଥିଲେ। କହିଥିଲେ, ୟୁପି ପାଇଁ ଲାଲ୍ଟୋପି ଏକ ରେଡ୍ ଆଲର୍ଟ। ଏସ୍ପି ଅଧ୍ୟକ୍ଷ ଅଖିଳେଶ ଯାଦବ କାଳ ବିଳମ୍ବ ନ କରି ଏହାର ଜବାବରେ କହିଛନ୍ତି, ଲାଲ୍ଟୋପି ୟୁପି ପାଇଁ ନୁହେଁ, ବରଂ ଭାଜପା ଲାଗି ବିପଦ। ଦୁଇ ନେତାଙ୍କ ଏଭଳି ବାକ୍ୟ ବିନିମୟ ୟୁପି ଭୋଟରଙ୍କୁ ଆମୋଦିତ କରିଛି।
ୟୁପି ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା ହୋଇ ନ ଥିଲେ ହେଁ ସବୁ ରାଜନୈତିକ ଦଳ ଭୋଟରଙ୍କୁ ନିଜ ଆଡ଼କୁ ଆକର୍ଷିତ କରିବା ପାଇଁ ପ୍ରାଣପଣେ ଉଦ୍ୟମ ଜାରି ରଖିଛନ୍ତି। ଏହି କ୍ରମରେ ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୋରଖପୁରରେ ଏକ ଏମ୍ସ ଏବଂ ସାର କାରଖାନାକୁ ଉଦ୍ଘାଟନ କରିବା ସହ ସଭାକୁ ସମ୍ବୋଧିତ କରିଥିଲେ। ସେ କହିଥିଲେ, ଆଜି ସମଗ୍ର ୟୁପି ଜାଣିଛି ଯେ ଯେଉଁମାନେ ଲାଲ୍ଟୋପି ପିନ୍ଧନ୍ତି ସେମାନେ ଲୋକଙ୍କ ଦୁଃଖ ଯନ୍ତ୍ରଣାକୁ ନେଇ ଆଦୌ ଚିନ୍ତିତ ନୁହନ୍ତି। ଲାଲ୍ଟୋପି ପରିଧାନ କରୁଥିବା ଲୋକେ କେବଳ କ୍ଷମତା ଚାହାନ୍ତି। ସେମାନେ କ୍ଷମତାକୁ ଆସିଲେ ଦୁର୍ନୀତି କରନ୍ତି, ଲୋକଙ୍କ ଉତ୍ସକୁ ହଡ଼ପ କରନ୍ତି ଏବଂ ମାଫିଆମାନଙ୍କୁ ସ୍ବାଧୀନତା ଦିଅନ୍ତି ବୋଲି ମୋଦି ସମାଲୋଚନା କରିଥିଲେ। ଲାଲ୍ଟୋପି ସମାଜବାଦୀ ନେତା ଓ କର୍ମୀଙ୍କ ଟ୍ରେଡ୍ ମାର୍କ ହୋଇଥିବାରୁ ସେ ଏପରି ଟାର୍ଗେଟ କରିଥିଲେ।
ଏହାର କିଛି ସମୟ ପରେ ମିରଟ୍ରେ ଏସ୍ପିର ଏକ ସଭା ହୋଇଥିଲା। ଉକ୍ତ ସଭାରେ ଏସ୍ପି ମୁଖିଆ ଅଖିଳେଶ ଯାଦବ କହିଥିଲେ, ଲାଲ୍ଟୋପି ପିନ୍ଧୁଥିବା ଲୋକେ ହେଉଛନ୍ତି ଭାଜପା ପାଇଁ ରେଡ୍ ଆଲର୍ଟ। କାରଣ ଭାଜପା ଯୋଗୁ ଦେଶରେ ଦରଦାମ ବୃଦ୍ଧି, ବେକାରି ସମସ୍ୟା, କୃଷକ ଓ ଚାଷୀଙ୍କ ଦୁଃଖ ବହୁଗୁଣିତ ହୋଇ ରେଡ୍ ଆଲର୍ଟ ହୋଇଛି। ସେହିପରି ହାଥ୍ରସ୍ ଓ ଲଖିମପୁର ଖେରି ଘଟଣା ରାଜ୍ୟବାସୀଙ୍କ ଚିନ୍ତା ବଢ଼ାଇଦେଇଥିବାବେଳେ ସରକାରଙ୍କ ଅବହେଳା ଯୋଗୁ ମହିଳା ଓ ଯୁବପିଢ଼ିଙ୍କ ଅସୁବିଧା, ସ୍ବାସ୍ଥ୍ୟ, ଶିକ୍ଷା ଓ ବ୍ୟବସାୟରେ ପ୍ରତିବନ୍ଧକ ସୃଷ୍ଟି ହୋଇଛି। ୟୁପିରେ ୨୦୨୨ରେ ଲାଲ୍ଟୋପି ପରିବର୍ତ୍ତନ ଆଣିବ ବୋଲି ଅଖିଳେଶ କହିଥିଲେ। ଇତିମଧ୍ୟରେ ରାଷ୍ଟ୍ରୀୟ ଲୋକ ଦଳ (ଆର୍ଏଲ୍ଡି) ନେତା ଜୟନ୍ତ ଚୌଧରୀ ସମାଜବାଦୀ ପାର୍ଟି ସହ ତାଙ୍କ ଦଳର ମେଣ୍ଟ ଚୂଡ଼ାନ୍ତ ହୋଇଥିବା ଘୋଷଣା କରିଛନ୍ତି। ଜୟନ୍ତ କହିଛନ୍ତି, ଆସନ୍ତା ବିଧାନସଭାରେ ଦୁଇଦଳ ଏକାଠି ଲଢ଼ିବେ। କ୍ଷମତାକୁ ଆସିଲେ କେନ୍ଦ୍ରର କୃଷି ଆଇନ ବିରୋଧରେ ଆନ୍ଦୋଳନ ବେଳେ ଶହୀଦ ହୋଇଥିବା କୃଷକଙ୍କ ଉଦ୍ଦେଶ୍ୟରେ ଏକ ସ୍ମାରକ ପ୍ରତିଷ୍ଠା କରାଯିବ। ଏଥର ୟୁପି ଭୋଟର ଭାଜପାକୁ ମୁହଁତୋଡ଼ ଜବାବ ଦେବାକୁ ଯାଉଛନ୍ତି ବୋଲି ଜୟନ୍ତ କହିଥିଲେ।
